މެލޭޝިޔާގެ ކުރީގެ ފިނޭންސް މިނިސްޓަރ އަދި އިދިކޮޅު ސިޔާސީ އިސް ލީޑަރު ލިމް ގުއަން އެންގ މައްޗަށް ކޮރަޕްޝަންގެ ދައުވާ އުފުލައިފިއެވެ.
ލިމްގެ މައްޗަށް މެލޭޝިޔާގެ ކުއަލަލަމްޕޫރުގައި ހުރި ސްޕެޝަލް ކޮރަޕްޝަން ކޯޓުން ދައުވާ ކުރީ 2011 ވަނަ އަހަރު އޭނާ ޕެނަންގްގެ ޗީފް މިނިސްޓަރު ކަމުގައި ހުންނެވި އިރު ރިޝްވަތު ހޯއްދަވަން މަސައްކަތް ކުރެއްވުމުގެ ތުހުމަތުގައެވެ. އެގޮތުން ޕެނަންގުގައި މަގުތަކާއި ޓަނަލްތައް ހެދުމަށް އެގައުމުގެ ކުންފުންޏަކާ ސަރުކާރުން ހަވާލު ކުރި 1.5 ބިލިއަން ޑޮލަރުގެ މަޝްރޫއަކުން ލިބޭ ފައިދާގެ 10 ޕަސެންޓު ލިމްއަށް ދިނުމަށް އޭނާ އެދުނު ކަމަށް ދައުވާގައިވެއެވެ.
ލިމް ޗީފް މިނިސްޓަރު ކަމުގެ މަގާމުގައި ހުންނެވީ 2008 ވަނަ އަހަރުން ފެށިގެން 2018 ވަނަ އަހަރާ ހަމައަށް ފިނޭންސް މިނިސްޓަރު ކަމަށް އައްޔަން ކުރެވެންދެންނެވެ. އޭނާ ހައްޔަރުކޮށް ބުރާސްފަތި ދުވަހުގެ ރޭ ދައުވާ ކުރުމަށް ކޯޓަށް ހާޒިރު ކުރުމުން އޭނާ ވަނީ ދައުވާ އަށް އިންކާރު ކުރައްވާފައެވެ.
މި މައްސަލަ ލިމްގެ މައްޗަށް ސާބިތުވެއްޖެ ނަމަ އޭނާއަށް 20 އަހަރުގެ ޖަލު ހުކުމެއް އައުމުގެ އިތުރުން ބޮޑު އަދަދަކުން ޖޫރިމަނާ ކުރެވިދާނެއެވެ. މެލޭޝިޔާގެ އެންޓި ގްރާފްޓް އޮފިޝަލުން ބުނެފައިވަނީ ލިމްގެ މައްޗަށް އިތުރު 2 ދައުވާއެއް އަންނަ ހަފްތާގައި އުފުލާނެ ކަމަށެވެ.
މި ދައުވާތަކާއި ގުޅިގެން ލިމް ވިދާޅުވެފައިވަނީ އެއީ ސިޔާސީ ގޮތުން ކުރާ ދައުވާތަކެއް ކަމަށެވެ. އަދި އޭނާގެ މައްޗަށް ތުހުމަތު ކުރެވޭ މައްސަލައިގެ އެއްވެސް ހެއްކެއް ނުހުންނާނެ ކަމަށެވެ.
އިދިކޮޅު އިސް ސިޔާސީ ލީޑަރުގެ މައްޗަށް ކޮރަޕްޝަންގެ ދައުވާ އުފުލާފައިވާ އިރު، މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާގުގެ މައްޗަށް އުފުލި ދައުވާތަކުގެ ތެރެއިން ހަތް ދައުވާ ސާބިތުވެފައިވާތީ އޭނާ 12 އަހަރަށް ޖަލަށްލުމަށް މެލޭޝިޔާގެ ހައިކޯޓުން މިދިޔަ މަހުގެ 28 ވަނަ ދުވަހު ވަނީ ހުކުމް ކޮށްފައެވެ.
މެލޭޝިއާގައި ހިންގި ވަން އެމްޑީބީގެ ބޮޑު ހިޔާނާތާ ގުޅިގެން ކުރީގެ ބޮޑު ވަޒީރު ނަޖީބު ރައްޒާގުގެ މައްޗަށް 42 ދައުވާއެއް އުފުލާފައިވެއެވެ. އޭގެތެރެއިން 5 މައްސަލައަކާއި ގުޅިގެން 7 ދައުވާ ސާބިތުވާ ކަމަށް މެލޭޝިއާގެ ހައިކޯޓުން ވަނީ ނިންމާފައެވެ. އެ ދައުވާތަކުގެ ތެރޭގައި ހިމެނެނީ، މަނީ ލޯންޑަރިންގއާއި މަގާމުގެ ނުފޫޒު ބޭނުން ކުރުމުގެ ދައުވާތަކެކެވެ.
ހައިކޯޓުގައި ބޭއްވި ޝަރީއަތުގައި ނަޖީބުގެ މައްޗަށް ކުށް ސާބިތުވާކަމަށް ނިންމުމަށްފަހު އަދަބުވެސް ކަނޑައަޅާފައިވެއެވެ. އެގޮތުން، މަގާމުގެ ނުފޫޒު ބޭނުން ކުރުމުގެ ދައުވާއާ ގުޅިގެން އަދަބެއްގެ ގޮތުގައި ކަނޑައަޅާފައި ވަނީ ނަޖީބު 12 އަހަރަށް ޖަލަށްލުމަށެވެ.
މަގާމުގެ އިތުބާރު ގެއްލުވާލުމާއި މަނީ ލޯންޑަރިންގެ ދައުވާތަކާއި ގުޅިގެން އެއިން ކޮންމެ ދައުވާއަކަށް 10 އަހަރުގެ ޖަލު ހުކުމެއް އިއްވާފައިވެއެވެ. އެހެންކަމުން ނަޖީބުގެ މައްޗަށް މި 7 ދައުވާއިން 72 އަހަރުގެ ޖަލު ހުކުމެއް މިވަނީ އިއްވާފައެވެ.
މި ހުރިހާ ދައުވާތަކެއް ވެސް ގުޅިފައިވަނީ މެލޭޝިޔާގެ ތަރައްގީގެ ފަންޑުން ނަޖީބުގެ އަމިއްލަ އެކައުންޓަށް 42 މިލިއަން ރިންގިޓް ޖަމާކޮށްފައިވާ މައްސަލައާ ގުޅިގެންނެވެ. މިކަން ހިނގާފައިވަނީ ނަޖީބުގެ ވެރިކަމުގެ ދުވަސްވަރުއެވެ.
