ގާނޫނާއި ގަވާއިދާ ޚިލާފަށް އުޅޭ ބިދޭސީން ވަގުތުން ޑީޕޯޓު ކޮށްލެވޭ ގޮތަށް ގާނޫނުތައް ތަންފީޒުކުރަންޖެހޭ: އާޒިމް

ރާއްޖޭގައި ގާނޫނާއި ގަވާއިދާ ހިލާފަށް އުޅޭ ބިދޭސީން ވަގުތުން ޑީޕޯޓު ކޮށްލެވޭ ގޮތަށް ގާނޫނުތައް ތަންފީޒުކުރަންޖެހޭ ކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އާޒިމް ވިދާޅުވީ މުޅިރާއްޖޭގައި ދިމާވެފައިވާ އެންމެ ބޮޑު އެއްމައްސަލައަކީ ގާނޫނު ތަންފީޒު ކުރާ ފަރާތްތަކުން ގާނޫނު ތަންފީޒު ނުކުރާ މައްސަލަ ކަމަށެވެ. އެކަމުގެ ސަބަބުން ގިނަ މައްސަލަތައް ކުރިމަތިވަމުންދާ ކަމަށް އާޒިމް ވިދާޅުވިއެވެ.

މީގެ އިތުރުން އާޒިމް ވަނީ މާލެސިޓީއަށް ކުނިއަޅާ މައްސަލާގައި ކަންބޮޑުވުންފާޅުކޮށް ވާހަކަދައްކަވާފައެވެ. މަދުބަޔަކު ކުރާ ކަމެއްގެ ސަބަބުން ގިނަ ބަޔަކު ގިނަ އުދަނގޫތަކާއި ކުރިމަތިވާކަން އާޒިމް ފާހަގަކުރެއްވިއެވެ. އާޒިމް ވިދާޅުވީ ގާނޫނު ތަންފީޒު ކުރާކަމަށްވާނަމަ މާލެތެރެއަށް ކުނި ނޭޅޭނެ ކަމަށެވެ.

ގާނޫނާ ހިލާފަށް އުޅޭ ބިދޭސީންނަށް އިޝާރާތް ކުރައްވައި އާޒިމް ވިދާޅުވީ މާލޭގެ އެކި ހިސާބުތަކަށް ބިދޭސީން ކުނި އަޅާ ކަމަށާއި، ނަމަވެސް ލިޔެކިއުމެތް ނެތް ބިދޭސީން ޖޫރިމަނާ ކުރެވެން ނެތް ކަމަށެވެ. ނަމަވެސް ކުނި އަޅާ ދިވެހިންތަކެއް ޖޫރިމަނާކޮށްފައިވާ ކަމަށް އާޒިމް ވިދާޅުވިއެވެ. ގަވާއިދާ ހިލާފަށް އުޅޭ ބިދޭސީއަކު ޖުރިމަނާ ކުރިނަމަވެސް އެފައިސާ ދެއްކިތޯ ބަލާނެ ގޮތެއް ވެސް ނެތް ކަމަށް އޭނާ ވިދާޅުވިއެވެ. މިއީ ގައުމެއްގައި މިކަންކަން ހިގަންޖެހޭ ގޮތް ނޫން ކަމަށް ކަމަށް އާޒިމް ވިދާޅުވިއެވެ.

އާޒިމް ވިދާޅުވީ މާލެސިޓީ ކައުންސިލަށް ވެސް ބާރުތަކެއް ލިބިފައިވާ ކަމަށާއި، އެބާރުތަކުގެ ބޭނުން ހިފަމުންދާ ކަމަށެވެ.

އާޒިމް ވިދާޅުވީ ކުނި ނެގުމުގެ ޒިންމާ ހަވާލުކޮށްފައިވަނީ ވެމްކޯއާއި ކަމަށާއި، މިވަގުތު ކެޕޭސިޓީއަށް ދިމާވެފައިވާ ދަތިކަމެއްގެ ސަބަބުން ބައެއް ގަޑިތަކުގައި ކުނި ނެގުމަށް ލަސްވަމުންދާ ކަމަށެވެ. މާލެސިޓީ ކައުންސިލުން އެއްބާރުލުން ދެމުން ގެންދާ ކަމަށާއި، ކޮންމެ ދުވަހަކު ވެސް ގާތްގަނޑަކަށް އެވްރެޖްކޮށް 35 ހާސްޓަނުގެ ކުނި ނަގަމުންދާ ކަމަށް އާޒިމް ވިދާޅުވިއެވެ.