ވާންއުޅޭ ގޭގައި ލަނޑުޖަހާފައި ގޮސް ބައްޕައާ ބައްދާލި ވަގުތުކޮޅު މީޑިއާތަކަށް

ރެއާލް މެޑްރިޑުގެ ދަނޑު ކަމަށްވާ ސެންތިއާގޯ ބާނަބައުގައި ރޭ ބްރެޒިލާއި ސްޕޭން 3-3އިން އެއްވަރުވި މެޗުގައި ހުރިހާ ފޯކަސްއެއް ދަމައިގަތީ ބްރެޒިލްގެ 17 އަހަރުގެ ޒުވާން ފޯވަޑް ފިލިޕޭ އެންޑްރިކެވެ.

ކުޅެން ނުކުތްތާ އެންމެ ފަސް މިނިޓް ތެރޭގައި އޭނާ ގޯލު ޖެހުމުން މުޅި ދަނޑުގައި ތިބި އެންމެން އޭނާ އަށް ތައުރީފްކޮށް އޭނާގެ ނަމުން ގޮވައި ތަރުހީބުދިނެވެ. އެއްކޮޅުން ކުޅުނީ ސްޕޭން ނަމަވެސް ރެއާލްގެ ދަނޑުގައި ބްރެޒިލްގެ ކުޅުންތެރިންނަށް ވަރަށް ބޮޑު ތަރުހީބެއް އޮތެވެ. ހާއްސަކޮށް ބްރެޒިލްގެ ތިން ފޯވަޑުން ކަމަށްވާ ވިނީޝިއަސް ޖޫނިއާ އާއި ރޮގްރީގޯ އަދި އެންރިކަށެވެ. މީގެ ތެރެއިން ފްލެމިންގޯގެ ފޯވަޑް އެންޑްރިކް އަންނަ ސީޒަނުގައި ކުޅޭނީ ސްޕޭނުގެ ރެއާލް މެޑްރިޑަށެވެ. އަނެއް ދެ ކުޅުންތެރިންނަކީ މިހާރު ވެސް ރެއާލް އަށް ކުޅެމުން އަންނަ ދެ ފޯވަޑުންނެވެ.

މިހެންވެ އެންޑްރިކް ރޭ ކުޅެން ނުކުތީ އޭނާގެ ވާން އުޅޭ "ގޭގައި" ކަމަށް ސްޕޭނުގެ ނޫސްތަކުން ބުނަމުންދިޔަ އެވެ. މިއީ އޭނާ މެޑްރިޑުގެ ދަނޑުގައި މެޗެއް ކުޅުނު ފުރަތަމަ ފަހަރު ކަމުން މެޗުން ބަލަން އޭނާގެ މުޅި އާއިލާ ގޮސްތިއްބެވެ. ލަނޑު ޖަހާފައި އޭނާ ގޮސް ބައްދާލީ ކުޅިބަލަން އިން ބައްޕަ ޑަގްލަސްއާ އެވެ. މި މަންޒަރު ފޮޓޯގައި ވީޑިއޯކޮށް އެތައް ބަޔަކު ސޯޝަލް މީޑިއާގައި އާއްމު ކުރަމުންދާއިރު މި ވީޑިއޯ އަށް ވަނީ ގިނަ ބައެއްގެ ސަމާލުކަން ލިބިފަ އެވެ. އަދި ދުނިޔޭގެ މަޝްހޫރު ނޫސްވެރިންނާއި މީޑިއާތަކުން ވެސް ދަނީ މި މަންޒަރު ހަބަރާއި މައުލޫމާތުގެ ސިފައިގައި ދައްކައި އެންޑްރިކަށް ތައުރީފް ކުރަމުންނެވެ.

މެޗަށް ފަހު ސްޕޭނުގެ ރެއާލް މެޑްރިޑުގެ ރައީސް ވެސް އޭނާއާ ބައްދަލުކުރި އެވެ. ޕްރޭޒަކީ އާއްމުކޮށް އިދިކޮޅު ޓީމުގެ ކުޅުންތެރިންނާ ސަލާމްކޮށް ބައްދަލުކުރާ މީހަކަށް ނުވިޔަސް އޭނާ ވަނީ ރޭ ވަރަށް އުފަލުންހުރެ ބްރެޒިލްގެ ޓީމުގެ ކުޅުންތެރިންނާ ބައްދަލުކޮށްފަ އެވެ. ހާއްސަކޮށް ރެއާލްގެ ކުޅުންތެރިންނާ އެވެ. މި މެޗުގެ ކުރިން އެންޑްރިކް ވަނީ ރެއާލް އާއި ވިޔަރެއާލް ސެންތިއާގޯ ބާނަބައުގައި ކުޅުނު މެޗު ބެލުމަށްފަހު ރެއާލްގެ ޓްރޭނިން ދަނޑު ބަލާލުމަށް ވެސް ގޮސްފަ އެވެ.

އެންޑްރިކް މި މެޗުގައި ގޯލު ޖެހީ މީގެ ތިން ދުވަސް ކުރިން އިނގިރޭސިން އަތުން ބްރެޒިލް މޮޅުކޮށްދިން ގޯލު ޖަހައިދިނުމަށްފަހު އެވެ. މިހެންވެ ބްރެޒިލްގެ ފުޓްބޯޅަ ފެޑަރޭޝަނުގެ ރައީސް އެޑްނާލްޑޯ ވިދާޅުވީ ''ބްރެޒިލްގެ ފުޓްބޯޅައިން "އާތަރިއެއް އުފަންވެއްޖެ" ކަމަށެވެ.