ސިފައިންނާއި ފުލުހުން އޯޑަރަށް ނޫން ގޮތަކަށް މަސައްކަތެއް ނުކުރާނެ، މިމައްސަލަ މަޖިލީހުން ބަލަންޖެހޭ: ރައީސް ސާލިހު

ސިފައިންނާއި ފުލުހުން އޯޑަރަށް ނޫން ގޮތަކަށް މަސައްކަތް ނުކުރާނެ ކަމަށާއި، ޕީޕަލްސް ނެޝަނަލް ފްރަންޓު އުފެއްދުމުގެ ޖަލްސާއަށް ފުލުހުން ހުރަސްއެޅި މައްސަލައާ ގުޅިގެން ފުލުހުންނަށް އަމާޒުކޮށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރެއްވި ތުހުމަތުތައް ރައްޔިތުންގެ މަޖިލީހުން ބަލަންޖެހޭ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.

ބުދަ ދުވަހުގެ ރޭ ފުވައްމުލަކު މެދު ދާއިރާގައި ބޭއްވި މިސްރާބު ހަމަ މަގަށް ޖަލްސާގައި ރައީސް ސާލިހު ވިދާޅުވީ ރާއްޖެއަށް ޑިމޮކްރަސީ ގެނައުމަށް ޚާއްސަކޮށް އެމްޑީޕީން ގާތްގަނޑަކަށް ވޭތުވެދިޔަ 20 ވަރަކަށް އަހަރު ވަރަށް ބުރަ މަސައްކަތްތަކެއް ކޮށްފައިވާ ކަމަށާއި، އެތައް ގުރުބާނީއެއް އެތައް ރައްޔިތުންނެތް ވެފައިވާ ކަމަށެވެ. ނަމަވެސް 9 އޭޕްރީލް 2024 ވީ އަންގާރަ ދުވަހުގެރޭ މާލެއިން ފެނުނީއެއް 2024 ވަނަ އަހަރު ފެންނަން ޖެހޭ ކަހަލަ މަންޒަރެއް ނޫން ކަމަށް ރައީސް ސާލިހު ވިދާޅުވިއެވެ.

ޕީއެންއެފް ޖަލްސާއަށް ފުލުހުން ހުރަސްއަޅައި، ހިނގައިދިޔަ ކަންތައްތަކުގައި ރައީސް މުއިއްޒު ދެއްކެވި ވާހަކަތަކަަށް އިޝާރާތް ކުރައްވައި ރައީސް ސާލިހު ވިދާޅުވީ އެކަމާއި ކަންބޮޑުވެވަޑައިގަންނަވާ ކަމަށެވެ. އަދި ވިދާޅުވީ މިގައުމުގެ ސިފައިން ވެސް ފުލުހުން ވެސް އޯޑަރާއި ހިލާފަށް އަމަލުނުކުރާނެ ކަމަށާއި، އެއީ ޔަގީން ކަމެއް ކަމަށެވެ.

ރައީސް ސާލިހު ވިދާޅުވީ މިމައްސަލަ ރައްޔިތުން މަޖިލީހުން ބަލަންޖެހޭ ކަމަށާއި، މިކަން ހިނގާދިޔަ ގޮތް ސާފުކުރަންޖެހޭ ކަމަށެވެ. އަދި 241 ކޮމެޓީން މިމައްސަލަ ބަލާނެ ކަމުގެ ޔަގީންކަން އެބައޮތް ކަމަށް އެމަނިކުފާނު ވިދާޅުވިއެވެ.

މިސަރުކާރާއި ގައުމަށް ވަރަށް ބޮޑަށް ފާރަވެރިވާންޖެހޭކަން ފާހަގަކުރައްވައި ރައީސް ސާލިހު ވިދާޅުވީ މިސަރުކާރު އެންމެ ފުރަތަމަ ހަމަލާ އަމާޒުވި ނޫސްވެރިންނަށް ކަމަށާއި، ނޫސްތައް ބަންދުކުރުމުގެ މަސައްކަތް ކުރި ކަމަށެވެ. ނަމަވެސް މިއަދު މިފަދަ ކަންކަން ނުހުއްޓުވޭނެ ކަމަށް ރައީސް ސާލިހު ވިދާޅުވިއެވެ.

ރައީސް ސާލިހު ވިދާޅުވީ މިއަދު ޕާޓީ ނިޒާމެއް، ސިޔާސީ ފިކުރެއް ހިޔާލު ތަފާތުވުންތަކެއް ނުހުއްޓުވޭނެ ކަމަށާއި، ކުރިއަށްދާން ޖެހޭނީ އެއަށް ޖާގަ ދީގެން ކަމަށެވެ.

ރައީސް ސާލިހު ވިދާޅުވީ ފާޑު ކިޔުމާއި، ބަސް ބުނުމުގެ ފުރުސަތު ރައްޔިތުންނަށް ނުދީ، ރައްޔިތުންގެ އަޑުނާހާ ކަމަށްވާނަމަ ތިބެންޖެހޭނީ ދުރުގައި ކަމަށެވެ.