ފައްޔާޒު ފުލުސް އޮފީހަށް ހާޒިރުކުރީ ޖިނާއީ ކުށެއްގެ ތުހުމަތުގައި ނޫންކަން ފުލުހުންގެ ފަރާތުން ސާފުކޮށް ވިދާޅުވި
ގާނޫނީ ވަކީލު މަހުފޫޒު ސައީދު
އިދިކޮޅު މައި ޕާޓީ އެމްޑީޕީގެ ޗެއަރޕާސަން ފައްޔާޒު އިސްމާއީލު ފުލުހަށް ހާޒިރުކުރީ ޖިނާއީ ކުށެއްގެ ތުހުމަތުގައި ނޫންކަމަށާއި ފުލުހަށް ހާޒިރުކޮށްފައިވަނީ އާންމުކޮށްފައިވާ މައުލޫމާތެއް ސާފުކުރަންކަމަށް ފައްޔާޒުގެ ގާނޫނީ ވަކީލު މަހުފޫޒު ސައީދު ވިދާޅުވެއްޖެއެވެ.
ފުލުސް އޮފީހަށް ހާޒިރުވުމަށް ފައްޔާޒަށް ފޮނުވި ޗިޓުގައި ބުނެފައި އޮތީ ފުލުހަށް ހާޒިރު ކުރާ ސަބަބަކީ އާރްޑީސީގެ ފައިސާއަށް އެ ކުންފުނީގެ ބައެއް މުވައްޒަފުން ހިޔާނާތްތެރިވެ، އެ ހިޔާނާތްތެރިވި ފައިސާއިން ފައްޔާޒަށް މާލީ މަންފާތަކެއް ލިބިފައިވާ ކަމަށް ބެލެވޭތީ ކަމަށެވެ.
ބުރާސްފަތި ދުވަހު ފުލުސް އޮފީހަށް ހާޒިރުވުމަށްފަހު ނޫސްވެރިންނާ ވާހަކަ ދައްކަވަމުން ފައްޔާޒްގެ ވަކީލު މަހްފޫޒް ވިދާޅުވީ ފައްޔާޒަށް ކުރެވޭ ތުހުމަތަކީ އާރްޑީސީއާއެކު ވިޔަފާރީގެ މުއާމަލާތެއް ކުރާ ކުންފުންޏަކަށް ފޮނުވި ޕޭމަންޓަކުން ލިބުމުން އެ ކުންފުނިން ފައްޔާޒްގެ އެކައުންޓަށް ފައިސާ ފޮނުވާފައިވުން ކަމަށެވެ. އެމައުލޫމާތުތަކަކީ ފުލުހުންގެ ފަރާތުން އެދިވަޑައިގަންނަވާނަމަ ލިޔެކިޔުމުންވެސް ފޮނުވައިދެވޭނެ މައުލޫމާތުތަކެއްކަމަށް ވަކީލު ވިދާޅުވިއެވެ.
އަނެއްކޮޅުން މިމައުލޫމާތުތަކަކީ ޝާއިއުކޮށްފައިވާ މައުލޫމާތުތަކެއްކަމަށްވެސް މަހުފޫޒު ވިދާޅުވިއެވެ.
މަހުފޫޒު އިތުރަށް ވިދާޅުވީ ފައްޔާޒު ފުލުސް އޮފީހަށް ހާޒިރުކުރީ ޖިނާއީ ކުށެއްގެ ތުހުމަތުގައި ނޫންކަން ފުލުހުންގެ ފަރާތުން ސާފުކޮށް ވިދާޅުވާކަމަށެވެ.
2022 ވަނަ އަހަރު ތަހުގީގު ކުރަން ފެށި މިމައްސަލާގައި އާރްޑީސީގެ 3 މުވައްޒަފެއްގެ އެކައުންޓަށް 14 މިލިއަނަށްވުރެ ގިނަ ރުފިޔާ ގަވާއިދާއި ޚިލާފަށް ޖަމާކުރިކަމަށް ފުލުހުން ވަނީ ބުނެފައެވެ. އޭގެތެރެއިން އެއް މުވައްޒަފެއްގެ އެކައުންޓަށް 11 މިލިއަން، އަދި ބާކީ ދެ މީހުންގެ އެކައުންޓަށް 2 މިލިއަނަށްވުރެ ގިނަ ރުފިޔާ ޖަމާކުރިކަމަށް ފުލުހުން ބުނެއެވެ. އަދި މި މައްސަލައާ ގުޅިގެން، މަނީ ލޯންޑަރކުރުމުގެ އަމަލުތައް ހިންގާފައިވާކަމަށް ފުލުހުން ތުހުމަތުކުރެއެވެ.
