މާލެއާއި ހުޅުމާލޭގައި ފުލުހުން ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލާގައި ހިމެނޭ މީހަކު ޙާދިސާ ހިނގި ދުވަހު ރާއްޖެ ދޫކޮށް ދިޔަ ގޮތަށް އަދިވެސް ރާއްޖެ ނާންނަކަމަށް ފުލުހުން ބުނެފިއެވެ.

ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން އުފުލީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.

އޭގެ އިތުރުން، މުޙައްމަދު އަކްރަމް އަބްދުލް ޙަންނާން އަކީވެސް މި މައްސަލައިގައި ތުހުމަތު ކުރެވޭ ފަރާތެކެވެ.

ފުލުހުން ބުނީ، އަކްރަމް އަބްދުލް ޙަންނާންވެސް ހިމެނޭގޮތަށް މި މައްސަލައިގައި ހިމެނޭ ފަރާތްތަކުގެ މައްޗަށް ކުށް ސާބިތުވާ މިންވަރުގެ ތަހުގީގެއް ހިންގިފައިވާކަމަށް ޤަބޫލު ކުރެވޭ ކަމަށެވެ.

އެހެންނަމަވެސް މި ޙާދިސާ ހިނގާ ދިޔަ ދުވަހުގެ ހަވީރު އޭނާ ރާއްޖެއިން ބޭރަށް ދިޔަ ގޮތަށް މިހާތަނަށްވެސް އޭނާ އެނބުރި ރާއްޖެ އައިސްފައިނުވާކަމަށް ދިވެހި ފުލުހުންގެ ޚިދުމަތުން މައުލޫމާތު ދެއެވެ.

އޭނާއާއެކު އެ ފްލައިޓުގައި މި ނެޓްވޯކާ ގުޅުންހުރިކަމަށް ފުލުހުން ތުހުމަތުކުރާ އަރުޝަދު ޚާލިދުވެސް ދިޔަކަމަށް ފުލުހުން ބުނެއެވެ.

ފަހުން ލަންކާއިން ރާއްޖެއަށް ޑީޕޯޓްކޮށްލުމުން އަރުޝަދު އެނބުރި ރާއްޖެއައުމުން ފުލުހުން އޭނާ ހައްޔަރުކޮށްފައިވާއިރު، އަކްރަމް އަދިވެސް ރާއްޖެ އައިސްފައެއް ނުވެއެވެ.

އަކްރަމްއާ ބެހޭ މައުލޫމާތު އޭނާގެ އާއިލާއަށްވެސް ލިބިފައިނުވާކަމަށް ފުލުހުން ބުނެއެވެ.