އާސެނަލް އާއި ބަޔާންގެ ކުރިމަތިލުން ހަމަހަމަ

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި އާސެނަލް އާއި ބަޔާން މިއުނިކް ބައްދަލު ކުރި މެޗު އެއްވަރުވެގެން ނިމިއްޖެ އެވެ.

އާސެނަލްގެ އެމިރޭޓްސް ސްޓޭޑިއަމްގައި އަންގާރަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރުވެގެންނެވެ. މެޗުގައި އާސެނަލުން ލީޑު ނަގާފައި ވަނިކޮށް، ބަޔާނުން ނަތީޖާ ހަމަހަމަކޮށް ލީޑު ވެސް ނެގި އެވެ. ނަމަވެސް އާސެނަލުން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 12 ވަނަ މިނެޓުގައި އާސެނަލުން ވަނީ ލަނޑު ޖަހައި ލީޑު ނަގައިފަ އެވެ. ބެން ވައިޓް ތަނަވަސްކޮށްދިން ފުރުސަތެއްގައި އާސެނަލަށް ލީޑު ނަގައިދިނީ ބުކާޔޯ ސަކާ އެވެ. ނަމަވެސް، އޭގެ ފަސް މިނެޓު ފަހުން ބަޔާނުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ސާޖް ގްނަބްރީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ލިއޯން ގޮރެޓްޒްކާ އެވެ.

މެޗުގެ ފުރަތަމަ ހާފު ނިމުމުގެ ކުރިން ބަޔާނުން ލީޑު ވެސް ނެގި އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް، ލީޑު ނަގައިދިނީ އިންގްލެންޑުގެ ފޯވާޑް ހެރީ ކޭން އެވެ. އާސެނަލުން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. މެޗުގެ 76 ވަނަ މިނެޓުގައި ގަބްރިއަލް ޖީސޫސް ތަނަވަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިނީ ލިއާންޑްރޯ ޓްރޮސާޑް އެވެ.

މި ދެ ޓީމުގެ ފުރަތަމަ ލެގު އެއްވަރުވެފައިވާއިރު، ދެ ވަނަ ލެގު އޮންނާނީ މި މަހުގެ 17 ވަނަ ދުވަހުގެ ރޭ ބަޔާންގެ ދަނޑުގަ އެވެ. މުބާރާތުގެ ސެމީ ފައިނަލުން ޖާގަ ލިބޭނީ އެ މެޗުން މޮޅުވާ ޓީމަކަށެވެ.