ފިރިމީހާގެ ޢާއިލާ ޝަހީދުވި ޚަބަރު އަހަން ޖެހުނީ އެއްމާބަނޑު 3 ދަރިން އުފަންވި ދުވަހު!

ރަމަޟާން މަހަކީ ދިރިއުޅުމުގެ އާދަކާދައަށް ބޮޑު ބަދަލެއް އަންނަ މައްސަރެކެވެ. އިސްލާމް ދީނަކީ ލުއިފަސޭހަ ދީނަކަށް ވާ އިރު، ރަމަޟާން މަހުގެ އަޅުކަމުގައިވެސް ލުއި އިޚްތިޔާރުތައް ދެއްވާފައިވެއެވެ. ޙައްޤުތަކެއް ވާ އިރު، އެ ޙައްޤުތަކުން މަހްރޫމުކޮށްފައި ވާ ޙާލުގައި ރަމަޟާން މަހެއް ހޭދަ ކުރާނެ ގޮތް އަހަރެމެންނަށް ވަޒަންވެސް ކޮށް ނުލެވޭނެއެވެ. އިންސާނަކަށް ވީތީ ލިބިދޭ އެންމެ އަސާސީ ޙައްޤުތަކާއި އަދި އެއަށް ވުރެ އިތުރަށްވެސް ލުއިފަސޭހަތައް ލިބި ހުރެމެ، އަހަރެމެންގެ ތެރެއިން ބައެއް މީހުންނަކީ ދިރިއުޅުމުގެ ކަންކަމުގައި ގޮންޖެހުންތަކާ ކުރިމަތިލާން ޖެހޭ ބައެކެވެ. ވަކިން ހާއްސަކޮށް ޅަދަރިމައިންނެވެ. އެންމެ ތުއްތު ކުދިންގެ ދިރިއުޅުމަށް ރަމަޟާން މަހު ވަކި އިތުރު ބަދަލެއް ނައެއް ކަމަކު، މައި މީހާ އެކަމަށް ހޭނެން ޖެހެއެވެ. މިކަންކަން މިހެން ހުރި އިރު، ގަތުލުއާންމެއްގައި، އެއްމާބަނޑު 3 ބެއިން ގޮވައިގެން އުޅޭނެ ގޮތް ވިސްނާލަންވެސް ދައްޗެވެ.

އިޒްރޭލުން ވަރުގަދަ ގަތުލުއާންމެއް ހިންގަމުން ގެންދާ ފަލަސްޠީނުގެ ޣައްޒާގައި އޭނާގެ ތުއްތުތުއްތު، އެއްމާބަނޑު 3 ބެއިން ގޮވައިގެން "ދިރިއުޅެމުން" އަންނަ ރަވާންދު އަލް-ޝައިޚްގެ ދިރިއުޅުމުން އަހަރެމެން ލިބިގަންނަންޖެހޭ އެތައް ފިލާވަޅެއް އެބަ ހުއްޓެވެ. ލިބިގަންނަންވީ އެތައް ހިތްވަރެއް އެބަ ފެނެއެވެ. ދިރިއުޅުމުގެ އެއްވެސް ކަމަކީ ފަސޭހަ ކަމެއް ނޫނެވެ. ޣައްޒާގައި މިއަދު ދިރުމެއް ނެތޭ ދެންނެވިއަސް ގޯހެއް ނެތެވެ. ރަވާންދަށް ކުރިމަތިވެފައި ވާ ގޮންޖެހުންތަކާއި އުފުލަންޖެހިފައިވާ ތަކުލީފުތަކުގެ ވާހަކަ، އޭނާ ވަނީ މީޑިއާއާ ހިއްސާކޮށްފައެވެ.

ރަވާންދު މިހާރު ދިރިއުޅެނީ ޣައްޒާގެ މެދުތެރޭގެ އަވަށެއް ކަމަށްވާ ދީރް އަލް-ބަލާހްގައި ހުންނަ އަލް-އަޤްޞާ މާޓިޔަރޒް ހޮސްޕިޓަލު ކައިރީގައި ޖަހާފައިވާ ވަގުތީ ފޭލިގެތަކުން ފޭލިގެއެއްގައެވެ. ރަވާންދު ބުނި ގޮތުގައި އޭނާއަށް ލިބުނު އެއްމާބަނޑު 3 ބެއިންނަށް ނަން ދީފައި ވަނީ، އިޒްރޭލުގެ ޢުދުވާންތަކުގައި އޭނާގެ ފިރިމީހާގެ ޢާއިލާއިން ވަކިވެދިޔަ މީހުންގެ ހަނދާނުގައި ކަމަށެވެ. އެއީ ސުހާދު، ހުދާ އަދި ނަދާއެވެ. 3 ކުދިން މި ދުނިޔެއަށް ނޭވާލީ ދުވަހަކީ، ފިރިމީހާގެ ޢާއިލާ ޝަހީދުވި ކަމުގެ ޚަބަރު އަހަން ރަވާންދުއަށް މަޖުބޫރުވި ދުވަސްވެސްމެއެވެ.

ޣައްޒާގައި ހިންގާ 36 ހޮސްޕިޓަލުގެ ތެރެއިން ގިނަ ހޮސްޕިޓަލުތަކެއްގެ މަސައްކަތް މިހާރު ވަނީ ހުއްޓާލާފައެވެ. އަލް-އަޤްޞާ މާޓިޔަރޒް ހޮސްޕިޓަލުގެ ތަރުޖަމާނު ވިދާޅުވި ގޮތުގައި މިހާރުވެސް އެ ހޮސްޕިޓަލަށް ގިނަ ޢަދަދެއްގެ ބަޔަކު ގެނެވެއެވެ. އޭގެ ތެރޭގައި މަރުވެފައިވާ މީހުންނާއި ޒަޚަމްވެފައިވާ މީހުންވެސް ހިމެނެއެވެ. ދަރިމައިވުމާއި ވިހެއުމާ ބެހޭ ޑިޕަރޓްމަންޓް، އަލް-އަވްދާ ހޮސްޕިޓަލަށް ބަދަލު ކުރި ކަމުގައި ވީ ނަމަވެސް، އިމަރޖެންސީގައި ވިއްސަން ޖެހޭ މީހުންނާއި، ސިޒޭރިއަން ހެދުމުގެ ބައެއް ކޭސްތައް މިހާރުވެސް ނަގައެވެ.

އިޒްރޭލުން ހިންގަމުން ގެންދާ ގަތުލުއާންމުގައި ޣައްޒާއިން މަރުވި މީހުންގެ ރަސްމީ ޢަދަދުތައް 33000 އާ ގާތް ކުރާ އިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.