ލީޑު ލިބުނީތީ ބަލަހައްޓައިގެން ނުތިބޭނަން: ޒަވީ

ފުރަތަމަ ލެގުގައި ލީޑް ލިބިފައިވި ނަމަވެސް މިރޭ ކުޅޭ ކުއާޓާ ފައިނަލް މެޗުގައި ބަލަހައްޓައިގެން ނުތިބޭނެ ކަމަށް ބާސެލޯނާގެ ކޯޗު ޒަވީ ހަނާންޑޭޒް ބުނެފި އެވެ.

ޗެމްޕިއަންސް ލީގުގައި ބާސެލޯނާ މިރޭ ނުކުންނާނީ ފްރާންސްގެ ޕީއެސްޖީއާ ދެކޮޅަށެވެ. މި ދެ ޓީމު ޕީއެސްޖީގެ ދަނޑުގައި މިދިޔަ ހަފުތާގައި ކުޅުނު މެޗުން ބާސެލޯނާ މޮޅުވީ 3-2އިންނެވެ. މިހެންވެ ސެމީ ފައިނަލަށް ދިއުމުގެ އެޑްވާންޓޭޖް މިވަގުތު ބޮޑީ ބާސެލޯނާ އަށެވެ.

އޭނާ ބުނީ މެޗު ކުރީ މެޗަށްވުރެ ހުރިހާ ގޮތަކުން ވެސް އުނދަގޫވާނެ ކަމަށެވެ.

މި މެޗަށް ނުކުންނައިރު ކެޕްޓަން ސާޖިއޯ ރޮބާޓޯ އާއި ޑިފެންޑަރު އަންދްރޭސް ކްރިސްޓިއަންސެން އަށް ނުކުޅެވޭނެ އެވެ. ކްރިސްޓިއަންސެން އަކީ ކުރީ މެޗުގައި ބާސެލޯނާ މޮޅުވި ގޯލު ޖަހައިދިން ކުޅުންތެރިޔާ އެވެ. ޒަވީ ބުނީ ޓީމުގައި ބުރަކޮށް މަސައްކަތް ކުރާ ދެ ކުޅުންތެރިއަކު ނެތުމަކީ އުނދަގޫތަކެއް ދިމާވާނެ ކަމެއް ކަމަށާއި ނަމަވެސް މި މެޗުގައި ޕެޑްރީ ފަދަ ކުޅުންތެރިންނަށް ފުލްކޮށް ކުޅެވޭތީވެ އޭނާ އުފާކުރާ ކަމަށެވެ.