ފުލުސް މީހާއަށް ހަމަލާދިނީ ވައަތު ކޮނޑާ މެއާ ދޭތެރެއަށް : ފުލުހުން
ޒަޚަމްވި ފުލުސް މީހާއަށް އައިޖީއެމްއެޗްގައި ދަނީ ފަރުވާދެމުން
މާފުށީ ޖަލު: ފުލުހަކަށް ހަމަލާ ދީފައިވަނީ ފަތާފައި ޖަލަށް ވަންނަން އުޅުނު މީހަކު ހުއްޓުވުމުގެ ތެރޭގައި
ހޮނިހިރު ދުވަހުގެރޭ ތޫނު އެއްޗަކުން ހަމަލާދީފައި ވަނީ މާފުށީ ޕޮލިސް ސްޓޭޝަނުގައި މަސައްކަތް ކުރަމުންދާ ޕޮލިސް ކޮންސްޓަބަލް އަލީ ރައްޒާންގެ ވައަތު ކޮނޑާ މެއާ ދޭތެރެއަށް ކަމަށް ފުލުހުންގެ މީޑިއާ އޮފިޝަލް ވިދާޅުވެއްޖެއެވެ.
ރައްޒާންއަށް މިހާރު އައިޖީއެމް ހޮސްޕިޓަލްގެ އައިސީޔޫގައި ފަރުވާދެމުންދާ ކަމަށާއި އޭނާއަށް ތޫނު އެއްޗަކުން ހަމަލާދިނީ މާފުއްޓަށް ދިޔަ ލޯންޗެއްގައި ހުރި މީހަކު މޫދަށް ފުންމާލައިގެން މާފުއްޓަށް އަރަން މަސައްކަތްކުރަން އުޅުމުގެ ތެރޭގައި އޭނާ ހުއްޓުވަން، އެހެން ފުލުހުންނާއެކު ރައްޒާން މަސައްކަތް ކުރަމުން ދަނިކޮށްކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލުހުންގެ މީޑިއާ އޮފިޝަލް އިތުރަށް ވިދާޅުވީ މި މައްސަލައާ ގުޅިގެން ރައްޒާނަށް ތޫނު އެއްޗަކުން ހަމަލާދީ ޒަޚަމްކޮށްލި މީހާއާއި މާލެއިން މާފުއްޓަށް ދިޔަ ލޯންޗުގެ ކެޕްޓަނާއި އެ ލޯންޗުގައި އެވަގުތު ތިބި އިތުރު ދެ މީހަކު، ފުލުހުންގެ ބެލުމުގެ ދަށަށް ގެންގޮސްފައިވާ ކަމަށާއި މާފުއްޓަށް ދިޔަ ލޯންޗާއި މާފުށީ ޖަލަށް އެތެރެކުރުމަށްޓަކައި ގެނައި ތަކެތި ފުލުހުންގެ ބެލުމުގެ ދަށަށް ގެންގޮސްފައިވާކަމަށެވެ.
މި މައްސަލައާއި ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވަނީ އުމުރުން 51 އަހަރުގެ ފިރިހެނަކާއި އުމުރުން 32 އަހަރުގެ ދެ ފިރިހެނުންނާއި އުމުރުން 18 އަހަރުން ދަށުގެ ފިރިހެން ކުއްޖެއް ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.
މާފުށިން ވާހަކަދެއްކި އެރަށު ރައްޔިތަކު ބުނީ، މި ހާދިސާ އާއި ގުޅިގެން، މާފުށީ ޖަލުގެ އިތުރުން މުޅި މާފުށިގެ ސަލާމަތީ ކަންކަން ވަރުގަދަކޮށްފައިވާ ކަމަށެވެ
ފުލުހުންދަނީ މި މައްސަލަ އިތުރަށް ތަހްޤީޤް ކުރަމުންނެވެ.
