ސިޔާސީ ގޮތުން ވަކި މީހަކަށް ގޯނާއެއް ކުރުމަށް ނުވަތަ އުނދަގުލެއް ކުރުމަށް ރައީސްގެ ފަރާތުން އެންގުމެއް ނާންނާނެކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.

ރައީސް ވިދާޅުވީ، ޤައުމުގައި ހަމަޖެހުން ޤާއިމު ކުރެއްވުމަކީ ވެރިކަމަށް ވަޑައިގެންނެވިއިރުވެސް ވެވަޑައިގެންނެވި ވައުދުފުޅެއް ކަމަށާއި، މިއަދާއި ހަމައަށްވެސް ދައްކަވަމުން ގެންދަވާ ވާހަކަފުޅަކީ އެއީ ކަމަށެވެ. އެގޮތުން ކުރީގައި ފެނިފައިވާ ގޮތަށް ބަދަލު ހިފުމުގެ ރޫހު މި ވެރިިކަމުގައި ނުގެންގުޅުއްވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ، ޕީއެންއެފްގެ ޖަލްސާގެ ކަންކަމުގައި ކަން ހިނގާ ދިޔަ ގޮތާމެދު ނުހަނު ހިތާމަ ކުރައްވާ ކަމަށެވެ.

އޭގެ އިތުރުން، ސިޔާސީ ގޮތުން ވަކި މީހަކަށް ގޯނާއެއް ކުރުމަށް ނުވަތަ އުނދަގުލެއް ކުރުމަށް ރައީސްގެ ފަރާތުން އެންގުމެއް ނާންނާނެކަމަށް ފުލުހުންނާއި، ހޯމް މިނިސްޓަރަށްވެސް އިރުޝާދު ދެއްވާފައިވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ، ކުރީގައި ފެނުނު ގޮތަށް އެސްއޯ ފުލުހުން ގޮސް ރައްޔިތުންނަށް އަނިޔާކޮށް ހިފާ ހައްޔަރުކޮށް ހަދާ މަންޒަރު ފެންނަން ބޭނުން ނުވާ ކަމަށާއި، ކުރިން އެ މަންޒަރުތައް ފެނިވަޑައިގެންފައިވާ ކަމަށެވެ.  

އެހެންކަމުން އެއްގޮތަކަށްވެސް އެސްއޯ ފުލުހުން ފޮނުވައިގެން ނުވާނެ ކަމަށާއި، އެސްއޯ ފުލުހުން އަންގަންޖެހޭ ޙާލަތު އައިސްފިނަމަ އެމަނިކުފާނަށް އެކަން އެނގިވަޑައިގަންނަވާނެކަމަށް އިރުޝާދު ދެއްވާފައިވެސް ވާނެކަމަށް ރައީސް ވިދާޅުވިއެވެ.

އެހެންނަމަވެސް ޕީއެންއެފް ޖަލްސާއަށް އެސްއޯ ފުލުހުން ވަދެ ހިނގި ކަންކަމުގެ މައުލޫމާތު އެނގިވަޑައިގަތީ ނޫސްތަކުން ކަމަށާއި، ސާފު އިރުޝާދެއް އޮއްވައި އެހެން ކަންކަން ދިއުމުން ހިތާމަ ކުރައްވާކަމަށް ރައީސް ވިދާޅުވިއެވެ.

އެކަމާ މެދު ހޯމް މިނިސްޓަރާވެސް ސުވާލު ކުރެއްވި ކަމަށާއި، ހޯމް މިނިސްޓަރުވެސް އެކަން ހިނގާ ދިޔަ ގޮތް ބައްލަވާނެކަމަށް ވިދާޅުވިކަމަށް ރައީސް ފާހަގަ ކުރެއްވިއެވެ.

އެސްއޯ ފުލުހުން ދާން ޖެހުނީ ކާކުގެ އިރުޝާދެއްގެ ދަށުންތޯ ކޮމިޝަނަރު އަރިހުންވެސް ސުވާލު ކުރައްވާފައިވާނެ ކަމަށާއި، އެކަމުގެ ތަހުގީގު ރިޕޯޓު ބުދަ ދުވަހުގެ އިރު އޮއްސެންވާއިރަށް ލިބެންޖެހޭނެކަމަށް އަންގަވާފައިވާނެކަމަށް ރައީސް ވިދާޅުވިއެވެ.

ރިޕޯޓު ލިބިވަޑައިގަތުމުން އަޅުއްވަންޖެހޭ ފިޔަވަޅުތައް އަޅުއްވާނެކަމަށް ރައީސް ވިދާޅުވިއެވެ.