ކުޑަވަގުތުކޮޅެއްގެ ތެރޭ ފަރުހާދު އަތުން މަސްއޫލިއްޔަތުތައް ނަގައި އެކްޓިންގ ޕޮލިސް ކޮމިޝަނަރުކަން ނަވީންއަށް!

އެކްޓިންގ ޕޮލިސް ކޮމިޝަނަރުގެ މަސްއޫލިއްޔަތު ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ހަވާލު ކުރިތާ ގަޑިއިރެއްގެ ތެރޭގައި އެ ނިންމުން ބަދަލުކޮށް، ފުލުހުންގެ އިދާރާ ހިންގުން ވަގުތީ ގޮތުން ޑެޕިއުޓީ ކޮމިޝަނަރ އޮފް ޕޮލިސް އިސްމާއިލް ނަވީން އާއި ހަވާލުކޮށްފި އެވެ.

ހޯމް މިނިސްޓަރު އަލީ އިހްސާން ވިދާޅުވީ ޕޮލިސް ކޮމިޝަނަރުގެ މަގާމަށް ބޭފުޅަކު ހަމަޖެއްސެންދެން ޕޮލިސްގެ ހިންގުން ނަވީން އާއި ހަވާލުކޮށްފައިވާ ކަމަށެވެ.

ފުލުހުންގެ އިދާރާ ހިންގުން ވަގުތީ ގޮތުން ފަރުހާދުއާ ހަވާލު ކުރިކަން ހޯމް މިނިސްޓަރު، އަލީ އިހުސާން އަދި ރައީސް އޮފީހުގެ ތަރުޖަމާން ހީނާ ވަލީދުވެސް ވަނީ އިއުލާނު ކުރައްވާފައެވެ. އެކަން އިއުލާނު ކުރެއްވީ މިރޭ 7:46 ގަ އެވެ. ނަމަވެސް އޭގެ ބަރާބަރު ގަޑިއެއްހާއިރު އެ ނިންމުން އަލުން ބަދަލުކޮށް މިނިސްޓަރ އިހުސާން ކުރެއްވި ޕޯސްޓެއްގައި ވިދާޅުވީ އެކްޓިން ޕޮލިސް ކޮމިޝަނަރ އަކަށް ނަވީން އައްޔަނުކޮށްފައިވާ ކަމަށެވެ.

މިނިސްޓަރ ފަހުން ކުރެއްވި ޓްވީޓްގައި ވަނީ،!ފުލުހުންގެ މުއައްސަސާ އިން މިވަގުތު އެންމެ އިސްކަން ދީގެން ކުރިއަށް ގެންދާ މަސައްކަތަކީ މިހާރު ހިނގަމުންދާ ތަހުގީގުގެ މަސައްކަތްކަމަށްވެފައި މިތަހުގީގުގެ ކަންކަމާ އެންމެ އިސްކޮށް ހަވާލުވެ ހުންނެވީ ޑެޕިއުޓީ ކޮމިޝަނަރ، އިސްމާއިލް ނަވީންކަމަށް ވާތީ ކޮމިޝަނަރ އޮފް ޕޮލިސް ކަމަށް ބޭފުޅަކު އައްޔަނު ކުރެވެންދެން އެ މަސްއޫލިއްޔަތު ވަގުތީގޮތުން އަދާކުރައްވަން ޑެޕިއުޓީ ކޮމިޝަނަރ އިސްމާއިލް ނަވީން ކަނޑައަޅައިފީމެވެ.

މިނިސްޓަރ އިހުސާން

ޝުޖާއު އިސްތިއުފާދެއްވީ ހޮނިހިރު ދުބަހުގެ ރޭ އިރާކޮޅުގެ ވަގުތެއްގަ އެވެ.

މި މަހުގެ 18 ވަނަ ދުވަހު އުމުރުން 21 އަހަރުގެ ހައްވާ ޔުމްނު ރަޝީދު ވެއްޓިފައި އޮއްވާ ފެނުނު މައްސަލައިގައި ގިނަ އަދަދެއްގެ ޒުވާނުން ނުކުމެ މަގުތަކުގައި ކުރަމުންދާ މުޒާހަރާތަކުގައި ވަނީ ޝުޖާއުގެ އިސްތިއުފާއަށް ގޮވާލާފަ އެވެ.

އެ މައްސަލައާ ގުޅިގެން ހޯމް މިނިސްޓަރު އަލީ އިހްސާނާއި ޓްރާންސްޕޯޓް މިނިސްޓަރު މުހައްމަދު އަމީން އިސްތިއުފާ ދެއްވުމަށް ވެސް މުޒާހަރާގެ ބައިވެރިން ޑިމާންޑް ކުރެ އެވެ. ނަމަވެސް އެ ދެ ބޭފުޅުން ވަނީ އިސްތިއުދާދޭންޖެހޭ ސަބަބެއް ނެތް ކަމަށް ވިދާޅުވެފަ އެވެ.

މުޒާހަރާގެ ބައިވެރިން ކުރާ ޑިމާންޑްތަކުގެ ތެރޭގައި ދެފުށް ފެންނަ ތަހުގީގެއް ކުރުމާއި އެ މައްސަލާގައި ޝާމިލްވާ އެންމެން ހައްޔަރުކުރުން ހިމެނެ އެވެ.