މި ސަރުކާރުން ވަނީ ފުރަތަމަ ދުވަހުން ފެށިގެން ލާމަރުކަޒީ ނިޒާމް ފުނޑާލުމުގެ މަސައްކަތް ފަށާފައި - ރައީސް ޞާލިހު
މިއަދު ސިޓީތަކުގައި ވެސް އަމިއްލަ އަށް ކަމެއް ކުރުމުގެ އިޚްތިޔާރު ނެތް ކަމަށް އެ މަނިކުފާނު ވަނީ ފާހަގަކުރައްވާފަ
އެމްޑީޕީގެ ލާމަރުކަޒީ ގުޅުން ކޮންފަރެންސްގެ ތެރެއިން
މި ސަރުކާރުން ވަނީ ލާމަރުކަޒީ ނިޒާމް ފުނޑާލުމުގެ މަސައްކަތް ފަށާފައި ކަމަށް ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ހޮނިހިރު ދުވަހު ކުޅުދުއްފުށި ސިޓީގައި އެމްޑީޕީން ކުރިއަށް ގެންދާ ލާމަރުކަޒީ ގުޅުން ކޮންފަރެންސްގައި ވާހަކަދައްކަވަމުން އެ މަނިކުފާނު ވަނި ލާމަރުކަޒީ ނިޒާމް ބަަލުކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުވާލައްވާފައެވެ. އަދި އެ ނިޒާމަށް މި ސަރުކާރުން އިޚްތިރާމް ނުކުރާކަމަށް ފާހަގަކުރައްވާ އެކަމަށް ފާޑު ވިދާޅުވިއެވެ. އެޓޯލްސް މިނިސްޓްރީ އެއް އުފައްދާ، ބާރުތައް ޖަމާކުރުން ފުރަތަމަ ދުވަހުން ފެށިގެން ފެނިގެންދާ ކަމަށް ރައީސް ޞާލިހު ވިދާޅުވިއެވެ. ހަގީގަތުގައި 60% މީހުން ރާއްޖެ ތަރައްޤީކުރަން ބޭނުންވަނީ ލާމަރުކަޒީ ނިޒާމާއި އެއްގޮތަށް ކަމަށް އެ މަނިކުފާނު ފާހަގަކުރެއްވިއެވެ.
ރާއްޖެ ތަރައްޤީކުރުމުގައި މި ސަރުކާރުން ގެންގުޅޭ ގޮތްތަކަކީ އެމްޑީޕީން ބަލައިގަންނަ ގޮތެއް ނޫން ކަމަށް އެ މަނިކުފާނު ވިދާޅުވިއެވެ. އަދި މީގެ 50 އަަހަރު ކުރިން ރާއްޖޭގެ ރަށްތައް ދެކެމުން އައި އުފާވެރި ތަހުޒީބީ ތަރައްޤީގެ ވާހަކަ މި ސަރުކާރުން ބާރުތައް ޖަމާކުރުމުގެ ސަބަބުން ބައެއްގެ ނުފޫޒުގެ ތެރެއަށް ވަދެގެން ގޮސްފައިވާ ކަމަށް އެ މަނިކުފާނު ވިދާޅުވިއެވެ. އެކަމުގެ ސަބަބުން މިއަދު ސިޓީތަކުގައި ވެސް އަމިއްލަ އަށް ކަމެއް ކުރުމުގެ އިޚްތިޔާރު ނެތް ކަމަށް އެ މަނިކުފާނު ވަނީ ފާހަގަކުރައްވާފައެވެ.
ލާމަރުކަޒީ ނިޒާމް ފުނޑާލުމަށް ކުރާ މަސައްކަތާއި ދެކޮޅަށް ކުރެވެން ހުރި ހުރިހާ މަސައްކަތެއް އެމްޑީޕީން ކުރާނެ ކަމަށް އެ މަނިކުފާނު ވަނީ ވިދާޅުވެފައެވެ. އެ ނިޒާމް ހިމާޔަތްކުރުމަށް ކުރާ މަޝްވަރާތަކުގެ އިތުރުން އަމަލީ ގޮތުން ވެސް މަސައްކަތް ކުރާނެ ކަމަށް ރައީސް ޞާލިހު ވަނީ ވިދާޅުވެފައެވެ. އެހެން ނޫންނަމަ ރާއްޖެ އަށް އެމްޑީޕިން ބޭނުންވާ ތަރައްޤީ ނުގެނެވޭނެ ކަމަށް ރައީސް ޞާލިހު ވިދާޅުވިއެވެ.
