ﷲ ގެ ނަންފުޅު ޖަހާފައިވާ އިސްޓާކީނެއް ވިއްކައިގެން މެލޭޝިޔާގެ ބޮޑު ފިހާރައެއްގެ ވެރިންގެ މައްޗަށް ދައުވާ ކޮށްފި
26 މާރިޗު 2024 | އަންގާރަ 16:06ސޯޝަލް މީޑިޔާގައި ފޮޓޯތައް ދައުރުވަމުން ދިއުމާއި އެކު ރަސްގެފާނު އަދި ސިޔާސީ ލީޑަރުންގެ ފަރާތުން ވެސް ވަނީ ފާޑުކިއުން އައިސްފައެވެ.
މެލޭޝިޔާ ގެ ސުޕަރމާކެޓް ޗެއިންގެ ފިހާރައެއް
މެލޭޝިޔާގެ މަޝްހޫރު ކޮންވީނިއެންސް ސްޓޯރ ޗެއިނެއްގައި ﷲ ގެ ނަންފުޅު ޖަހާފައިވާ އިސްޓާކީނެއް ވިއްކި މައްސަލައިގައި ފިހާރައިގެ ވެރިންގެ މައްޗަށް ދައުވާ ކޮށްފިއެވެ. "ކޭކޭ ސުޕަރ މާކެޓް ޗެއިން"ގެ ވެރިން ވަނީ ދައުވާއަށް އިންކާރު ކޮށްފައެވެ. އެމީހުންގެ މައްޗަށް ކޮށްފަވަނީ އެހެން މީހުންގެ ދީނީ އިހުސާސު ތަކަށް ނޭދެވޭ އަސަރެއް ކުރާނެ ކަމެއް ކުރި ކަމުގެދައުވާއެވެ. ސްޓޯރ ޗެއިންގެ ވެރިންނަކީ ދެމަފިރިންނެވެ. އެމީހުންގެ މައްޗަށް ކުށް ސާބިތު ވެއްޖެނަމަ އެއްއަހަރު ދުވަހުގެ ޖަލު ހުކުމެއް އަންނާނެއެވެ.
ﷲ ގެ ނަންފުޅު ޖައިގެން އިސްޓާކީނެއް ވިއްކާ މައްސަލަ ހާމަވެފައިވަނީ މީގެ ދެހަފްތާއެއްދުވަސް ކުރިންނެވެ. އެއާއެކު ބައެއްފަރާތްތަކުން ކޭކޭ ގެ ފިހާރަތައް ބޯއިކޮޓް ކުރަން ގޮވާލާފައި ވެއެވެ. އެއާއެކު ފިހާރައިގެ ވެރިން ވަނީ މައާފަށް އެދިފައެވެ. އަދި އިސްޓާކީނުތައްވަނީ ހަރުތަކުން ނަގާފައެވެ.
މިވަރުންވެސް މައްސަލަ ހިނދޭގޮތެއް ނުވިއެވެ. ސޯޝަލް މީޑިޔާގައި ފޮޓޯތައް ދައުރުވަމުން ދިއުމާއި އެކު ރަސްގެފާނު އަދި ސިޔާސީ ލީޑަރުންގެ ފަރާތުން ވެސް ވަނީ ފާޑުކިއުން އައިސްފައެވެ. ފުލުހުންވެސް މައުލޫމާތު ދީފައިވާ ގޮތުގައި ހޯމަ ދުވަހާހަމަޔަށް 200 ޝަކުވާ ލިބިފައި ވެއެވެ.
މެލޭޝިޔާގައި ދީނީ މިނިވަން ކަން އޮންނާނެ ކަމަށް ޤާނޫނު އަސާސީގައި ބުނެފައި ވެއެވެ. ނަމަވެސް 34 މިލިއަން މީހުންގެ އާބާދީ އެއް އޮންނަ މެލޭޝިޔާގައި ތިންބައިކުޅަ ދެބަޔަކީ މުސްލިމުންނެވެ. އެހެންކަމުން ﷲގެ ނަންފުޅު، ފަޔަށްލާ އިސްޓާކީނެއްގަ ޖެހުންފަދަ ކަމެއް ކުރުމަކީ ގިނަ މީހުން ބަލައިގަންނާނެ ކަމެއް ނޫނެވެ.
މިކަމާގުޅިގެން މެލޭޝިޔާގެ ރަސްގެފާނު ސުލްތާން އިބްރާހިމް ސުލްތާން އިސްކަންދަރު ވަނީ އެ ސްޓޯރ ޗެއިން ކުށްވެރި ކުރައްވާފައެވެ. އަދި އެކަން ކުރިބަޔަކާމެދު ހަރުކަށި ފިޔަވަޅު އެޅުމަށްވެސް ވަނީ ގޮވާލައްވާފައެވެ.
ރަސްގެފާނުގެ އިތުރުން ބޮޑުވަޒީރު އަންވަރު އިބްރާހިމް ވެސް ވަނީ އެވާހަކަ އިތުރަށް ދެއްކުންވެސް މަނާ ކުރައްވާފައެވެ.
