މި ސަރުކާރު ވެރިކަމަށް އައީ މަކަރުވެރިކަމާއި ދޮގުވެރި ހީލަތްތެރި ރޭވުންތަކުގެ ތެރެއިންކަން މިއަދު އެ ދަނީ ސާފުވަމުންކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.

ހޮނިހިރު ދުވަހު ކުޅުދުއްފުށި ސިޓީގައި އެމްޑީޕީން ކުރިއަށް ގެންދާ ލާމަރުކަޒީ ގުޅުން ކޮންފަރެންސްގައި ރައީސް ސާލިހު ވިދާޅުވީ ޑިމޮކްރަސީއަކީ ހަމައެކަނި ރައްޔިތުންނާ ހިސާބަށް ގޮސް ވޯޓެއް ނަގައިގެން ސަރުކާރު ބަދަލުކުރުން ނޫންކަމަށެވެ. އަދި ޑިމޮކްރަސީ އެއް ހިންގުމަކީ ފަސޭހަކަމެއް ނޫންކަމަށް ފާހަގަކުރައްވާ ރައީސް ވިދާޅުވީ ޑިމޮކްރަސީ އެއްގައި ކަންކަން ނިންމާއިރު ރައްޔިތުންނާއި މަޝްވަރާކޮށް އަޑު އަހަން ޖެހޭ ކަމަށެވެ. ހަމައެހެންމެ ރައްޔިތުންނާއި ކައިރިން ޚިދުމަތް ދިނުމަކީ ވެސް ޑިމޮކްރަސީއެއްގައި މުހިންމުކަމެއް ކަމަށް އެ މަނިކުފާނު ވަނީ ވިދާޅުވެފައެވެ. ރައީސްކަމުގައި ހުންނަވާ ބޭފުޅަކަށް ރައީސް އޮފީހަށް ހުރިހާ ބާރެއް ޖަމާކޮށްފި ނަމަ ވަރަށް ފަސޭހަ ވާނެ ކަމަށާއި އެ ހިސާބުން ބޭނުންކަމެއް ވެރިކަމުގައި ހުންނަ މީހަކަށް ކުރެވިދާނެ ކަމަށް އެ މަނިކުފާނު ވިދާޅުވިއެވެ. އެހެންނަމަވެސް މިއަދު އެއީ ރައްޔިތުން ޤަބޫލުކުރާނެ ކަމެއް ނޫން ކަމަށް ރައީސް ޞާލިހު ވިދާޅުވިއެވެ. މިހާރު މިއޮތް ސަރުކާރު މިސްރާބު ޖަހާފަ އޮތީ ހުދުމުހުތާރު ވެރިކަމަކާ ދިމާއަށް އެ މަނިކުފާނު ވިދާޅުވިއެވެ.

ރައްޔިތުން މިއަދު ޚުދުމުހުތާރު ވެރިކަމަކާއި ދެކޮޅަށް ތެދުވާނެ ކަމަށާއި އެއާ އިދިކޮޅަށް ކުރަން ޖެހުނު ކޮންމެ ކަމެއް ކުރާނެ ކަމަށް ޤަބޫލުކުރައްވާ ކަމަށް ރައީސް ޞާލިހު ވިދާޅުވިއެވެ. މިއަދު ވެރިކަމުގައި ތިބި ބޭފުޅުން ސަރުކާރާއިގެން ކުރިއަށް ދަނީ ކިހިނެއްތޯ ބަލާލަން ޖެހޭ ކަމަށް އެ މަނިކުފާނު ވިދާޅުވިއެވެ. ސަރުކާރު ވެރިކަމަށް އައީ ދޮގާއި އޮޅުވާލުމާއި، ފިތުނަ އާއި ފަސާދައިގެ ތެރެއިން ކަމަށް ރައީސް ޞާލިހު ވަނީ ވިދާޅުވެފައެވެ. ސަރުކާރުން ވީ ވައުދުތަކަކީ ހަގީގަތެއް ނެތް އެއްވެސް ދިރާސާ އެއްގެ މައްޗަށް ބިނާކޮށްފައިވާ ވައުދުތަކެއް ނޫން ކަމަށް އެ މަނިކުފާނު ވިދާޅުވިއެވެ.