ހުޅުމާލެ ފޭސް 3 ހިއްކަން ފަށަން ނިމިދިޔަ ސަރުކާރުން މަސައްކަތް ކުރުމުން އެކަން ނުކުރަން ރައީސް މުއިއްޒު އެންގެވި - ރައީސް ޞާލިހު
އެމަނިކުފާނު ވަނީ ގައުމުގެ ކަންކަން ހަމަމަގަށް އަޅުވަން ޖެހޭ ކަމަށާއި އެކަން ކުރާނީ އެމްޑީޕީން ކަމަށް ވެސް ވިދާޅުވެފަ
ކުރީގެ ރައީސް އިބްރާހިމް މުހައްމަދު ޞާލިހް
ހުޅުމާލެ ފޭސް 3 ހިއްކަން ފަށަން ނިމިދިޔަ ސަރުކާރުން މަސައްކަތް ކުރުމުން އެކަން ނުކުރަން އޭރުގެ މޭޔަރ އަދި މިހާރުގެ ރައީސް ޑރ.މުހައްމަދު މުއިއްޒު އެންގެވި ކަމަށް ކުރީގެ ރައީސް އިބްރާޙިމް މުހައްމަދު ޞާލިހު ވިދާޅުވެއްޖެއެވެ.
މާލޭގެ ރައްޔިތުންނަށް ބޯހިޔާވަހިކަން ހޯދާދިނުމަށް ކުރި މަސައްކަތުގެ ތެރެއިން ގުޅީފަޅު ހިއްކީ މިހާރުގެ ރައީސްގެ ވިއްސްނުމާއި ދެކޮޅަށް ކަމަށް އެމަނިކުފާނު ވަނީ ސިފަކުރައްވާފައެވެ. އެމަނިކުފާނު އެފަދައިން ވިދާޅުވީ ކުރިން ގުޅީފަޅުގައި ހިއްކާފައި އޮތް ބިމުގައި ތިބި މީހުން، މުއްދަތެއް ނުދީ އެތަނުން ފޭބުމަށް މުއިއްޒުގެ ވަޒީރުކަމުގައި އަންގާފައިވުމެވެ. މާލޭގެ ރައްޔިތުންނަށް ބޯހިޔާވަހިކަން ހޯދާދިނުމަށް ގުޅީފަޅު އަދި ގިރާވަރުފަޅާއި ހުޅުމާލޭ ފޭސް 3ގައި ހިއްކަން ފެށީ މާލޭގެ ރައްޔިތުންނަށް ބޯހިޔާވަހިކަމަށް ހައްލެއް ހޯދާދިނުމަށް ކަމަށް އެމަނިކުފާނު ވިދާޅުވިއެވެ. ކުރީގެ ރައީސް ޞާލިހު ވަނީ އެކަމަށް ވަަރަށް ބޮޑަށް ފާޑު ވިދާޅުވެފައެވެ.
އިތުރަށް ވާހަކަދައްކަވަމުން އެމަނިކުފާނު ވަނީ ނިމިދިޔަ ސަރުކާރުން ދޫކުރަން ނިންމި ފްލެޓާއި ގޯތި ނުދީ މި ސަރުކާރުން ހިފަހައްޓާތީ އެކަމަށް ފާޑު ވިދާޅުވެފައެވެ. އެގޮތުން ކުރީގެ ރައީސް ޞާލިހު ވަނީ މާލޭގެ ރައްޔިތުންނަށް ގޯތި ލިބޭކަން ޔަޤީންކުރުމަށް އެމްޑީޕީގެ މެޖޯރިޓީ މަޖިލީހުގައި އޮތުންމުހިންމު ކަމަށް ވިދާޅުވެފައެވެ. އަދި މާލޭ ރައްޔިތުންނަށް ގޯތި ދޭނެ ކަމަށާއި ފްލެޓް ލިބުނު މީހުންނަށް ފްލެޓް ލިބޭނެ ކަމަށް ބުނެ މި ސަރުކާރުގެ އިސް ވެރިން ދޮގު ހަދާފައިވާ ކަމަށް އެމަނިކުފާނު ވަނީ ވިދާޅުވެފައެވެ. އެމަނިކުފާނު ވަނީ ގައުމުގެ ކަންކަން ހަމަމަގަށް އަޅުވަން ޖެހޭ ކަމަށާއި އެކަން ކުރާނީ އެމްޑީޕީން ކަމަށް ވެސް ވިދާޅުވެފައެވެ.
