ބޭންކުން ލޯނު ދޫކުރުމުގެ ސަބަބުން ރާއްޖޭގެ އެކި ކަންކޮޅުތަކުގައި މިހާރު 4000 އެނދު ތައާރަފު ކުރެވިފައިވޭ
އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލހު
އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ދޫކުރި ލޯނުން ރާއްޖޭގެ އެކި ކަންކޮޅުތަކުގައި މިހާރު 4000 އެނދު ތައާރަފު ކުރެވިފައިވާ ކަމަށާއި ނަމަވެސް މިއަދު އެބޭންކުގައި ފައިސާ ނެތް ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެެވެ.
ހުކުރު ދުވަހުގެ ރޭ އައްޑޫސިޓީގައި ކުރިއަށް ގެންދިޔަ މިސްރާބު ހަމަމަގަށް ޖަލްސާގައި ރައީސް ޞާލިހު ވިދާޅުވީ ރާއްޖޭގެ އިގްތިސާދު ކުރިއެރުވުމަށް މެދުފަންތީގެ ވިޔަފާރިތަކަށް ޚާއްސަކޮށްގެން ލޯނުތައް ދޫކުރި ކަމަށެވެ. ބޭންކެއް ހަދައި އޭގެ ދަށުން އެސްއެމްއީ ލޯނު ދޭން ތައާރަފްކުރިކަން އެމަނިކުފާނު ފާހަގަކުރެއްވިއެވެ. އަދި ވިދާޅުވީ އޭގެ ސަބަބުން ރާއްޖޭގެ ރަށްތަކުގައި ކުދިއަދި މެދު ފަންތީގެ އެތައް ވިޔަފާރިތައް ކުރިއަރައި ތަރައްގީވެގެން ދިޔަ ކަމަށެވެ.
ފުވައްމުލަކުގެ ގެސްޓްހައުސް ހިންގާ ވިޔާފަރިވެރިންނާއި ހަވާލާދެއްވައި ރައީސް ޞާލިހު ވިދާޅުވީ އެސްއެމްއީ ލޯނު ތައާރަފުވުމުގެ ކުރިން އެރަށުގައި ހުރީ 150 އަށް ވުރެ މަދު ޓޫރިސްޓު އެނދު ކަމަށާއި ނަމަވެސް އެސްއެމްއީ ލޯނު ތައާރަފުކުރި ފަހުން 350 އެނދާ ގާތްކުރާ އަދަދަކަށް އެނދު އިތުރުވެފައިވާ ކަމަށެވެ. އަދި ވިދާޅުވީ އެސްއެމްއީ ބޭންކުން ލޯނު ދޫކުރުމުގެ ސަބަބުން ރާއްޖޭގެ އެކި ކަންކޮޅުތަކުގައި މިހާރު 4000 އެނދު ތައާރަފު ކުރެވިފައިވާ ކަމަށެވެ.
ނަމަވެސް މިސަރުކާރުން އެބޭންކްގައި ހުރި ފައިސާ އެހެން ކަމަކަށް ބޭނުންކޮށްފައިވާ ކަމަށާއި، އެބޭންކްގައި ފައިސާ ނެތް ކަމަށް ރައީސް ޞާލިހު ވިދާޅުވިއެވެ. އަދި ވިދާޅުވީ އެފައިސާއަށް ހެދީ ކިހިނެތްތޯ ބަލަންޖެހޭ ކަމަށާއި، އެކަމާއި ގުޅޭގޮތުން ސަރުކާރާއި ސުވާލުކުރަންޖެހޭ ކަމަށެވެ.
އެސްއެމްއީ ބޭންކުގައި ފައިސާއެއްނެތް ކަމަށް ރައީސް ޞާލިހު ވިދާޅުވެފައިވާއިރު، އެބޭންކުން ވަނީ ވަގުތީ ގޮތުން ލޯނު ދޫކުރުން ހުއްޓާލާފައެވެ. މިމަހުގެ ތެރޭގައި ލޯނު ދޫކުރާނެ ކަމަށް ބުނެފައިވީ ނަމަވެސް އަދި ލޯނުތައް ދޫކުރަން ފަށާފައެއް ނުވެއެވެ.
މީގެ އިތުރުން ރައީސް ޞާލިހު ވިދާޅުވީ މިސަރުކާރާއެކު މިގައުމުގެ މިސްރާބު މިވަނީ ފާލުން ނެއްޓި، ހަމަމަގުން ނެއްޓިފައި ކަމަށެވެ. އަދި ހަމަމަގަށް އަޅުވަން ވަރަށް ގިނަ މަސައްކަތްތައް ކުރަންޖެހޭ ކަމަށް އެމަނިކުފާނު ވިދާޅުވިއެވެ. އެހެންކަމުން މިމަސައްކަތްތައް ކުރިއަށް ގެންދިއުމަށް މިފަހަރުގެ ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ލިބެންޖެހޭ ކަމަށް ރައީސް ޞާލިހު ވިދާޅުވިއެވެ.
