ޕެނަލްޓީ ނުޖަހައި ހާލަންޑް އާއި ޑެބްރޫނޭ ބޭލީ ވަރުބަލިކަމުން

ޗެމްޕިއަންސް ލީގު ފުޓްބޯޅަ މުބާރާތުގައި ރޭ ރެއާލް މެޑްރިޑް އަތުން ޕެނަލްޓީ ޖަހައިގެން 4-3އިން ބަލިވި މެޗުގައި ޕެނަލްޓީ ޖަހަން ނުބައިތިއްބައި ބައެއް ކުޅުންތެރިން ބޭލީ ކުޅުން ކުރިއަށް ނުގެންދެވިގެން ކަމަށް މެންޗެސްޓާ ސިޓީއިން ބުނެފި އެވެ.

ކޯޗު ޕެޕް ގާޑިއޯލާ ބުނީ މެޗުގެ 90 މިނެޓު ހަމަވެ އިތުރު ވަގުތުގެ 30 މިނެޓު ތެރޭގައި ފޯވަޑް އާލިން ހާލަންޑް އާއި ކެވިން ޑެބްރޫނޭ އަދި މެނުއަލް އަކަންޖީ ބޭލީ ކުޅުންތެރިން އެކަމަށް އެދުމުން ކަމަށެވެ.

ހާލަންޑްގެ ބަދަލުގައި ކުޅެން ނެރުނީ އާޖެންޓީނާގެ ފޯވަޑް ހޫލިއަން އަލްވަރާޒެވެ. އޭނާ ޕެނަލްޓީ ކާމިޔާބު ކުރި އެވެ. ޑެބްރޫނޭގެ ބަދަލުގައި ކުޅެން އެރުވީ މަޓެއޯ ކޮވަސިޗެވެ. ސިޓީގެ ދެ ވަނަ ޕެނަލްޓީ އޭނާ ޖެހުމުން ރެއާލްގެ ކީޕަރު އަންދްރޭ ލުނިން ވަނީ ދިފާއު ކޮށްފަ އެވެ. ސިޓީގެ ފަސް ޕެނަލްޓީގެ ތެރެއިން ފަހު ޕެނަލްޓީ ޖެހީ ކީޕަރު އެޑަސަން އެވެ. އޭނާ ވެސް ޕެނަލްޓީ ކާމިޔާބުކުރި އެވެ. ނަމަވެސް ބެނާޑޯ ސިލްވާގެ ޕެނަލްޓީ ލުނިން ވަނީ ފަސޭހަކަމާއެކު ދިފާއުކޮށްފަ އެވެ.

ރެއާލްގެ ކޯޗު ކާލޯ އެންޗެލޯޓީ ބުނީ އޭނާގެ ޓީމުގައި ވަރުބަލިކަމުގެ އަސަރެއްނެތް ކަމަށެވެ.