އަލީ ވަހީދު ވިދާޅުވީ މިސަރުކާރުން އެންމެ ޖެހިލުންވާ އެކަކީ އޭނާކަން ވޭތުވެދިޔަ ދެތިން ހަފްތާގައި ކުރިޔަށްގެންދިޔަ އެންޓިކެމްޕެއިނުން އެނގިވަޑައިގަންނަވާކަމަށް
އަލީ ވަހީދު
ރައްޔިތުންގެ މަޖިލީހަށް އިންތިޚާބުވެ ވަޑައިގެންފިނަމަ އެމްޑީޕީގެ ޓިކެޓްގައި ކުޅުދުއްފުށީ ދެކުނު ދާއިރާއަށް ވާދަކުރައްވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްޗަށް ކުރެވޭ ޖިންސީ ގޯނާގެ ތުހުމަތުތަކުގެ އިންކުއަރީއެއް ހެދުމަށް އަމިއްލަފުޅަށް މަޖިލީހަށް ގޮވާލާނެކަމަށް އަލީ ވަހީދު ވިދާޅުވެއްޖެއެވެ.
ޓޫރިޒަމް މިނިސްޓަރު ކަމުގައި ހުންނެވިއިރު އެ މިނިސްޓްރީގައި މަސައްކަތް ކުރި އަންހެނުންތަކަކަށް ޖިންސީ ގޯނާ ކުރިކަމުގެ ތުހުމަތު އަލީ ވަހީދުގެ މައްޗަށް ކުރެވުނީ 2021 ގައެވެ. އެ މައްސަލަ ފެންމަތިވީ ޓޫރިޒަމް މިނިސްޓްރީގައި މަސައްކަތް ކުރި 13 މުވައްޒަފުން އޭރުގެ ޖެންޑާ މިނިސްޓަރާ އެކު ރައީސް އޮފީހަށް ގޮސް އަލީ ވަހީދުގެ ޖިންސީ ގޯނާގެ މައްސަލަ ރައީސްއަށް ކިޔައިދިނުމުންނެވެ. އެއާއެކު އެމައްސަލައިގެ ތަހުގީގު ފެށި އަލީ ވަހީދުގެ މައްޗަށް ދައުވާވެސް ކުރިއެވެ. އޭގެފަހުން ރާއްޖެއިން ބޭރަށް ވަޑައިގެން އެނބުރި އަލީ ވަހީދު ރާއްޖެއަށް ވަޑައިގަތީ މިދިޔަ އަހަރުއެވެ. ރިޔާސީ އިންތިޚާބު ތެރޭގައި ޖުމްހޫރީ ޕާޓީގެ ލީޑަރ ގާސިމް އިބްރާހީމްގެ އެޖެންޓެއްގެ ގޮތުގައި މަސައްކަތްކުރެއްވާ ފަހުން އެމްޑީޕީއާ ގުޅިވަޑައިގެންނެވިއެވެ. އަދި އެމްޑީޕީގެ ޓިކެޓްގައި ކުޅުދުއްފުށީ ދެކުނު ދާއިރާއަށް ވާދަކުރައްވާއިރު ދާދިފަހުން ސޯޝަލް މީޑިޔާގައި ވަނީ މިތަހުގީގުގެ ބަޔާންތައް ލީކުކޮށްލާފައެވެ.
ކުޅުދުއްފުށީގައި ބުރާސްފަތި ދުވަހުގެ ރޭ އަލީ ވަހީދު ބޭއްވެވި "ވަތަނީ ބާރާއި ހައްގުވި މިންވަރު" ކެމްޕެއިންގައި ވާހަކަ ދައްކަވަމުން ވިދާޅުވީ މިސަރުކާރުން އެންމެ ޖެހިލުންވާ އެކަކީ އޭނާކަން ވޭތުވެދިޔަ ދެތިން ހަފްތާގައި ކުރިޔަށްގެންދިޔަ އެންޓިކެމްޕެއިނުން އެނގިވަޑައިގަންނަވާކަމަށެވެ. އަދި އޭނާގެ މައްޗަށް ކުރެވޭ ތުހުމަތުތައް ސާފުވާންޖެހޭކަމަށާއި އަބަދު ދޮގު ހެދުމުގެ ޖާގަ ނުދޭނެކަމަށް ވިދާޅުވިއެވެ.
އަލީ ވަހީދު ވިދާޅުވީ ލީކުކޮށްލާފައިވާ ތަހުގީގު ރިޕޯޓުން ތުހުމަތުކުރާ 13 މީހުންގެ ނަން ދައްކައިފިކަމަށްވާނަމަވެސް ވޯޓު ލުމުގެ ކުރިން އޭނާގެ ނަން އަނބުރާ ނަގާނެކަމަށެވެ. އަދި ޖިންސީ ކުށުގެ ޤާނޫނު ބުނާގޮތުން މީހަކަށް އެފަދަ އަނިޔާއެއް ދީފިނަމަ ޑޮކްޓަރަށް ދައްކަންޖެހޭ އެމީހަކަށް ލިބުނު އަނިޔާ ސާފުވާންޖެހޭކަމަށެވެ.
އަލީ ވަހީދު ވިދާޅުވީ އޭނާއާ ދެން މިއިންތިޚާބުގައި ވާދަކުރާ ޕީއެންސީގެ ކެންޑިޑޭޓް މިއިންތިޚާބުގައި ކުރެއްވިހާވެސް ކަމަކީ އެންޓި ކެމްޕެއިން ކުރުންކަމަށެވެ. ނަމަވެސް އަލީ ވަހީދު ނުކުމެ ހުންނެވީ އެ ކެންޑިޑޭޓާ ވާދަކުރައްވަން ނޫންކަމަށާއި ނުކުމެ ހުންނެވީ ރާއްޖޭގައި ހުރި މައްސަލަތަކާއި ކުޅުދުއްފުށީގައި ހުރި ކަންކަން ހައްލުކުރަންކަމަށެވެ.
