މި ސަރުކާރުގެ ނިޔަތް ރަނގަޅުނަމަ ފްލެޓް ލިސްޓާ ދޭތެރޭގައި އެގޮތަށް ކަންނުކުރާނެ - މީކާއީލް
ސަރުކާރުގެ ނިޔަތް ރަނގަޅުނަމަ މިއަދާހަމައަށް، ފުލެޓް ލިސްޓުގައި މައްސަލައެއް އުޅޭނަމަ އެކަމަށް ހައްލެއްގެނެވޭހާ ވަގުތު ލިބިއްޖެ
ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ނިޔަތް ރަނގަޅުނަމަ ނިކަމެތި ރައްޔިތުންނަށް ލިބިފައިވާ ފުލެޓާއި ދޭތެރޭގައި 3 މަސްވެގެން ދިޔައިރު، އެގޮތަށް އަމަލެއް ނުކުރައްވާނެކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގާމުގައި ވާހަކަ ދައްކަވަމުން މީކާއީލް ވިދާޅުވީ ފާއިތުވި 3 މަހެއްހާ ދުވަހުގެ ތެރޭގައި ސަރުކާރުގެ އަމަލުތައް ހުރިގޮތަށް ބަލާއިރު، ފެންނަ އެއްކަމަކީ ސަރުކާރުގެ ނިޔަތް ރަނގަޅު ނޫން ކަމެވެ. ސަރުކާރުގެ ނިޔަތް ރަނގަޅުނަމަ މިއަދާހަމައަށް، ފުލެޓް ލިސްޓުގައި މައްސަލައެއް އުޅޭނަމަ އެކަމަށް ހައްލެއްގެނެވޭހާ ވަގުތު ލިބިއްޖެ ކަމަށާއި އަދި މައްސަލަ ނެތްކަމަށް އޭސީސީން ބުނާ ފޯމްތަކުގެ ފުލެޓްތައް އެންމެ ކުޑަމިނުން ރައްޔިތުންނަށް ހަވާލުކުރެވޭހާ ވަގުތު ސަރުކާރަށް ލިބިއްޖެ ކަމަށް މީކާއީލް ވިދާޅުވިއެވެ.
މީކާއީލް ވިދާޅުވީ ސަރުކާރުން އެކަން ކުރުމުގެ އެއްވެސް ނިޔަތެއް ނެތްކަން ހާމަވެގެންދަނީ 3 މަސް ފާއިތުވެގެންދިޔަ އިރު ފުލެޓް މައްސަލައިގައި އެއްވެސް ކުރިއެރުމެއް ލިބިފައިނުވާތީ ކަމަށެވެ.
މީކާއީލް ވިދާޅުވީ ރިޔާސީ އިންތިހާބުގައިވެސް އެމްޑީޕީން ބުނަމުންދިޔައީ، ސަރުކާރު ބަދަލުވެއްޖެނަމަ، ވަކިން ހާއްސަކޮށް ރައީސް ޑރ. މުހައްމަދު މުއިއްޒު ވެރިކަމަށް އަތުވެއްޖެނަމަ، މާލޭގެ ރައްޔިތުންނަށް ގޯތިތަކެއް ނުދެއްވާނެ ކަމަށެވެ. ނަމަވެސް މި ސަރުކާރުން ހެދި ދޮގުތަކާއި، އޮޅުވާލުމުގައި ޖެހި ރައްޔިތުން ހީކުރީ ރަޖިސްޓްރީއާއި ހަމައަށް ގޮސްފައި އޮތްކަމެއް ސަރުކާރަށް ބާތިލް ނުކުރެވޭނެ ކަމަށެވެ.
ނަމަވެސް ރަޖިސްޓްރީވެސް މި ސަރުކާރުން ބާތިލްކޮށް، ގޯތި ނުދޭނެކަމަށާއި މާލޭގެ ރައްޔިތުންނަށް ގޯތި ދިނުމަކީ މި ސަރުކާރު ދެކޮޅު ކަމެއް ކަމަށެވެ. އަދި އެކަމަށް އެންމެ ބޮޑަށް ވަކާލާތުކުރީ ޕީއެންސީގެ އެއިރުގެ ކެންޑިޑޭޓް އަދި މިހާރުގެ ރައީސް ޑރ. މުއިއްޒުއާއި ލީޑަރޝިޕްގެ ބޭފުޅުން ކަމަށް މީކާއީލް ވިދާޅުވިއެވެ.
އަދި ގޯތިތައް ހަވާލުކުރުމުގެ ނިޔަތެއް އޮތްނަމަ، އެންމެ ކުޑަމިނުން އެކަމާއި ގުޅޭ ފަހުގެ މައުލޫމާތެއް ރައްޔިތުންނަށް ދޭނެ ކަމަށާއި ނަމަވެސް މިހާތަނަށް އެއްކަމެއްވެސް މި ސަރުކާރުންކޮށްފައި ނުވާކަމަށް އަދި މިކަމުގައި މަޖިލީހުން ކުރެވެން ހުރި ހުރިހާކަމެއް އެމްޑީޕީން ކުރާނެކަމަށް މީކާއީލް ވިދާޅުވިއެވެ.
