ޝަކުވާތަކާއި ގުޅިގެން މާފަރު ސިއްހީ މަރުކަޒުގެ މަސައްކަތް ވަނީ ހުއްޓިފައި - މިނިސްޓަރު
މަސައްކަތް މަޑުޖެހިފައިވަނީ 26 އޮކްޓޯބަރު 2023 ވަނަ ދުވަހުން ފެށިގެން
ނ. މާފަރު
ޝަކުވާތަކާއި ގުޅިގެން މާފަރު ސިއްހީ މަރުކަޒުގެ މަސައްކަތް ހުއްޓިފައިވާ ކަމަށް ހެލްތު މިނިސްޓަރު ޑރ. އަބްދުﷲ ޚަލީލު ވިދާޅުވެއްޖެއެވެ.
ހެލްތު މިނިސްޓަރު މިފަދައިން ވިދާޅުވީ މަނަދޫ ދާއިރާގެ މެންބަރު އަހުމަދު ހާރޫން ކުރެއްވި ސުވާލަށް ޖަވާބުދެއްވަމުންނެވެ. ހެލްތު މިނިސްޓަރު ޑރ. އަބްދުﷲ ޚަލީލާއި ކުރެއްވި ސުވާލަކީ ނ. މާފަރު ހެލްތު ސެންޓަރުގެ އައު ޢިމާރާތުގެ ކޮންޓްރެކްޓް ބޭރުގެ ފަރާތަކާ ހަވާލުކޮށްފައި ވީނަމަވެސް، މިހާތަނަށް ޢަމަލީ މަސައްކަތް ފެށިފައި ނުވަނީ ކީއްވެތޯއެވެ. އަދި ޢަމަލީ މަސައްކަތް ފެށޭނެކަމަށް ލަފަކުރާ ތާރީޚަކީ ކޮބައިތޯއެވެ.
މެންބަރުގެ ސުވާލުގެ ޖަވާބުގައި ހެލްތު މިނިސްޓަރު ޑރ. އަބްދުﷲ ޚަލީލް ވިދާޅުވީ މެންބަރުގެ ސުވާލުގައި ވިދާޅުވި ގޮތަކަށް ބޭރުގެ ބަޔަކާއި ހަވާލުކުރެވިފައިވާ ކަމަށެވެ. ނަމަވެސް ފިނޭންސް މިނިސްޓްރީއަށް ހުށަހެޅިފައި ހުރި ޝަކުވާތަކާއި ގުޅިގެން އެ ޕްރޮޖެކްޓް މި ވަގުތަށް މަޑުޖެހިފައިވާ ކަމަށެވެ.
މިނިސްޓަރު ވިދާޅުވީ އެ މަސައްކަތް މަޑުޖެހިފައިވަނީ 26 އޮކްޓޯބަރު 2023 ވަނަ ދުވަހުން ފެށިގެން ކަމަށާއި، ޕްރޮޖެކްޓުގައި ކުރަމުންދިޔަ ހުރިހާ މަސައްކަތެއް ހުއްޓާލުމަށް ފިނޭންސް މިނިސްޓްރީން އެއިރު އަންގާފައިވާ ކަމަށެވެ.
އެހެންކަމުން އަދި ވަކިގޮތަކަށް އަންގާފައި ނުވާތީ ޕްރޮޖެކްޓްގެ މަސައްކަތް ކުރިއަށް ނުދާ ކަމަށާއި، ޕްރޮޖެކްޓުގެ މަސައްކަތް ހުއްޓާނުލާ ކުރިއަށްގެންދެވޭނެ މަގެއް ހޯދަމުންދާ ކަމަށް ވެސް ހެލްތު މިނިސްޓަރު ޚަލީލު ވިދާޅުވިއެވެ.
