ޖުމްހޫރީ މައިދާނުގެ ފެންއަރުވާވަޑާން މަރާމާތުކުރުމުގައި ކޮރަޕްޝަންގެ ބޮޑެތި އަމަލުތަކެއް ހިންގާފައި އެބަހުރި، މައްސަލަ ބަލަން ޖެހޭ - އީސަ
ރައީސް މުއިއްޒު އާއި އެމަނިކުފާނުގެ އަރިސް ބޭފުޅަކު ކޮރަޕްޝަންގެ އަމަލުތައް ހިންގަވާފައިވާ ކަަމަށް އީސަ ތުހުމަތުކުރެއްވި
ރައްޔިތުންގެ މަޖިލީހަށް އެމްޑީޕީން ކުރިއަށް ގެންދާ މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ކެނދިކުޅުދޫ ދާއިރާގެ މެންބަރު އަހުމަދު އީސަ
ޖުމްހޫރީ މައިދާނުގެ ފެންއަރުވާވަޑާން މަރާމާތުކުރުމުގައި ކޮރަޕްޝަންގެ ބޮޑެތި އަމަލުތަކެއް ހިންގާފައި އެބަ ހުރި ކަމަށާއި އެ މައްސަލަ ބަލަން ޖެހޭ ކަމަށް ރައްޔިތުންގެ މަޖިލީހަށް އެމްޑީޕީން ކުރިއަށް ގެންދާ މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
މެންބަރު އީސަ މިހެން ވިދާޅުވީ ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. ޖުމްހޫރީ މައިދާނުގެ ފެންއަރުވާވަޑާން މަރާމާތުކުރުމުގެ މަސައްކަތް ކޮށްފައި ވަނީ ބަޖެޓްކުރުމެއް ނެތި ސިންގަލް ސޯސްކޮށް އެމްޓީސީސީ އާއި ހަވާލުކޮށްގެން ކަމަށް މައުލޫމާތުލިބިވަޑައިގެންފައިވާ ކަަމަށާއި އެމްޓީސީސީން އެ މަސައްކަތް ހަވާލު ކުރީ ރައީސް އޮފީހުގެ ވަޒީރެއްގެ ކޮންޓްރޯލް އޮތް ކުންފުންޏަކާ ކަމަށް ވެސް މެންބަރު އީސަ ވިދާޅުވިއެވެ. އަދި އެ މަސައްކަތް ހަވާލުކުރީ 5.5 މިލިއަން ރުފިޔާގެ ޕްރޮޖެކްޓެއްގެ ގޮތުގައި ކަމަށް ވެސް އޭނާ ވިދާޅުވިއެވެ. އަދި މިހާރު އެ މަސައްކަތް ކުރަމުން ދަނީ އެމްޓީސީސީގެ މުވައްޒަފުން ލައްވާ ސީއެސްއާރު ޕްރޮޖެކްޓެއްގެ ގޮތުގައި ކަމަށް އީސަ ވިދާޅުވިއެވެ.
މީގެ ކުރިން ވެސް ރައީސް މުއިއްޒު އާއި އެމަނިކުފާނުގެ އަރިސް ބޭފުޅަކު ކޮރަޕްޝަންގެ އަމަލުތައް ހިންގަވާފައިވާ ކަަމަށް އީސަ ވިދާޅުވިއެވެ. އެގޮތުން ރައީސް ޑރ. މުއިއްޒު މާލޭގެ މޭޔަރު ކަމުގައި ހުންނެވި އިރު އަރިސް ބޭފުޅެއްގެ މަދަދުވެރިކަމާއެކު ކޮރަޕްޝަންގެ ބޮޑެތި އަމަލުތަކެއް ހިންގަވާފައިވާ ކަަމަށް އީސަ ވިދާޅުވިއެވެ.
މީގެއިތުރުން މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އީސަ ވިދާޅުވީ މި ސަރުކާރުން ދަނީ ކޮރަޕްޝަނާއި އޮޅުވާލުމުގެ އެތައް އަމަލެއް ހިންގަމުން ކަމަށެވެ. އަދި މިކަމާއި މެދު އިންތިހާ އަށް ކަންބޮޑުވެވަޑައިގަންނަވާ ކަމަށާއި އީދާއި ގުޅިގެން އިސްލާމީވަންތަ ދިއްލުންތަކެއް ރާއްޖޭގައި ހަރުކުރާ ކަމަށް ބުނެ މި ސަރުކާރުން އޮޅުވާލާފައިވާ ކަމަށް ވެސް އޭނާ ވިދާޅުވިއެވެ. އަދި މި ދިއްލުންތަކުގައި ބޭނުންކުރާ ބޮކިތަކަކީ އޭގެ އަގާ ނުބައްދަލު ކޮލިޓީ ދަށް ބޮކިތަކެއް ކަމަށް ވެސް އޭނާ ވިދާޅުވިއެވެ.
