މަޝްރޫއުތައް ކުރިއަށް ގެންދަންވީ އެންމެ 74 ރަށުގައި އެކަންޏެއް ނޫން، ހުރިހާ ރަށެއްގައި ކުރިއަށް ގެންދަންޖެހޭ: ރައީސް ޞާލިހު
ފަސް އަހަރު ނިމިނުއިރު ފެނާއި ނަރުދަމާގެ 48 ރަށުގެ މަޝްރޫއު ވަނީ ނިމިފައި
އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވާހަކަފުޅު ދައްކަވަނީ
ތަރައްގީގެ މަޝްރޫއުތައް ކުރިއަށް ގެންދަންވީ އެންމެ 74 ރަށުގައި އެކަނި ނޫން ކަމަށާއި، އެކިއެކި ރަށްރަށުގައި ފަށާފައިވާ ހުރިހާ މަޝްރޫއުތައް ކުރިއަށް ގެންދަންޖެހޭ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ ފެނާއި ނަރުދަމާގެ މަޝްރޫއަކީ މީހުން ދިރިއުޅޭ ހުރިހާ ރަށެއްގައި ފެށި މަޝްރޫއެއް ކަމަށާއި، އެއްވެސް ރައްޔިތެއް ތަފާތު ކުރުމެއް ނެތި ޚިދުމަތްތައް ދިނުމަށް ކުރިއަށް ގެންދިޔަ މަޝްރޫއެއް ކަމަށެވެ. އެގޮތުން ފަސް އަހަރު ނިމިނުއިރު ފެނާއި ނަރުދަމާގެ 48 ރަށުގެ މަޝްރޫއު ނިމިފައިވާ ކަމަށާއި، 98 ރަށުގެ މަސައްކަތް ނިމުމާއި ގާތްވެފައިވާ ކަމަށް ރައީސް ސާލިހު ވިދާޅުވިއެވެ.
ޖުމްލަ 74 ފެނާ ނަރުދަމާގެ މަޝްރޫއު ހިނގަމުންދާކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވާތީ އެކަމަށް ރައްދުދެއްވައި ރައީސް ސާލިހު ވިދާޅުވީ މަސައްކަތް ކުރިއަށް ގެންދަންވީ 74 ރަށުގައި އެކަނި ނޫން ކަމަށާއި ހުރިހާ ރަށެއްގައި މަސައްކަތްތައް ކުރިއަށް ގެންދަން ޖެހޭ ކަމަށެވެ. ބަނދަރުގެ މަޝްރޫއަށް އިޝާރާތް ކުރައްވައި ރައީސް ސާލިހު ވިދާޅުވީ ވެރިކަމުން ފޭބިއިރު، 52 މަޝްރޫއު ނިމިފައިވާ ކަމަށާއި، އޭރު ވެސް 42 ބަނދަރެއްގެ މަޝްރޫއު ކުރިއަށްދާ ކަމަށެވެ.
މިވޭތުވެދިޔަ 3 މަސްދުވަސްތެރޭގައި ޕީއެސްއައިޕީގެ މަޝްރޫއުތަކަށް 1.1 ބިލިއަން ރުފިޔާ ލޯނެއް ނުނަގާ ހަރަދުކޮށްފައިވާ ކަމަށް ރައީސް މުއިއްޒު ވިދާޅުވެފައިވާތީ އެކަމަށް ވެސް ރައީސް ސާލިހު ވަނީ ރައްދުދެއްވާފައެވެ. އެމަނިކުފާނު ވިދާޅުވީ 1.1 ބިލިއަން ރުފިޔާގެ ތެރެއިން 70 އިންސައްތައަކީ ކުރީ ދައުރުގައި ހޯދާފައިވާ ލޯނުގެ ތެރެއިން ހިންގާ މަޝްރޫއުތައް ކަމަށެވެ.
ރައީސް ސާލިހު ވިދާޅުވީ އަދިވެސް މިސަރުކާރުން މަސައްކަތް ކުރަނީ ދޮގުހަދައި ރައްޔިތުންނަށް އޮޅުވާލުމަށް ކަމަށެވެ.
މިސަބަބުތަކާއި ގުޅިގެން ރާއްޖެ ހަމަމަގަށް އެޅުމަށް ކުރިއަށް އޮތް ރައްޔިތުން މަޖިލީހުގެ މެޖޯރިޓީ އެމްޑީޕީއަށް ލިބެންޖެހޭ ކަމަށެވެ. ރައްޔިތުންނަށް ސީދާ ފައިދާ ލިބޭކަންކަން ކުރަމުންދާނީ އެމްޑީޕީން ކަމަށާއި، ސިޔާސަތުތައް ބަންޓަން ކުރެވިފައިވަނީ އެގޮތަށް ކަމަށް އެމަނިކުފާނު ވިދާޅުވިއެވެ.
