ތައިލެންޑްގެ ޝާހީ އާއިލާގެ މުދާތައް ރަސްގެފާނުގެ ނަންފުޅު މައްޗަށް ބަދަލުކޮށްފި

ތައިލެންޑްގެ ޝާހީ އާއިލާގެ މުދާތައް ރަސްގެފާނުގެ ނަންފުޅު މައްޗަށް ބަދަލުކޮށްފިއެވެ.

2016ވަނަ އަހަރު ވަޖީރަލޮންކޯން ތައިލެންޑްގެ ރަސްކަމުގެ ތަޚުތައް އިސްވެވަޑައިގަތީ އެމަނިކުފާނުގެ ބައްޕާފުޅު އަވަހާރަވުމާއި ގުޅިގެންނެވެ. ވަޖީރަލޮންކޯންގެ ނަންފުޅު މައްޗަށް ޝާހީ މުދާތައް ބަދަލުކޮށްފައިވަނީ ޝާހީ މުދާތައް މެނޭޖްކުރާ ކްރައުން ޕްރޮޮޕަރޓީ ބިއުރޯއިންނެވެ. އެމަނިކުފާނުގެ ނަންފުޅު މައްޗަށް މުދާތައް ބަދަލުކުރެވުނުއިރު، އެކަން ކުރާނެ ގޮތުގެ ޤާނޫނެއް މިދިޔަ އަހަރުވަނީ ފާސްކޮށްފައެވެ.

ތައިލެންޑްގެ ޝާހީ އާއިލާއިން ކުރާ ވިޔަފާރިތަކުގެ މައްޗަށް ޓެކްސްއާއި ޑިއުޓީގެ ޤާނޫނުތައް ނުހިނގިނަމަވެސް، ޝާހީ މުދާތަކާއި އެއްކޮށްލެވުނު ރަސްގެފާނުގެ ކުރީގެ އަމިއްލަފުޅު މުދާތަކުން ޓެކްސް ނެގޭނެކަމަށް އެމަނިކުފާނު ވަނީ ނިންމަވާފައެވެ.

ރަސްގެފާނު ވަޖީރަލޮންކޯންގެ ބައްޕާފުޅު، ތައިލެންޑްގެ ކުރީގެ ރަސްގެފާނު ބުމިބޯލް އަދުލްޔަދޭޖްގެ ރަސްކަމުގައި ޝާހީ މުދާތައް މެނޭޖްކުރުމަށް ގަނޑުވަރުގައި ގިނަ ބޭފުޅުން ގެންގުޅުއްވިއެވެ. އެހެން ނަމަވެސް އޭގެ ތެރެއިން ބައެއް ބޭފުޅުން މަޤާމުން ދުރުކޮށް ރަސްގެފާނު ވަޖީރަލޮންކޯންގެ ފުރިހަމަ ބާރު މުދާތަކުގެ މައްޗަށް ހިނގާ ގޮތަށް ވަނީ ބަދަލުކޮށްފައެވެ.

ތައިލެންޑްގެ ޝާހީ އާއިލާގެ އިންވެސްޓްމަންޓްތަކުގެ ތެރޭގައި ބޮޑެތި އިމާރާތްތަކާއި ބޮޑެތި ކުންފުނިތަކުގައި ކޮށްފައިވާ އިންވެސްޓްމަންޓްތައް ހިމެނެއެވެ. އަދި ރަސްގެފާނުގެ މުއްސަނދިކަން 30 ބިލިއަން ޑޮލަރާއި 60 ބިލިއަން ޑޮލަރާއި ދެމެދުގެ އަދަދަކަށް އަރާނެކަމަށް ފޯބްސްއިން އަންދާޒާކުރެއެވެ. ތައިލެންޑްގެ ޤާނޫނުތައް އޮންނަ ގޮތުން ރަސްކަމާއި ބެހޭ ގޮތުން، ޚާއްސަކޮށް ޒާތީކަންކަމާއި ގުޅޭ ގޮތުން ފާޅުގައި ވާހަކަ ދައްކަން ގިނަ މީހުންނަށް ނުކުރެއެވެ.