ޑޮލަރުގެ އަގު ހެޔޮވެގެން އުޅެނީ ސަރުކާރު ހުއްޓި ކުދި ވިޔަފާރިތައް ހަލާކުވެގެން ދާތީ - ފައްޔާޒް

ޑޮލަރުގެ އަގުހެޔޮވެގެން އުޅެނީ ސަރުކާރު ހުއްޓި ކުދި ވިޔަފާރިތައް ހަލާކުވެގެން ދާތީ ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.

މިސްރާބު ހަމަމަގަށް ކެމްޕޭން ޖަލްސާއެއްގައި ވާހަކަ ދައްކަވަމުން މި ސަރުކާރުގެ މަސައްކަތުން ޑޮލަރުގެ އަގުހެޔޮވެއްޖެ ކަމަށް ދެކެވޭ ވާހަކަތަކަށް ފާޑުވިދާޅުވަމުން ފައްޔަޒް ވިދާޅުވީ އިގްތިސާދީ ކަންކަމަށް ބަލާލާއިރުގައި ޑޮލަރުގެ އަގު ހެޔޮވި ވާހަކަ ވަރަށް ފޮނިވެފައި ދައްކާ ކަމަށެވެ. ފައްޔާޒް ވިދާޅުވީ 2021 އަދި 2022 ގެ އެދުވަހުގެ އެޕްރީލް 1 ގައި ކަޅު ބާޒާރުގައި ޑޮލަރުގެ އަގު ހުރީ 16 ރުފިޔާ ކޮންމެވެސް ވަރަކަށް ކަމަށެވެ. ނަމަވެސް މިއަދު ހުރީ 17 ރުފިޔާ 60 ލާރިއަށް ކަމަށެވެ. އެހެންވީމަ ޑޮލަރުގެ އަގު ކުޑަވެގެން އުޅެނީ ކިހިނެއް ކަމެއް އެނގިވަޑައި ނުގަންނަވާ ކަމަށެވެ.

ފައްޔާޒު ވިދާޅުވީ ޑޮލަރު ގަންނާނެ މީހުން ނެތުމުން ޑޮލަރުގެ އަގު ދަށްވާނެ ކަމަށެވެ. ސަރުކާރަކީ އިގްތިސާދުގެ ވަރަށް ބޮޑު ކޮމްޕޯނަންޓެއް ކަމަށާއި، ސަރުކާރު އޮތީ ހުއްޓިފައި ކަމަށެވެ.

ފައްޔާޒު ވިދާޅުވީ ޑޮލަރުގެ އަގުހެޔޮވެގެން އުޅެނީ ތާކުންތާކު ނުޖެހޭ ކަމެއްގެ ސަބަބުން ކަމަށެވެ. ފައްޔާޒު ވިދާޅުވީ އެމްޑީޕީގެ ސަރުކާރުން އެމްއެމްއޭ އާއި ވާހަކަ ދައްކައިގެން ގާނޫނާއި ގަވާއިދުތަކެއް ހަދާފައި ހުންނާނީ ރާއްޖެއަށް ވަންނަ ހުރިހާ ޑޮލަރެއް ރާއްޖޭގެ ބޭންކަށް މާރުކުރަން މަޖުބޫރު ކުރަން އެގްރީމެންޓްކޮށްފައި ކަމަށެވެ. އަދި އެކަން ތަންފީޒުކުރުމާއެކު ޑޮލަރުގެ މައްސަލަ ހައްލުވެގެން ދާނެ ކަމަށް ފައްޔާޒް ވިދާޅުވިއެވެ.