މުއިއްޒުގެ އަތްޕުޅަށް ބާރުތައް ދިން ވަރަކަށް އިތުރަށް އެ ބާރުތައް މުށުތެރެއަށް ލައްވައި ބާރުކުރައްވަމުން ގެންދަވާނެ: ސާލިހު
15 އެޕްރީލު 2024 | ހޯމަ 08:31ރައީސް ޑރ މުޙައްމަދު މުއިއްޒު ވެރިކަމަށް ވަޑައިގެންނެވިއިރު އެތައް އިތުރުފުޅު ހެއްދެވި
ކުރީގެ ރައީސް އިބްރާހީމް މުޙައްމަދު ސާލިހު
ރައީސް ޑރ. މުއިއްޒު އަތްޕުޅަށް ބާރުތައް ދިން ވަރަކަށް އިތުރަށް އެ ބާރުތައް މުށުތެރެއަށް ލައްވައި ބާރުކުރައްވަމުން ގެންދަވާކަމަށް ކުރީގެ ރައީސް އިބްރާހީމް މުޙައްމަދު ސާލިހު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިންތިހާބަށް ކެމްޕެއިން ކުރައްވަން ތ. ކިނބިދޫއަށް ވަޑައިގެން ދެއްކެވި ވާހަކަފުޅުގައި ރައީސް ސާލިހު ވިދާޅުވީ، މިހާރުގެ ރައީސް ޑރ މުޙައްމަދު މުއިއްޒު ވެރިކަމަށް ވަޑައިގެންނެވިއިރު އެތައް އިތުރުފުޅު ހެއްދެވި ކަމަށެވެ.
އަދި ރައީސް މުއިއްޒު އަތްޕުޅަށް ބާރުތައް ދިން ވަރަކަށް އިތުރަށް އެ ބާރުތައް މުށުތެރެއަށް ލައްވައި ބާރު ކުރައްވަމުން ގެންދަވާކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ މިހާރުވެސް ރަށްރަށުން އެ މަންޒަރު ފެންނަމުންދާކަމަށެވެ. އެގޮތުން ހިތު ހުރިހާ ގޮތަކަށް މީހުން ވަޒީފާތަކުން ކެނޑުމާއި، ނުފޫޒުގެ ބޭނުންކޮށްގެން ކެމްޕޭނަށް މުވައްޒަފުން ބޭނުން ކުރުން ފަދަ ކަންކަން މިހާރުވެސް ހިނގަމުންދާކަމަށް ރައީސް ސާލިހު ވިދާޅުވިއެވެ.
މަޖިލިސް އިންތިޚާބުގައި ވޯޓުލާއިރު ވިސްނަންޖެހޭ ކަންކަން ހުރިކަމަށްވެސް ރައީސް ސާލިހު ވިދާޅުވިއެވެ.
ރައީސް ސާލިހު ވަނީ ކުރިއަށް އޮތް މަޖިލިސް އިންތިޚާބުގައި އެމްޑީޕީގެ ކެންޑިޑޭޓުންނަށް ވޯޓު ދިނުމަށް އެދިވަޑައިގެންފައެވެ.
