ދިވެހިރާއްޖޭގެ އިދާރީ ދާއިރާ ތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުން ހުށަހެޅި، ކައުންސިލުތަކުގެ ބާރުތައް ކަނޑުވާލާ ބިލު ގެ ރިޕޯޓު ފާސް ކުރަން ބުދަ ދުވަހުގެ ޖަލްސާ އަށް އެޖެންޑާ ކޮށްފި އެވެ.

ބުދަ ވިލޭރޭ މެންދަން ވުމާ ކައިރިވެފައިވަނިކޮށް މަޖިލީހުގެ އިދާރާ އިން ވަނީ މެމްބަރުންނަށް ކުރިން ފޮނުވި ބުދަ ދުވަހުގެ އެޖެންޑާ އަށް ބަދަލު ގެނެސް، މި ބިލުގެ ކޮމިޓީ ރިޕޯޓު އެޖެންޑާ ގައި ހިމެނުމަށް ފަހު އަލުން މެމްބަރުންނަށް އެޖެންޑާ ފޮނުވާފައެވެ.

ގިނަ ކައުންސިލު ތަކުންނާއި އިދިކޮޅު މައި ސިޔާސީ ޕާޓީ އެމްޑީޕީ އިން އިދިކޮޅު ހަދަމުން ދަނިކޮށް، ކަންބޮޑުވުންތަކަށް އެއްވެސް ވަރަކަށް ބެލުމެއް ނެތި، ލާމަރުކަޒީ ކޮމިޓީން ވަނީ ސަރުކާރުން ހުށަހެޅި ގޮތައް އާދައިގެ ކުދި ކުދި ބަދަލުތަކަކާ އެކު ބިލު ފާސް ކޮށްފައެވެ.

މައުލޫމާތުު ލިބިފައިވާ ގޮތުގައި ލާމަރުކަޒީ ކޮމިޓީން ބިލު ދިރާސާ ކުރި ގޮތުގެ ރިޕޯޓަށް ބުދަ ދުވަހު ވޯޓަށް އަހާ ގޮތައް ވަނީ ހަމަ ޖެހިފައެވެ.

މި ބިލަކީ މި ހަފްތާގެ ހޯމަ ދުވަހު މަޖިލީހަށް ތައާރުފް ކޮށް، ހަމަ އެ ދުވަހު ބިލަށް ބަހުސް ކޮށް، އަންގާރަ ދުވަހުގެ ރޭ ކޮމިޓީ ބޭއްވުމަށް ފަހު، ހަމަ އެރޭ ކޮމިޓީން ފާސް ކޮށް، ބުދަ ދުވަހު ތަޅުމުން ފާސް ކުރާ ގޮތައް މަސައްކަތް ކުރިއަށް ދިޔަ ބިލެއް ކަން ފާހަގަ ކުރެވެއެވެ.

ބިލަށް ޚިޔާލު ހުށަހަޅަން އާންމު ކޮށް ހުޅުވާލާފައި އޮތީ 24 ގަޑީއިރުގެ މުއްދަތަކަަށެވެ.