އިންޑިއާ އަށް ބަރޯސާ ނުވުމާއި، މޯދީ ބަޣާވާތް ކުރާ ކަމަށް ގޮވާލި ޚަލީލަށް މިއަދު އިންޑިއާ އާއި މޯދީ އަކީ ރަނެއް މަލެއް ފަދަ ޖަވާހިރެއް؟

ދައްކަން މި އުޅެނީ އާދައިގެ މީހެއްގެ ވާހަކައެއް ނޫނެވެ. މި ރާއްޖޭގެ ޚާރިޖީ ވަޒީރުގެ މަގާމުގައި ހުންނެވި ޑޮކްޓަރު ޢަބްދުﷲ ޚަލީލްގެ ވާހަކަ އެވެ. މިއަދު، ރާއްޖޭގެ މިނިވަން ދުވަަސް ފާހަގަ ކުރަން އިންޑިއާގެ ބޮޑު ވަޒީރު ނަރެންދްރަ މޯދީ ރާއްޖެ ގެންނަވާއިރު، ޚަލީލް އަށް އިސް އުފުލާލައިގެން ހުންނަން ކެރޭތީ ވެސް އަޅުގަނޑު ހައިރާންވެ އެވެ. ޚަލީލް އަކީ އިންޑިއާ އާއި، މޯދީ އަށް އެވަރަށް އެއްޗެހި ކިޔުއްވާފައި ހުންނެވި ބޭފުޅެކެވެ.

މާ ދިގު ކުރުމުގެ ބޭނުމެއް ވެސް ނެތެވެ. ސީދާ ވާހަކަތަކުން ފަށާނަމެވެ. މިއަދު ވެސް ޚަލީލްގެ ރަސްމީ އެކްސް އެކައުންޓުގައި އެ ޕޯސްޓުތައް އެ ހުރީ ފެންނާށެވެ. ދެން މިއަދު އެ ޕޯސްޓުތައް ޑިލީޓު ކުރައްވާކަށް ވެސް ކެރިވަޑައި ނުގަންނަވާނެކަން ކަށަވަރެވެ. ބޮލުގައި ފޮށާ އެޅި، ދުނިޔޭގެ ލަދެއްގައި ބެދިފައި ހުންނެވި އެންމެ ބޮޑު އެއް ބޭފުޅަކަށް ޚަލީލް ވާނެ އެވެ.

2013 ވަނަ އަހަރުގެ އޮކްޓޯބަރު މަހުގެ އަށް ވަނަ ދުވަހު ޑޮކްޓަރު ޢަބްދުﷲ ޚަލީލް އެމަނިކުފާނުގެ އެކްސް އެކައުންޓުގައި ޕޯސްޓުކޮށްފައި އޮތެވެ. "ރާއްޖެ އިން އިންޑިއާ އަށް ބާރޯސާވުން ކުޑަ ކުރަން ދަސް ކުރަަން ޖެހޭ" މިހެންނެވެ. މިއީ ކުރީގެ ރައީސް ޑޮކްޓަރު މުޙައްމަދު ވަޙީދު ޙަސަން މަނިކުގެ ވެރިކަމުގައި ޚަލީލް ކުރެއްވި ޕޯސްޓެކެވެ. އަދި އެ އަހަރު އޮތް ރިޔާސީ އިންތިޚާބުގެ ދުވަސްކޮޅު ވެސްމެ އެވެ.

އޭގެ ފަހުން ރައީސް ޢަބްދުﷲ ޔާމީންގެ ވެރިކަމުގައި، 2018 ވަނަ އަހަރުގެ ފެބްރުއަރީ މަހުގެ ފަސް ވަނަ ދުވަހު ވަޒީރު ޚަލީލް އެމަނިކުފާނުގެ ރަސްމީ އެކްސް އެކައުންޓުގައި ލިޔުއްވާފައިވެ އެވެ. "ނަރެންދްރަ މޯދީ އުޅުއްވަނީ ރާއްޖޭގައި ބަޣާވާތެއް ހިންގަން ހެއްޔެވެ؟" މިއީ 18 ވަނަ ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރަކަށް ޑޮކްޓަރު ޚަލީލް ހުންނެވިއިރު ކުރައްވާފައި އޮތް ޕޯސްޓެކެވެ.

2018 ވަނަ އަހަރު އޮތް ރިޔާސީ އިންތިޚާބުގައި ރައީސް ޔާމީންގެ މައްޗަށް ކުރި ހޯއްދަވައި، އިންތިޚާބު ކާމިޔާބު ކުރެއްވީ ކުރީގެ ރައީސް އިބްރާހީމް މުޙައްމަދު ޞާލިޙު (އިބޫ) އެވެ. ރައީސް ޞާލިޙު ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެ ވަޑައިގެންނެވި އެވެ. އެކަމަށް ވެސް ފާޑު ވިދާޅުވެ ޚަލީލް ވަނީ ވާހަކަ ދައްކަވައިފަ އެވެ. ޚަލީލް ވިދާޅުވެފައި އޮތީ، "މޯދީ ރާއްޖެ ވަޑައިގަތީ ޑީލެއްގެ ދަށުން، ނުރައްކަލުގެ ރަނގަބީލުގެ އަޑު އިވެން ފަށައިފި" މިހެންނެވެ.

މިއީ ރާއްޖޭގެ ޚާރިޖީ ވަޒީރު ޚަލީލް ކޮށްފައިވާ ޕޯސްޓުތަކެވެ. ނަމަވެސް، މިހާރު ޚަލީލް ވިދާޅުވަމުން ގެންދަވަނީ މޯދީ ރާއްޖެ ވަޑައިގަންނަވަނީ ދިވެހި ޤައުމާއި، ދިވެހި ރައްޔިތުންގެ ލާބަ އާއި މަންފާ އަށް ކަމަށެވެ. އަދި އެއީ އިންޑިއާ އާއި، ރާއްޖެއާ ދެމެދު އޮތް ޒަމާންވީ ގާތް ގުޅުން ރަމްޒުކޮށްދޭ ކަމެއް ކަމަށް ވެސް ވިދާޅުވީ، މީގެ ކުރިން މޯދީ ބަޣާވަތް ކުރަން އުޅުނު ކަމަށް ވިދާޅުވި ޚަލީލް އެވެ.

ދައްކާނެ ވާހަކައެއް ނެތެވެ. ދައްކަވަން ހުރި ތަނެއް ދައްކަވާނެ އެވެ. މިފަހަރު މޯދީ ރާއްޖެ ވަޑައިގެންނެވުމުގެ ދައުވަތު ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ފަރާތްޕުޅުން އިންޑިއާ ސަރުކާރަށް އެރުވީ، އިންޑިއާ އަށް ބަރޯސާވުން ކުޑަ ކުރަން ޖެހޭ ކަމަށާއި، މޯދީ ރާއްޖެ ވަޑައިގެންނެވީ ޑީލެއްގެ ދަށުން ކަމަށް އިހަށް ދުވަހު ވިދާޅުވި ޚަލީލް އެވެ.