ސްކޮޓްލޭންޑުގެ ފުރަތަމަ ޑިވިޝަނުގައި ކުޅެމުން އަންނަ ރޭންޖާސް އެފްސީގެ ކޯޗުގެ މަގާމާއި ހަވާލުވުމަށް އެ ޓީމާއެކު މަޝްވަރާތައް ކުރިޔަށް ގެންގޮސްފި ކަމަށް ލިވަޕޫލްގެ ލެޖެންޑް ސްޓީވެން ޖެރާޑް ބުނެފިއެވެ.

ރޭންޖާސްގެ ކޯޗުގެ މަގާމުގައި ހުރި ގްރައެމް މާޓީ އެ މަގާމުން ވަކިކޮށްފައިވާއިރު އުމުރުން 37 އަހަރުގެ ޖެރާޑް ވަރަށް އަވަހަށް އެ މަގާމާއި ހަވާލުވާނެ ކަމަށް ބެލެވެއެވެ. މާޓީ އެ މަގާމުން ވަކިކޮށްފައިވަނީ ސްކޮޓިޝް ޕްރިމިއާ ލީގުގައި ވާދަވެރި ސެލްޓިކާއި ދެކޮޅަށް ކުޅުނު މެޗުން 5-0 ގެ ލަދުވެތި ނަތީޖާއަކުން ބަލިވުމާއި ގުޅިގެންނެވެ. ރޭންޖާސް މިވަގުތު އޮތީ ސްކޮޓިޝް ޕްރިމިއާ ލީގުގެ ތިންވަނަ މަގާމުގައެވެ.

ޖެރާޑްއަކީ މި ސީޒަން ފެށުނުއިރު ފުރަމުން އައީ ލިވަޕޫލްގެ 18 އަހަރުން ދަށުގެ ޓީމުގެ ކޯޗުގެ މަގާމެއެވެ. އޭނާ އެ މަގާމު މިހާރު ދޫކޮށްލާފައިވާއިރު ރޭންޖާސްގައި އޭނާގެ އެސިސްޓަންޓް ކޯޗުގެ ގޮތުގައި ހަރަކާތްތެރިވާނީ މީގެކުރިން ލިވަޕޫލްއަށް ކުޅުނު ގެރީ މެކްލިސްޓާ ކަމަށް މީޑިއާތަކުން ވަނީ ބުނެފައެވެ.

ބީޓީ ސްޕޯޓްސްއާއި ވާހަކަ ދައްކަމުން ޖެރާޑް ބުނީ ރޭންޖާސްއާއެކު ފުރަތަމަ މަޝްވަރާތައް ކުރިޔަށް ގެންގޮސްފައިވާ ކަމަށާއި ކުރިޔަށް އޮތް ދުވަސްތަކުގައި އެ މަގާމާއި އޭނާ ހަވާލުވާނެ ކަމަށެވެ. އޭނާ ބުނީ މިވަގުތު ކުރަން ޖެހޭ ވަރަށް ގިނަ ކަންކަން އެބަހުރި ކަމަށާއި އެހެން ނަމަވެސް އެ މަގާމާއި ހަވާލުވުމަށް ފަހު ލިބޭ ނަތީޖާތަކުން އޭނާގެ ފެންވަރު އެނގިގެންދާނެ ކަމަށް ޖެރާޑް ބުނެފައިވެއެވެ.  

ޖެރާޑް ރޭންޖާސްގެ ކޯޗުގެ މަގާމާއި ހަވާލުވެއްޖެ ނަމަ އޭނާ ވާދަކުރަން ޖެހޭނީ މިވަގުތު ސެލްޓިކްއަށް އިރުޝާދު ދެމުން އަންނަ އޭނާގެ ކުރީގެ ކޯޗު ކަމަށްވާ ބްރެންޑަން ރޯޖާސްއާ ދެކޮޅަށެވެ. ރޭންޖާސް މިވަގުތު އަންނަނީ ތާވަލުގެ ދެވަނަ މަގާމު ހޯދުމަށް މަސައްކަތްކުރަމުންނެވެ. އެ ޓީމަށް މި އަމާޒަށް ވާސިލްވުމަށް އޮތް އެންމެ ބޮޑު ހުރަހަކީ ހިބަނިއަން އަދި އެބަޑީންއެވެ. ރޭންޖާސްއިން ބުރަ މަސައްކަތްތަކެއް ކުރަމުން އަންނައިރު ސެލްޓިކުން ވަނީ އެ ޓީމާއި ދެކޮޅަށް އެންމެފަހުން ކުޅުނު 10 މެޗު ވެސް ކާމިޔާބުކޮށްފައެވެ.

ޖެރާޑް ހޯދުމަށް ރޭންޖާސްއިން އެންމެ ފުރަތަމަ ހުށަހެޅުން ހުށަހަޅާފައިވަނީ މިދިޔަ ހަފްތާގެ ތެރޭގައެވެ. މި މަޝްވަރާތަކުން އެންމެ ބޮޑަށް ޖެރާޑް ޑިމާންޑް ކޮށްފައިވަނީ ރަނގަޅު ބަޖެޓެއް ހޯދުމަށް ކަމަށް ރިޕޯޓުތައް ބުނެއެވެ. އަންނަ ސީޒަނުގައި ބާންލީގެ މިޑްފީލްޑަރު ސްކޮޓް އާފީލްޑް އަދި ހަލް ސިޓީގެ ގޯލްކީޕަރު އެލެން މެކްގްރެގޯގެ އިތުރުން މިލްވޯލްގެ ފޯވާޑް ގްރެގޮރީ ލީ ވެސް ފެނިގެންދާނީ ރޭންޖާސްއިން ކަމަށް ރިޕޯޓުތައް ބުނެއެވެ.

ޖެރާޑާއި ގުޅޭގޮތުން ވާހަކަ ދައްކަމުން ލިވަޕޫލްގެ ކޯޗު ޔާގެން ކްލޮޕް ބުނީ ޖެރާޑް އަކީ އަބަދުވެސް ލިވަޕޫލްގެ ލެޖެންޑެއްގެ ގޮތުގައި ބެލޭނެ ކުޅުންތެރިޔެއް ކަމަށާއި އޭނާ ކުރާ ކޮންމެ ކަމެއްގައި ވެސް ލިވަޕޫލްގެ ފަރާތުން އެއްބާރުލުމާއި އެހީތެރިކަން ލިބޭނެ ކަމަށެވެ. އޭނާ ބުނީ ޖެރާޑް އަކީ ކުޅުންތެރިޔެއްގެ ގޮތުގައި ވަރަށް ގިނަ ތަޖުރިބާތަކެއް ކޮށްފައިވާ މީހެއް ކަމަށާއި އެކަމުގެ ފައިދާ އޭނާ ކޮންމެ ޓީމެއްގައި ހުރި ނަމަވެސް ފެންނާނެ ކަމަށެވެ. ކްލޮޕް ބުނީ އޭނާއަކީ ޓީމެއް ގެންގުޅޭ މީހެއް ނަމަ އަބަދުވެސް ޖެރާޑަށް އޭނާގެ ޓީމުން ފުރުސަތު އޮންނާނެ ކަމަށެވެ.

ޖެރާޑް ވަނީ ލިވަޕޫލްގެ 18 އަހަރުން ދަށުގެ ޓީމާއެކު ރަނގަޅު ނަތީޖާތަކެއް ނެރެފައެވެ.