ގިނަ މަޝްރޫއުތައް ފެށޭވަރުވާނީ އަހަރުގެ ފަހުކޮޅު: ރައީސް
11 އެޕްރީލު 2024 | ބުރާސްފަތި 17:27ބޮޑެތި ނޫން މަޝްރޫއުތައް ހުންނާނީ މިހާރު ގިނަ ރަށްތަކުގައި ފެށިފައި ކަމަށް ރައީސް ވިދާޅުވި
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ބަޖެޓްގައި ހުރި ގިނަ މަޝްރޫއުތައް ފެށިގެންދާނީ މިއަހަރުގެ ފަހު ކުއާރޓާގައި ކަމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެއެވެ.
ލ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ލ. މާވަށު ރައްޔިތުންނާ ބައްދަލުކުރައްވައި ރައީސް ވިދާޅުވީ، މަޖިލީހުން ފާސްކުރި ބަޖެޓްގައި މަޝްރޫއުތަކަށް ހުރީ އެކިވަރަށް ކުދިކުދި އަދަދުތަކުން ފައިސާ ޖަހާފައި ކަމަށެވެ. އެހެންނަމަވެސް، ބެލީ ފެށެންހުރި މަޝްރޫއުތައް، މިދިޔަ ހަތަރު ފަސްމަސް ތެރޭގައިވެސް ކޮންޓްރެކްޓަރުންނާ ހަވާލުކުރެވޭތޯ ކަމަށް ރައީސް ވިދާޅުވިއެވެ. މާ ބޮޑެތި ނޫން މަޝްރޫއުތައް ހުންނާނީ މިހާރު ގިނަ ރަށްތަކުގައި ފެށިފައި ކަމަށްވެސް ރައީސް ވިދާޅުވިއެވެ.
ރައީސް މި މޭރުމުން ވާހަކަފުޅުދައްކަވަމުން އަންނައިރު، ބަޖެޓްގައި މަޝްރޫއުތައް ޖަހާފައި ހުންނަނީ ކޮންމެ އަހަރަކުވެސް ވަކިވަރަކަށެވެ. މުޅި މަޝްރޫއަށް ވާވަރަށް އެއްވެސް އަހަރެއްގައި ބަޖެޓް ފާސްކުރާއިރު ބަޖެޓްގައި ޖަހާފައެއް ނުހުރެއެވެ. ބަޖެޓްގައި ފައިސާ ނުހިމަނައިގެން މަޝްރޫއުތައް ނުފެށޭކަމަށް ރައީސް މުއިއްޒު ވިދާޅުވާއިރު، ގިނަ ރަށްރަށުގައި މިދިޔަ ސަރުކާރުން ހިންގަމުންދިޔަ މަޝްރޫއުތައް މި ސަރުކާރުން ހުއްޓާލަމުންދާތީ އެކަމުގެ ކަންބޮޑުވުން ރައްޔިތުން އަންނަނީ ފާޅުކުރަމުންނެވެ. އަދި މި ސަރުކާރުން އަލަށް ފެށި މަޝްރޫއެއް ފުށިދިއްގަރުފަޅު ހިއްކުމުގެ މަޝްރޫއު ނޫނީ ނެތްކަމަށް އިދިކޮޅު ފަރާތްތަކުން ބުނަމުންދާއިރު، އެ މަޝްރޫއުވެސް އޮތީ ހުއްޓުމަކަށް އައިސްފައެވެ.
