ރަސްމާލެ ބިން ހިއްކުމުގެ މަޝްރޫއު މިވަގުތު ކުރިއަކަށް ނުދޭ، އެހެންވިޔަސް އެ މަޝްރޫއު ހުއްޓިފައެއް ނުވޭ: ސަރުކާރު
20 މާރިޗު 2024 | ބުދަ 08:00އެ މަސައްކަތުގައި މައިގަނޑު 2 ކަމެއް ދިމާވެގެން އުޅޭކަމަށް މިނިސްޓަރު ވިދާޅުވި
ފުށިދިއްގަރު ފަޅުގެ މަޝްރޫއު
ރަސްމާލެ ބިން ހިއްކުމުގެ މަޝްރޫއު ކުރިއަށް ނުދާ ކަމަށާއި، އެހެންވިޔަސް އެ މަޝްރޫއު ހުއްޓިފައި ނުވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ބުދަ ދުވަހު އޮތް ނޫސްވެރިންގެ ބައްދަލުވުމުގައި ރަސްމާލޭ މަޝްރޫއާ ގުޅޭގޮތުން ސުވާލު ކުރުމުން މިނިސްޓަރު ވިދާޅުވީ، އެ މަސައްކަތަކީ އެޗްޑީސީއާއި ކޮންޓްރެކްޓަރާމެދު ސޮއި ކުރެވިގެން ކުރިއަށްދާ މަޝްރޫއެއް ކަމަށެވެ.
ފުށިދިއްގަރު ފަޅު "ރަސްމާލެ" ގޮތުގައި ތަރައްގީކުރުމަށް ކުރިއަށްގެންދާ މަޝްރޫއުގެ ބިން ހިއްކުމުގެ މަސައްކަތް އޮތީ ހުއްޓިފައިވާ ކަމަށް ބައެއް މީޑިއާތަކުގައި ރިޕޯޓުކޮށްފައިވެއެވެ. ނަމަވެސް މިނިސްޓަރު ވިދާޅުވީ، މިވަގުތު ބިން ހިއްކުމުގެ މަޝްރޫއު ކުރިއަށް ނުދާކަމަށާއި، އެހެންވިޔަސް އެ މަޝްރޫއު ހުއްޓިފައިނުވާ ކަމަށެވެ.
އެ މަސައްކަތުގައި މައިގަނޑު 2 ކަމެއް ދިމާވެގެން އުޅޭކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވާ ގޮތުގައި އެއް ކަމަކީ އެ މަސައްކަތުގައި ސޮއިކުރި ކޮންޓްރެކްޓާއި ބޮސްކާލިސްއާ ދެމެދު ވެވިފައިވާ އެއްބަސްވުމެއްގެ ދަށުން، ގުޅީފަޅު ހިއްކުމަށް ބޭނުންކުރާ ޑްރެޖަރު ގުޅީފަޅު ހިއްކާ ނިމުމުން، ރަސްމާލޭ މަޝްރޫއަށް ބޭނުންކުރަން ދޭގޮތަށް އޮތުމެވެ.
އޭގެ ސަބަބެއްގެ ގޮތުގައި މިނިސްޓަރު ވިދާޅުވީ، މިއީ ބަޖެޓުގައި ހިމެނޭ މަޝްރޫއަކަށް ނުވާތީ، އައު ޑްރެޖަރެއް ގެނައުމަކީ ޚަރަދު ބޮޑުވާނެ ކަމަކަށްވާތީއެވެ.
އެހެންކަމުން، ކޮންޓްރެކްޓަރުން ވިސްނަނީ ގުޅީފަޅުގައި ބޮސްކާލިސްއިން މިހާރު ބޭނުން ކުރަމުންދާ ޑްރެޖަރު ނިމުމުން، އެ ޑްރެޖަރު ބޭނުން ކުރުމަށް ކަމަށް މިނިސްޓަރު ވިދާޅުވިއެވެ.
މިހާރު ރަސްމާލެ ސަރަޙައްދުގައި ވެލި އެޅުމުގެ މަސައްކަތް ކުރިއަށް ނުދަނީ އެެހެންވެކަމަށް މިނިސްޓަރު ވިދާޅުވިއެވެ.
ރަސްމާލެ މަޝްރޫއުގައި ދިމާވެގެން އުޅޭ ދެވަަނަ މައްސަލައަށް އަލިއަޅުވާލައްވާ މިނިސްޓަރު ވިދާޅުވީ، އެ މަސައްކަތް ފެށިއިރު އެ ސަރަޙައްދުން ވެލި ނެގުމަށްޓަކައި އެ ސަރަޙައްދުގެ ދިރާސާއެއް ހެދިފައި ނެތް ކަމަށެވެ.
އޭރު ވީހާވެސް އަވަހަށް މަޝްރޫއު ފެށުމަށް މަސައްކަތް ކުރުމަށް ސޮއި ކުރެވިގެން ދިޔައީ ކަމަށް މިނިސްޓަރު ވިދާޅުވިއެވެ.
އެހެންކަމުން "ސޭންޑް ސަރޗް ސްޓަޑީ" ހެދުމަށްފަހު، އެ މަސައްކަތްތައް ކުރިއަށް ގެންދެވޭނެކަމަށް މިނިސްޓަރު ވިދާޅުވިއެވެ.
ފުށިދިއްގަރު ފަޅުގެ އަމަލީ މަސައްކަތް 18 ޑިސެމްބަރު 2023 ގައި ފަށާފައި ވަނީ، އެ ބިޔަ މަޝްރޫއު ރޭވިފައިވާ ގޮތާއި ތަރައްގީކުރާ ގޮތާއި، މަޝްރޫއުއަށް ކަނޑައަޅާފައިވާ ބިން ހިއްކަން ބަޔަކު ހޯދި ގޮތް ނޭނގި، އަދި އެ އިޖްރާއަތް ގެންދިޔަ ގޮތުގެ ހާމަކަމެއް ނެތިކަމަށް އެމްޑީޕީގެ މެމްބަރުން ވިދާޅުވެފައިވެއެވެ.
އަދި ކުއްލިގޮތަކަށް މަޝްރޫއު ބަޔަކާ ހަވާލުކޮށް، ބިން ހިއްކުމުގެ އަމަލީ މަސައްކަތް ފެށުމުން އޭރުވެސް ބޮޑެތި ސުވާލުތަކެއް އުފެދިފައިވެއެވެ.
އޭގެ އިތުރުން، ތިންމަސްވެގެން ދިޔައިރު، ފުށިދިއްގަރު ފަޅަށް އެޅި ވެލިކޮޅު ފިޔަވައި މި ސަރުކާރުން އަލަށްކުރި ކަމެއް ނެތް ކަމަށް އެމްޑީޕީގެ އެޑްވައިޒު އަދި ކުރީގެ ރައީސް އިބްރާހިމް މުހައްމަދު ޞާލިހުވެސް ވިދާޅުވެފައިވެއެވެ.
ފުށިދިއްގަރުފަޅު ހިއްކަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އަށް ޖުމްލަ 70 ހެކްޓަރު، ދިގު މުއްދަތަށް ދީގެންނެވެ. ބިން ދޫކުރުމަށް ނިންމައި، މަޝްރޫއު ފަށާފައިވާއިރު، ހުޅުމާލެއިން ދޫކުރި 10 ހެކްޓަރުގެ ބިމުގެ އަަގާއި ރަސްމާލެއިން ދޭ 60 ހެކްޓަރުގެ ބިމުގެ އަގަކީ ކޮބައިކަން، ނޫސްވެރިން ތަކުރާރުކޮށް ސުވާލުކުރި ނަމަވެސް ސަރުކާރުން އޮޅުންފިލުވައިދީފައެއް ނުވެއެވެ.
