ޕީއެންއެފް އުފެއްދުމުގެ ޖަލްސާގައި ޔާމީން ބައިވެރިވެވަޑައިގަންނަވާ، ކަރެކްޝަންސްއިން ބުނަނީ ހުއްދަދިންކަން އެނގިފައި ނެތްކަމަށް
އެކަމުގެ އިތުރު ތަފްސީލެއް ކަރެކްޝަންސްއިން ދީފައެއް ނުވޭ
ޔާމީން ހުޅުމާލޭގައި އޮތް ކެމްޕެއިން ހަރަކާތެއްގައި
ޕީޕަލްސް ނެޝަނަލް ފްރަންޓް (ޕީއެންފް) އުފެއްދުމަށް ބާއްވާ ޖަލްސާގައި ކުރީގެ ރައީސް އަބްދުﷲ ޔާމީން ބައިވެރިވެވަޑައިގަންނަވާނެ ކަމަށް އެ ޕާޓީން ބުނެފިއެވެ.
ޖަލްސާގައި ބައިވެރިވެވަޑައިގަތުމުގެ ހުއްދައަކަށް ކުރީގެ ރައީސް އަބްދުﷲ ޔާމީން އެދިވަޑައިގެންފައިވާއިރު، އެކަމާ ގުޅޭގޮތުން މައުލޫމާތު ހޯދުމަށް ރާއްޖެއެމްވީން ފުރަތަމަ ގުޅާލުމުން ކަރެކްޝަންސްއިން ބުނީ ހުއްދަ ދިންތޯ ނުވަތަ ނުދޭތޯ ޔާމީނުގެ ފަރާތުން ސާފުކުރުމަށް އެދޭކަމަށާއި، ކަރެކްޝަންސްގެ ޖަވާބު ޔާމީނަށް ދީފައިވާނެ ކަމަށެވެ.
ރާއްޖެއެމްވީން ސުވާލު ދެންނެވުމުން، އެ ޕާޓީ އުފެއްދުމުގައި އިސްކޮށް ހަރަކާތްތެރިވާ މަލީހު ޖަމާލް ވިދާޅުވީ ރައީސް ޔާމީނަށް ޖަލްސާގައި ބައިވެރިވެވަޑައިގަތުމުގެ ހުއްދަ ލިބިވަޑައިގެންފައި ވާކަމަށެވެ.
އެހެންކަމުން، ޖަލު ހުކުމެއްގައި ހުންނަވާ ބޭފުޅަކު ސިޔާސީ ޕާޓީއެއް އުފެއްދުމުގެ ރަސްމީ ޖަލްސާގައި ބައިވެރިވުމުގެ ހުއްދަ ދެވިފައިވަނީ ކޮން އުސޫލަކުންތޯ ރާއްޖެއެމްވީން ކަރެކްޝަންސްގައި ސުވާލުކުރުމުން ކަރެކްޝަންސްގެ މީޑިއާ ހެޑް އަހުމަދު ނަސީމް ވިދާޅުވީ، ޔާމީނަށް ޖަލްސާގައި ބައިވެރިވުމުގެ ހުއްދަ ދީފައިވާކަމުގެ މައުލޫމާތު ލިބިވަޑައިގެންފައި ނުވާކަމަށެވެ.
އެކަމާ ގުޅޭގޮތުން ރާއްޖެއެމްވީން ސުވާލު ދެންނެވުމުން މަލީހު ވިދާޅުވީ، ޔާމީނު ޖަލްސާގައި ބައިވެރިވެވަޑައިގަންނަވާނެ ކަމަށެވެ. ޔާމީނަށް ޖަލްސާގައި ބައިވެރިވުމުގެ ހުއްދަ ލިބިވަޑައިގެންފައިވޭތޯ ނުވަތަ ނޫންތޯ ދެންނެވުމުން މަލީހު ވިދާޅުވީ، އެކަން ކަރެކްޝަންސްއިން ސާފު ކުރުމަށެވެ. އެކަމުގެ އިތުރު ތަފްސީލެއް މަލީހުވެސް ހާމަކުރައްވާފައެއް ނުވެއެވެ.
ސިޔާސީ ޕާޓީތަކާއި ޖަމްއިއްޔާތަކަށް އާންމު މެމްބަރެއްގެ ހައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލުވެރި ފަރާތެއްގެ ގޮތުގައި ހުރުމާއި، އެ ތަންތަނުން ހިންގާ ހަރަކާތްތަކުގައި ބައިވެރިވުމުގެ ހައްގުވެސް، ހުކުމެއް ތަންފީޒު ކުރުމަށްޓަކައި ޖަލުގައި ބަންދުކޮށްފައި ހުންނަ މުއްދަތުގައި ލިބިގެން ނުވާކަމަށް، ޖަލުތަކާއި ޕެރޯލް ގާނޫނުގައި ވަނީ ބަޔާންކޮށްފައެވެ.
