ވެރިކަމަށް އަންނަން ސަރުކާރުން ދެއްކި ދޮގު ވާހަކަތަކުގެ ސަބަބުން ރާއްޖެ އަށް ލިބެން އޮތް އާމްދަނީން 3.2 ބިލިއަން ރުފިޔާ ނުލިބިވާ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ހޮނިހިރު ދުވަހު ކުޅުދުއްފުށި ސިޓީގައި އެމްޑީޕީން ކުރިއަށް ގެންދާ ލާމަރުކަޒީ ގުޅުން ކޮންފަރެންސްގައި ރައީސް ސާލިހު ވިދާޅުވީ މިއަދު ރާއްޖެދާ މިސްރާބާއި މެދު ސަރުކާރުން ވިސްނާލަން ޖެހޭ ކަމަށެވެ. އަދި ރާއްޖޭގެ ވެރިކަން ކުރާ ގޮތާއި މެދު ދިވެހިން ވެސް ވިސްނާލުން މުހިންމުކަމަށް އެ މަނިކުފާނު ވިދާޅުވިއެވެ. މި ސަރުކާރު ވެރިކަމަށް އައުމަށް ދެއްކި ހަގީގަތެއް ނެތް ދޮގު ވާހަކަތަކުގެ ނަތީޖާއަކީ ރައްޔިތުންނަށް ގެއްލުން ލިބޭ އެތައް ކަމެއް ދިމާވުން ކަމަށް އެ މަނިކުފާނު ވަނީ ވިދާޅުވެފައެވެ. އެމްޑީޕީގެ ވެރިކަމާއި ދެކޮޅަށް މިހާރުގެ ސަރުކާރުގެ އިސްވެރިން އޭރު މަސައްކަތްކުރީ ދޮގު ދޮލަނގެއް ބޮލަށް ލައިގެން ކަމަށް އެ މަނިކުފާނު ވަނީ ސިފަކުރައްވާފައެވެ. ރައީސް ޞާލިހު ވަނީ މި ސަރުކާރުން ދައްކާފައިވާ ދޮގު ވާހަކަތަކަށް ޒިންމާކުރުވަން ޖެހޭ ކަމަށް ވިދާޅުވެފައެވެ.
ކޮން ވާހަކައެއްތޯ ހަޑި ހުތުރުވެގެން އަޅުގަނޑުމެންގެ އަވަށްޓެރިންނާއި މެދު ނުދައްކަނީ. ނުގޮވަނީ ކޯޗެއްތޯ؟ އޭގެ ސަބަބުން މުޅި ޤައުމަށާއި ރައްޔިތުންނަށް ވީ ވައުދުތައް ގުނާ އަދަދު ނުކުރެވޭ. ހަމައެކަނި ޓުއަރިޒަމް ސެކްޓަރ ބައްލަވާ. އެންމެ ގިނައިން ރާއްޖެ އަށް ޓުއަރިސްޓުން އައި ޤައުމުން (އިންޑިއާ އިން) 40% މީހުން އައުން މަދުވެއްޖެ. ދައުލަތަށް ލިބެން އޮތް އާމްދަނީގެ ތެރެއިން 3.2 ބިލިއަން ރުފިޔާ ނުލިބި ހިނގަނއްޖެ. ކާކުތޯ ޒިންމާވަނީ މިކަމާ؟ މިކަން ޒިންމާ ކުރުވަން އެބަޖެހޭ.ކުރީގެ ރައީސް އިބްރާހިމް މުހައްމަދު ސާލިހު
ރައީސް ޞާލިހު ވިދާޅުވީ ރާއްޖޭގައި ފައިސާ ނެތް ވާހަކަ ސަރުކާރުން މިއަދު ދައްކާ އިރު މި ސަރުކާރުގެ ޢަމަލުތަކުގެ ސަބަބުން މި 8 މަސް ދުވަހުގެ ތެރޭގައި ވީ ގެއްލުންތައް ބަލަން ޖެހޭ ކަމަށެވެ. އަދި މިނިވަންކަމާއި ދީން ނެތިގެން ދާ ކަމަށް ބުނެ ދެއްކި ވާހަކަތައް މިއަދު ކޮބާތޯ ރައީސް ޞާލިހު ސުވާލު އުފެއްދެވިއެވެ. ހަނިމާދޫ އެއާޕޯޓް ތަރައްޤީކުރުމަކީ ބިރެއްކަމަށް ކުރިން ރައީސް ޑރ.މުހައްމަދު މުއިއްޒުގެ ސަރުކާރުގެ ވެރިން ވިދާޅުވި ނަމަވެސް އިހަށް ދުވަހު އެ އެއާޕޯޓާއި ސަރުކާރުން ހަވާލުވެފައިވާ ކަމަށް އެ މަނިކުފާނު ވިދާޅުވިއެވެ. އެހެންކަމުން އޭރު ސަރުކާރުން ދެއްކީ ވެރިކަމަށް އަންނަން ދެއްކި ދޮގުވާހަކަތައްކަން ހާމަވާ ކަމަށް އެ މަނިކުފާނު ވިދާޅުވިއެވެ.
