ވިނީޝިއުސް ހުރީ ފަހަތަށް ޖެހި، ހިތްވަރު ދޫކުރާ ގޮތަކަށް ނޫން!

ނަސްލީ ގޮތުން ދިމާ ކުރާ މައްސަލައިގައި ފަހަތަށް ޖެހި، ހިތްވަރު ދޫކުރަން ބޭނުންނުވާ ކަމަށް، ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ ބުނެފި އެވެ.

ރެއާލްގައި މޮޅު ކުޅުމެއް ދައްކަމުން އަންނަ ވިނީޝިއުސް އަށް ނަސްލީ ގޮތުން ދިމާާ ކުރާ މައްސަލަ ވަނީ ވަރަށް ބޮޑުވެފަ އެވެ. އެ މައްސަލަ ބޮޑުވެ، އެންމެ ފަހުން ރެއާލުން ވަނީ އެ މައްސަލަ ކަމާ ގުޅުން ހުރި ފަރާތްތަކަށް ވެސް ހުށަހަޅަން ނިންމައިފަ އެވެ. އަދި ގިނަ ބަޔަކު އަންނަނީ އެކަން ކުށްވެރިކޮށް، ވިނީޝިއުސް އަށް ހިތްވަރު ވެސް ދެމުންނެވެ.

އެކަމާ ގުޅޭ ގޮތުން އަސަރާ އެކު ވާހަކަ ދައްކަމުން ވިނީޝިއުސް ބުނީ، ސްޕެއިން ދޫކޮށްލުމުގެ އެއްވެސް ވިސްނުމެއް އޭނާ ނުގެންގުޅޭ ކަމަށާއި، އޭނާ ސްޕެއިން ދޫކޮށްލުމަކީ ނަސްލީ ގޮތުން ދިމާ ކުރާ މީހުން ބޭނުންވާނެ ގޮތް ކަމަށެވެ. ވިނީޝިއުސް ބުނީ އޭނާ ކުޅެމުން އަންނަނީ ދުނިޔޭގެ އެންމެ މޮޅު ކުލަބަށް ކަމަށާއި، އެ ކުލަބު ދޫކޮށް އޭނާ ނުދާނެ ކަމަށެވެ.

އިތުރަށް ވިނީޝިއުސް ބުނީ އެ މައްސަލައިގައި އޭނާ ފަހަތަށް ނުޖެހޭނެ ކަމަށާއި، ހިތްވަރާއި، ސާބިތު ކަމާއެކު ހުންނާނެ ކަމަށެވެ. ޚާއްސަކޮށް ރެއާލްގެ ރައީސް ފްލޮރެންޓީނޯ ޕެރޭޒް އަދި ކުލަބުން އޭނާ އަށް ހިތްވަރުދީ، ސަޕޯޓު ދެމުން އަންނަ ކަމަށެވެ. މައާފަށް އެދެމުން ވިނީޝިއުސް ބުނީ، އޭނާާ ބޭނުން ވަނީ ފުޓުބޯޅަ ކުޅެން ކަމަށާއި، ހުރިހާ ކަމެއް ވެސް ކުރާނީ އޭނާގެ އާއިލާ އަދި ކުލަބަށްޓަކައި ކަމަށެވެ.

ވިނީޝިއުސް ވަނީ މިހާތަނަށް ރެއާލަށް ކުޅެދިން 253 މެޗުގައި 77 ލަނޑު ޖަހައިފަ އެވެ. އެ ކުލަބުގައި އޭނާ މޮޅު ކުޅުމެއް ދައްކަމުން އަންނައިރު، ރެއާލްގެ ކޯޗު ކާލޯ އަންޗެލޮޓީ އެންމެ އިސްކަން ދޭ ކުޅުންތެރިންގެ ތެރޭގައި ވެސް އޭނާ ހިމެނެ އެވެ. ވިނީޝިއުސް ވަނީ މިހާތަނަށް ރެއާލާއެކު 10 ތައްޓެއް ކާމިޔާބު ކޮށްފަ އެވެ.