ޔުނައިޓެޑް މޮޅަށް ކުޅޭ، ނަތީޖާ ސުމެއް: ކޯޗު

މެންޗެސްޓަރ ޔުނައިޓެޑުން ކޮންމެ މެޗެއްގައި ވެސް މޮޅަށް ކުޅޭ ކަމަށާއި ނަމަވެސް ނަތީޖާ ނުނެރެވޭތީވެ ކޯޗު އެރިކް ޓެން ހާގް ކަންބޮޑުވުން ފާޅުކޮށްފި އެވެ.

އޭނާ މިހެން ބުނީ ބުރާސްފަތި ދުވަހުގެ ރޭ ޗެލްސީ އަތުން ފަހު ވަގުތު 4-3އިން ބަލިވުމުންނެވެ. މި މެޗުގެ ފުރަތަމަ ދެ ގޯލު ޖެހީ ޗެލްސީ އެވެ. އޭގެ ފަހުން ޔުނައިޓެޑުން ތިން ލަނޑު ޖަހައި ލީޑް ހޯދި ފަހުން ޗެލްސީން ނަތީޖާ ހަމަހަމަކޮށް މޮޅުވި ގޯލު ޖެހީ ފަހު މިނެޓުގަ އެވެ.

އޭނާ ބުނީ ފަސް ފުވަސް ތެރޭގައި އޭނާގެ ޓީމު އަތުން ފަސް ޕޮއިންޓު ގެއްލިއްޖެ ކަމަށާއި މިހެންވާނަމަ ކުޅުންތެރިން ޗެމްޕިއަންސް ލީގު ފުޓްބޯޅަ މުބާރާތް ކުޅެން އުއްމީދުކޮށްގެން ނުވާނެ ކަމަށެވެ.

ޔުނައިޓެޑަށް ދެން އޮތީ އާދީއްތަ ދުވަހު ޓޭބަލުގެ އެއްވަނައިގައިވާ ލިވަޕޫލާ ދެކޮޅަށް ކުޅޭ މެޗެވެ. ޓެން ހާގް ބުނީ އެއީ ވަރުގަދަ މެޗަކަށްވާނެ ކަމަށާއި މި މެޗުގައި ކުޅުންތެރިންގެ ފަރާތުން ފެނުނު ހިތްވަރާއި ޖޯޝް އެ މެޗުގައި ވެސް ދައްކަންޖެހޭ ކަމަށެވެ.

ޔުނައިޓެޑް މިވަގުތު އޮތީ 48 ޕޮއިންޓާއެކު ހަ ވަނައިގަ އެވެ. މިހެންވެ ކޯޗު ބުނީ ޗެމްޕިއަންސް ލީގު ކުޅެން ފުރުސަތު ލިބޭ ލީގުގެ ގަދަ ހަތަރެއްގެ ތެރެއަށް ވަނުމުގެ ފުރުސަތު މުޅިން ގެއްލިއްޖެ ކަމަށް ބުނަން އަދި ނޭނގޭ ކަމަށެވެ.