އިރާނުން ބޯޓެއް ހިފަހައްޓާ އޭގައި ތިބި މެލޭޝިޔާގެ 16 ފަޅުވެރިން ހައްޔަރުކޮށްފި

ވަގަށް ތެޔޮ އުފުލަން އުޅުނުކަމުގެ ތުހުމަތުގައި އިރާނުގެ ރެވޮލިޔުޝަނަރީ ގާޑުން ބޯޓެއް ހިފަހައްޓާ އޭގައި ތިބި 16 ފަޅުވެރިން ހައްޔަރުކޮށްފި އެވެ.

މި 16 ފަޅުވެރިންނަކީ މެލޭޝިޔާގެ ފަޅުވެރިންނެވެ. މި ބޯޓުގައި ހުރި 1.3 މިލިއަން ލިޓަރުގެ ތެޔޮ މިހާރު ވަނީ އިރާނުގެ ރެވޮލިޔުޝަނަރީ ގާޑުންގެ ބެލުމުގެ ދަށަށް ގެންގޮސްފައެވެ. މި ބޯޓު ހިފަހައްޓާފައިވަނީ އަބޫ މޫސާ ރަށާ 15 ނޯޓިކަލް މޭލު ބޭރުންނެވެ.

އަބޫ މޫސާ އަކީ ދެކުނު ގަލްފުގައި އިން ތިން ރަށުގެ ތެރެއިން އިރާނުން ކޮންޓްރޯލްކުރާ ރަށެކެވެ. ނަމަވެސް ޔުނައިޓެޑް އަރަބް އެމިރޭޓްސް އިންވެސް އަންނަނީ އެރަށުގެ މައްޗަށް ދަޢުވާކުރަމުންނެވެ.

މިއީ މިއަހަރުގެ ތެރޭގައި ވަގަށް ތެޔޮ އުފަލަން އުޅުނުކަމުގެ ތުހުމަތުގައި އިރާނުން ހިފެހެއްޓި ހަވަނަ ބޯޓެވެ.