މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް ޖީގައި މެންޗެސްޓަރ ސިޓީ އިން ކުޅުނު ދެ ވަނަ މެޗުގައި އަލް އައިންގެ މައްޗަށް ބޮޑު ތަފާތަކުން ކުރި ހޯދައި، މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

މުބާރާތުގައި ސިޓީ ކުޅުނު ފުރަތަމަ މެޗުގައި ވަނީ ވައިދާޑް ކަސަބްލަންކާ އަތުން މޮޅުވެފަ އެވެ. އަދި އަލް އައިންގެ ފުރަތަަމަ މެޗުގައި އެ ޓީމު ވަނީ ޔުވެންޓަސް އަތުން ވެސް ތަފާތު ބޮޑު ނަތީޖާ އަކުން ބަލިވެފަ އެވެ.

ހޯމަ ދުވަހުގެ ފަތިހު ކުޅުނު މެޗު ސިޓީ އިން ކާމިޔާބު ކުރީ 6-0 އިންނެވެ. މެޗުގެ ފުރަތަމަ ހާފުގައި ސިޓީ އިން ތިން ލަނޑު ޖެހިއިރު، ދެ ވަނަ ހާފުގައި އެ ޓީމުން ވަނީ އަނެއް ތިން ލަނޑު ޖަހައިފަ އެވެ.

މެޗު ފަށައިގެން އަށް ވަނަ މިނެޓުގައި ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެންޓޯނިއޯ ރޫޑިގާ އެވެ. އޭގެ ފަހުން މެޗުގެ 27 ވަނަ މިނެޓުގައި ކްލައުޑިއޯ އެޗެވެރީ ވަނީ ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

އޭގެ ފަހުން މެޗުގެ ފުރަތަަމަ ހާފުގެ ފަހު ވަގުތުގައި ސިޓީ އަށް ލިބުނު ޕެނަލްޓީ ކާމިޔާބުކޮށް، އެ ޓީމުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކުރީ ނޯވޭގެ އާލިން ހާލަންޑް އެވެ.

މެޗުގެ ދެ ވަނަ ހާފުގައި، 73 ވަނަ މިނެޓުގައި ގުންޑޮގާން ވަނީ ސިޓީގެ ހަތަރު ވަނަ ލަނޑު ޖަހައިފަ އެވެ. އަދި ސިޓީގެ ފަސް ވަނަ ލަނޑު 84 ވަނަ މިނެޓުގައި ޖެހީ އޮސްކާ ބޮބް އެވެ.

މެޗުގެ ފުރިހަމަ ވަގުތު ހަމަވާން އެއް މިނެޓަށް ވެފައި ވަނިކޮށް، ސިޓީގެ ހަ ވަނަ ލަނޑު ޖެހީ ރަޔަން ޗާކީ އެވެ. އޭނާ އެ ލަނޑު ޖެހީ ހާލަންޑް ތަނަވަސްކޮށްދިން ފުރުސަތެއްގަ އެވެ. މެޗުގައި ޗާކީ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މުބާރާތުގެ ގަދަ 16 ވަނަ ބުރުން ސިޓީ ޖާގަ ހޯދިއިރު، ގުރޫޕް ސްޓޭޖުގަ ފަހު މެޗުގައި ނިކުންނާނީ ޔުވެންޓަސްއާ ދެކޮޅަށެވެ. މި ގުރޫޕުގެ އެއް ވަނަ ޓީމު ކަށަވަރު ވާނީ އެ މެޗުންނެވެ.