މަޖިލީހުގެ މެޖޯރިޓީ ލިިބިއްޖެނަމަ މި ސަރުކާރުން އިދިކޮޅު ސިޔާސީ ހަރަކާތްތައް ނައްތާލުމުގެ މަސައްކަތް ރާވައިގެން ކުރަމުން ގެންދާނެ - އީސަ
10 އެޕްރީލު 2024 | ބުދަ 04:15ސިޔާސީ ޕާޓީތައް އުފައްދާ ހިންގުމަކީ ހަމަހަމަކޮށް އެންމެންނަށް ލިބިދީފައިވާ ހައްގެއް
"މިސްރާބު ހަމަމަގަށް" ގެ ތަރުޖަމާން އަދި މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ
މަޖިލީހުގެ މެޖޯރިޓީ ލިިބިއްޖެނަމަ މި ސަރުކާރުން އިދިކޮޅު ސިޔާސީ ހަރަކާތްތައް ނައްތާލުމުގެ މަސައްކަތް ރާވައިގެން ކުރަމުން ގެންދާނެ ކަމަށް "މިސްރާބު ހަމަމަގަށް" ގެ ތަރުޖަމާން އަދި މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
"މިސްރާބު ހަމަމަގަށް" ގެ ތަރުޖަމާން އަދި މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވީ ޕީއެންއެފް އުފައްދަން ކުރި މަސައްކަތަށް ސަަލާމަތީ ބާރުތައް ނެރެގެން ސަރުކާރުން ހުރަސް އެޅުމަކީ އެމްޑީޕީން ކަންބޮޑުވާ ކަމެއް ކަމަށެވެ. ހާއްސަކޮށް އެމްޑީޕީއަކީ އަބަދުވެސް ސުލްހަވެރި ސިޔާސީ ހަރަކާތްތަކަށް ވަކާލާތު ކުރި ޕާޓިއެއް ކަމަށާއި، ސިޔާސީ ޕާޓީތައް އުފައްދާ ހިންގުމަކީ ހަމަހަމަކޮށް އެންމެންނަށް ލިބިދީފައިވާ ހައްގެއް ކަމަށާއި، ގާނޫނު އަސާސީން ކަށަވަރުކޮށްދީފައިވާ ހައްގެއް ކަމަށެވެ.
އީސަ ވިދާޅުވީ ޕީއެންއެފް އުފައްދަން ގާނޫނުގައި ބުނާ ކަންކަން ފުރިހަމަކުރުމަށް ކުރަމުން ދިޔަ މަސައްކަތަށް ސަލާމަތީ ބާރުތައް ނެރެ ހުރަސްއަޅަން ކުރި މަސައްކަތަކީ އެއީ ހުދުމުހުތާރުކަމުގެ ހައްދުފަހަނައެޅި ސިފައެއް ކަމަށެވެ. އަދި އެކަމުން ޔަގީންވާ ކަމަކީ މި ސަރުކާރަކީ ޑިމޮކްރަޓިކް ހަމަތަކުގެ މަތިން ހިނގާ ސުލްހަވެރި ސިޔާސީ ހަރަކާތްތަކަށް ފުރުސަތުދޭނެ ސަރުކާރެއް ނޫން ކަމަށެވެ. މީގެ އިތުރުން ކުރިއަށް އޮތް ރައްޔިތުންގެ މަޖިލީހުގެ މެޖޯރިޓީ މި ސަރުކާރަށް ލިބިއްޖެނަމަ، އިދިކޮޅު ސިޔާސީ ހަރަކާތްތައް ނައްތާލުމުގެ މަސައްކަތް ރާވައިގެން ކުރަމުން ގެންދާނެ ކަމަށެވެ.
ކުރީގެ ރައީސް އަބްދުﷲ ޔާމީން އަބްދުލް ގައްޔޫމް އިސްކޮށް ހުންނަވައިގެން (ޕީޕަލްސް ނޭޝަނަލް ފްރަންޓް) އުފެއްދުމަށް ބާއްވަންޖެހޭ ޖަލްސާއަށް މިސަރުކާރުން ހުރަސްއަޅަމުންދަނީ ސަރުކާރުން ބިރު ގަންނާތީކަމަށް މައި އެމްޑީޕީން ވަނީ ބުނެފައެވެ.
އަންގާރަ ދުވަހުގެރޭ 9:15 ގައި ބޭއްވުމަށް ހަމަޖެހިފައިވާ ޖަލްސާ ނުބޭއްވިފައިވަނީ ޖަލްސާ ބޭއްވުމަށް ހަމަޖެހިފައިވާ ޣިޔާސުއްދީން ސްކޫލަށް ނުވަދެވޭގޮތަށް ފުލުހުން ހުރަސްއަޅާފައިވާތީއެވެ.
