ކޯޓުތަކުން ނިންމާ މައްސަލަތަކުގެ ތަހުގީގާ ގުޅޭ މައުލޫމާތު ހާމަކުރަން ނިންމީ ކޯޓުތަކަށް ގޮންޖެހުމުގެ ނިޔަތުގައެއް ނޫން: މިނިސްޓަރު އިހުސާން
4 އެޕްރީލު 2024 | ބުރާސްފަތި 12:09ފުލުހުން ތަހުގީގެއް ނިންމަނީ ވަރަށް ބުރަ މަސައްކަތުން
މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ ޢިޙްސާން
ކޯޓުތަކުން ނިންމާ ހުރިހާ ބޮޑެތި މައްސަލަތަކާއި ގުޅިގެންވެސް އެ މައްސަލައެއްގެ ތަހުގީގާ ގުޅޭ މައުލޫމާތު ފުލުހުން ހާމަކުރަން ނިންމީ ކޯޓުތަކަށް ގޮންޖެހުމުގެ ނިޔަތުގައި ނޫން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ރާއްޖެއެމްވީއަށް މިނިސްޓަރު އިހުސާން ވިދާޅުވީ ފުލުހުން ތަހުގީގެއް ނިންމަނީ ވަރަށް ބުރަ މަސައްކަތުން ކަމަށެވެ. ނަމަވެސް ކޯޓުން އެމައްސަލައެއް ނިންމާ ގޮތުން އާއްމު ރައްޔިތުން ހުރިހާ ތުހުމަތެއް ކުރަނީ ފުލުހުންނަށް ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ރާއްޖެ މިއީ ޑިމޮކްރެޓިކް ގައުމެއް ކަމަށާއި، ފުލުހުން ކުރާ މަސައްކަތްތައް އާއްމު ރައްޔިތުންނަށް ކިޔައިދޭން ޖެހޭ ކަމަށެވެ. މައްސަލައެއް އިސްތިއުނާފު ކުރި ނަމަވެސް އެކަމުގެ ސަބަބުން އެކޭސްއަކަށް އަސަރެއް ނުކުރާނެ ކަމަށާއި އިސްތިއުނާފުގައި އައު ވާހަކައެއް ނުދެކެވޭނެ ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ ފުލުހުންގެ މުއައްސަސާގެ ކަރާމާތް ހިފަހައްޓަންޖެހޭ ކަމަށާއި، މިކަމުގެ ސަބަބުން ރައްޔިތުންގެ އިތުބާރު ވަރަށް ބޮޑަށް ފުލުހުންނަށް ލިބޭނެ ކަމަށެވެ.
