ހުޅަނގު އައްސޭރި އިސްރާއީލުގެ ސިޔާދަތުގައި ހިމެނުމަށް ގޮވާލާ އިސްރާއީލުގެ ގާނޫނު ހަދާ މަޖިލިހުން ގަރާރެއް ފާސްކުރުން އަރަބި ގައުމުތަކުން ކުށްވެރި ކޮށްފި
ފަލަސްތީނުގެ ހުޅަނގު އައްސޭރި އިސްރާއީލްގެ ސިޔާދަތުގެ ދަށަށް ގެނައުމަށް އެގައުމުގެ ޕާލިމެންޓުން ފާސްކުރި ގަރާރަކީ ބައިނަލްއަގުވާމީ ގާނޫނާ ޚިލާފު ކަމެއްކަމަށް ބުނެ އަރަބި ދުނިޔެއިން ވަނީ ކުށްވެރިކޮށްފައެވެ. ހިފާފައިވާ ފަލަސްތީނުގެ އެއްވެސް ބިމެއްގެ މައްޗަށް އިސްރާއީލަށް ސިޔާދަތެއް ނޯންނާނެ ކަމަށާއި އެގައުމުން އަމިއްލަ އަށް އަޅާ އެއްވެސް ފިޔަވަޅަކުން ގާނޫނީ އަސަރެއް ނުކުރާނެކަމަށް ގައުމުތަކުން ވަނީ އެއްއަޑުން ބުނެފައެވެ.
އިސްރާއީލުގެ ވަޒަންވެރިން ހުޅަނގު އައްސޭރީގެ ފަލަސްތީން ރައްޔިތުން އުޅޭ ހެބްރޮން ގައި އުޅެމުން ދާއިރު އިސްރާއީލު ސިފައިންގެ މީހަކު ފާރަވެރިވަނީ - 28 ޖޫން 2025
ފަލަސްތީނުގެ ބިމުން ހިފާފައިވާ ހުޅަނގު އައްސޭރި އިސްރާއީލުގެ ސިޔާދަތުގައި ހިމެނުމަށް ގޮވާލާ އިސްރާއީލުގެ ގާނޫނު ހަދާ މަޖިލިހުން ގަރާރެއް ފާސް ކުރުމުން އަރަބި ގައުމުތަކުން ކުށްވެރި ކޮށްފި އެވެ.
ބުރާސްފަތި ދުވަހު، އަރަބި ދުނިޔޭގެ ގައުމުތަކުގެ އިތުރުން، ދުނިޔޭގެ އެކި ގައުމުތަކުންނާއި ބައިނަލްއަޤްވާމީ ޖަމާއަތަކުން އިސްރާއީލުގެ ކަނެސެޓުން ފާސްކުރި ގަރާރާ ދެކޮޅަށް ބަޔާނެއް ވަނީ ނެރެފައެވެ.
އަރަބި ލީގު އާއި އޯގަނައިޒޭޝަން އޮފް އިސްލާމިކް ކޯޕަރޭޝަން ގެ އިތުރުން މި ބަޔާން ނެރުނީ ސަޢޫދީ އަރަބިއްޔާ، ބަޙްރައިން، މިޞްރު، އިންޑޮނޭޝިޔާ، ޖޯޑަން، ނައިޖީރިއާ، ފަލަސްޠީނު، ޤަޠަރު، ތުރުކީ، ޔުނައިޓެޑް އެރަބް އެމިރޭޓްސް އިންނެވެ.
ސަޢޫދީ ޚާރިޖިއްޔާ އިން އާންމު ކުރި މި ބަޔާނުގައިވާ ގޮތުން، ބަޔާން ނެރުނު ފަރާތްތަކުން އިސްރާއީލުގެ ގާނޫނު ހަދާ މަޖިލިހުން މިފަދަ ގަރާރެއް ފާސް ކުރުން ދެކެނީ "ބައިނަލްއަޤްވާމީ ޤާނޫނާ ސާފު އަދި ޤަބޫލު ނުކުރެވޭނެ ޚިލާފުވުމެއްގެ ގޮތުގައި ކަމަށެވެ. އަދި އދ. ގެ ސަލާމަތީ މަޖިލީހުގެ ކަމާ ބެހޭ ޤަރާރުތަކުގެ ފާޅުކަން ބޮޑު ޚިލާފުވުމެއްގެ ގޮތުގައި ކަމަށެވެ.
ބަޔާން ނެރުނު ޖަމްއިއްޔާ ތަކާއި ގައުމުތަކުން ޔަގީން ކޮށްދެމުން ބުނެފައި ވަނީ ހިފާފައިވާ ފަލަސްޠީނު ސަރަޙައްދުގެ މައްޗަށް އިސްރާއީލަށް އެއްވެސް ސިޔާދަތެއް ނެތްކަމެވެ. އަދި އިސްރާއީލުން އަމިއްލަ އަށް އަޅާ ފިޔަވަޅެއްގެ ސަބަބުން ގާނޫނީ އެއްވެސް އަސަރެއް ނުކުރާނެ ކަމަށާއި، އިރުމަތީ ޖެރުސަލަމް ހިމެނޭ ގޮތައް ހިފާފައިވާ ފަލަސްޠީނު ސަރަޙައްދުގެ، ޤާނޫނީ ހައިސިއްޔަތު އިސްރާއީލަށް ބަދަލު ނުކުރެވޭނެ ކަމަށް ބާރުއަޅައި ބުނެފައިވެއެވެ.
70 އަށްވުރެ ގިނަ އިސްރާއީލުގެ ޤާނޫނު ހަދާ މަޖިލީހުގެ މެންބަރުން ބުދަ ދުވަހު ވެސްޓް ބޭންކުގެ މައްޗަށް އިސްރާއީލުގެ ސިޔާދަތު ތަންފީޒު ކުރުމަށް ސަރުކާރަށް ގޮވާލާ ގަރާރެއް ފާސްކުރިއެވެ. ނަމަވެސް މި ރަމްޒީ ފިޔަވަޅުން ފަލަސްޠީނު ސަރަޙައްދުގެ ޤާނޫނީ ޙާލަތަކަށް އަސަރެއް ނުކުރާނެއެވެ.
އިސްރާއީލުގެ ޕާލިމެންޓް ކަމުގައިވާ ކަނެސެޓުގައި ނެގުނު، އަމަލު ކުރުން ލާޒިމު ނުވާ މި ވޯޓަށް ތާއީދުކުރީ ބޮޑުވަޒީރު ބެންޖަމިން ނެތަންޔާހޫގެ ކަނާތުފިޔައިގެ އިއްތިހާދުގެ މެންބަރުންނާއި، އިދިކޮޅު ފަރާތްތަކުގެ ބައެއް މެންބަރުންނެވެ.
އިސްރާއީލުގެ ޤާނޫނު ހަދާ މަޖިލީހުގެ މެންބަރުން ބުނެފައި ވަނީ ވެސްޓް ބޭންކު ނުވަތަ ހުޅަނގު އައްސޭރި އިސްރާއީލުގެ ބިމާ އެއް ކޮށްލުމުން "އިސްރާއީލު ދައުލަތުގެ ސަލާމަތާއި ރައްކާތެރިކަން ވަރުގަދަވެ، އަދި ޔަހޫދީންގެ އަސާސީ ޙައްޤު ކަމުގައިވާ އެމީހުންގެ ވަތަނުގައި ސުލްޙަވެރިކަމާއި ރައްކާތެރިކަމާއެކު ދިރިއުޅުމުގެ ޙައްޤާމެދު ސުވާލު އުފެދުން ހުއްޓުވޭނެ،" ކަމަށެވެ.
