ސިޔާސީ މަސްރަޙު ހަލަބޮލިނުވާނޭހެން އަމަލުތައް ބެހެއްޓުމަށް އެޗްއާރުސީއެމްއިން އިލްތިމާސްކޮށްފިއެވެ.
އާދީއްތަ ދުވަހު ބޭއްވި ރައްޔިތުންގެ މަޖިލީހުގެ އިންތިހާބު 2024ގެ އިންތިހާބާއި ގުޅިގެން އެޗްއާރުސީއެމްއިން ބުނީ އާދީއްތަ ދުވަހު ކުރިއަށް ދިޔަ ރައްޔިތުންގެ މަޖިލީހުގެ އިންތިޙާބުގެ ވޯޓުލުމުގެ އެންމެހައި ހަރަކާތްތައް ކުރިއަށްގޮސްފައިވަނީ ޖުމްލަގޮތެއްގައި ސުލްހަވެރިކަމާ އަމާންކަމާއެކުގައިކަމަށެވެ.
އެޗްއާރުސީއެމުން ބުނީ މި އިންތިޚާބަށް އިލެކްޝަންސް ކޮމިޝަނުން ކޮށްފައިވާ މަސައްކަތްތަކާއި އިންތިޒާމުތައް ޖުމްލަގޮތެއްގައި ވަރަށް ރަގަޅުކަމަށެވެ. އަދި އިންތިޙާބުގެ ވޯޓު ގުނުމުގެ މަސައްކަތްތައް ކުރިއަށް ދާއިރު، ދިމިޤްރާޠީ އުޞޫލުން ރައްޔިތުން ބައިވެރިވެ ނިންމާ ނިންމުން ބަލައިގަތުމަށާއި އެ ނިންމުމަށް އިޙްތިރާމުކޮށް ގައުމުގެ ސިޔާސީ މަޝްރަޙު ހަލަބޮލި ނުވާނޭހެން އަމަލުތައް ބެހެއްޓެވުމަށް އެންމެހާ ފަރާތްތަކަށް އިލްތިމާސްކުރާ ކަމަށެވެ.
އަދި އިންތިޙާބުގެ ވޯޓު ގުނުމުގެ މަސައްކަތްތައް ނިމުމުން، ކޮމިޝަނުން އިންތިޙާބު އޮބްޒަރވް ކުރުމުގައި ފާހަގަކުރެވުނު ކަންކަމުގެ ރިޕޯޓު އާންމު ކުރާނެ ކަމަށެވެ.
