ކުރިއަރ އަދި ވައިގެ މަގުން ރާއްޖެއެތެރެކުރަން އުޅުނު ޖުމްލަ 7.840 ކިލޯގްރާމްގެ މަސްތުވާތަކެތި ކަސްޓަމްސްއިން އަތުލައިގަނެފިއެވެ.

ކަސްޓަމްސް އިން ބުނީ މިތަކެތި އަތުލައިގަނެފައިވަނީ އެޕްރީލް އަދި މެއި މަހުގެ ތެރޭގައި ވައިގެ މަގުން އައިސްފައިވާ ފަސިންޖަރުން އަދި ކުރިއަރ މެދުވެރިކޮށް ރާއްޖެއަށް ގެނެސްފައިވާ ޕާރުސަލުތައް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގަ ކަމަށެވެ.

މިގޮތުން ތަފާތު 4 މައްސަލައެއްގައި މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާއިރު، މި ތަކެތި ފުރަތަމަ މަރުހަލާގައި ކަސްޓަމްސް އިން ތަހްލީލް ކުރުމުން މަސްތުވާތަކެތީގެ ބާވަތްތައް ކަމަށްވާ ސިންތެޓިކް ކެތިނޯން (Synthetic Cathinone) ، ކޮކެއިން (Cocaine)، އަދި ހެރޮއިން (Heroin) އަށް ވަނީ ޕޮޒިޓިވްވެފަ ކަަމަށް އެ އިދާރާއިން ވަނީ ބުނެފައެވެ.

ކަސްޓަމްސް އިން ބުނީ އެޕްރިލް މަހުގެ 2 ވަނަ ދުވަހު ވައިގެ މަގުން ލަގެޖުގައި ރާއްޖެ އެތެރެކުރަން މަސައްކަތް ކުރި 5670 ގްރާމްގެ ކޮކެއިން އަތުލައިގަނެފައިވާ ކަމަށެވެ. އެ ތަކެތީގެ އަގު 14 ބިލިއަން ރުފިޔާ އަށް އަރައެވެ. އެޕްރިލް މަހުގެ 9 ވަނަ ދުވަހު ކުރިއަރ މެދުވެރިކޮށް ރާއްޖެ އެތެރެކުރި 180 ގްރާމްގެ ސިންތެޓިކް ކެތިނޯން އަތުލައިގަނެފައިވާ ކަމަށް ވެސް އެ އިދާރާއިން ވަނީ ބުނެފައެވެ. އެ ތަކެތީގެ އަގު ތިން ލައްކަ ސައުވީސް ހާސް ރުފިޔާ އަށް އަރައެވެ.

އަދި މޭއި 5 ވަނަ ދުވަހު ކުރިއަރ މެދުވެރިކޮށް ރާއްޖެ އެތެރެކުރި 1690 ގްރާމްގެ ސިންތެޓިކް ކެތިނޯން އަތުލައިގަނެފައިވާ ކަމަށް ވެސް އެ އިދާރާއިން ވަނީ ބުނެފައެވެ. އެ ތަކެތީގެ އަގު ތިން ބިލިއަން ސާޅީސް ދެހާސް ރުފިޔާ އަށް އަރައެވެ. އަދި މެއި 25 ވަނަ ދުވަހު ވައިގެ މަގުން ހަށިގަނޑުގައި ފޮރުވައިގެން އެތެރެކުރި 300 ގްރާމްގެ ހެރޮއިން ވަނީ އަތުލައިގަނެފައެވެ. އެ ތަކެތީގެ އަގު ތިން ލައްކަ ފަސްދޮޅަށް ހާސް ރުފިޔާ އަށް އަރައެވެ.

އެހެންކަމުން   މި މައްސަލަތަކުގައި އަތުލައިގަނެވުނު މަސްތުވާތަކެތީގެ ބަރުދަނުގައި ޕެކިންއާއި އެކު ޖުމްލަ 7.840 ކިލޯގުރާމް ހުރިއިރު، މިތަކެތީގެ މަގުމަތީ އަގަކީ  17,726,000.00 (ސަތާރަ މިލިއަން ހަތްލައްކަ ސައްބީސް ހާސް) ދިވެހި ރުފިޔާކަމަށް ލަފާކުރެވެއެވެ. މި މައްސަލަތައް އިތުރަށް ތަޙްޤީޤްކުރުމަށްޓަކައި، މައްސަލަތަކުގައި ޝާމިލްވާ ފަރާތްތައް އަދި އަތުލައިގަނެވުނު މަސްތުވާތަކެތި މިހާރު ވަނީ ދިވެހި ފުލުހުންގެ ޚިދުމަތާއި ހަވާލުކޮށްފަ ކަމަށް ކަސްޓަމްސް އިން ވަނީ ބުނެފައެވެ.