ފްރެއިބާގް ބަލިކޮށް، ލެވަކޫސަނުން ލީޑު ހިފަހައްޓައިފި

ޖަރުމަނު ލީގުގައި ފްރެއިބާގާ ދެކޮޅަށް ކުޅުނު މެޗުން މޮޅުވެ، ބަޔާ ލެވަކޫސަނުން އެ ޓީމުގެ ލީޑު ހިފަހައްޓައިފި އެވެ.

ފްރެއިބާގްގެ އަމިއްލަ ދަނޑުގައި އާދިއްތަ ދުވަހުގެ ރޭ ކުޅުނު މެޗު ލެވަކޫސަނުން ކާމިޔާބު ކުރީ 3-2 އިންނެވެ.

މެޗު ފަށައިގެން ދެ ވަނަ މިނެޓުގައި ލެވަކޫސަނުން ވަނީ ލަނޑު ޖަހައި ލީޑު ނަގައިފަ އެވެ. އެލެކްސް ގްރިމާލްޑޯ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ފްލޯރިއަން ވާޓްޒް އެވެ. އޭގެ އަށް މިނެޓު ފަހުން ރިޓްސޫ ޑޯން ވަނީ ލަނޑު ޖަހައި ފްރެއިބާގަށް ނަތީޖާ ހަމަހަމަ ކޮށްދީފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ލޫކަސް ހޮލާ އެވެ. ފުރަތަމަ ހާފުގެ ފުރިހަމަ ވަގުތު ހަމަވާން ފަސް މިނެޓަށްވެފައި ވަނިކޮށް، ދެ ވަނަ ފަހަރަށް ލެވަކޫސަނަށް ލީޑު ނަގައިދިނީ އާދަމް ހޮޒެކް އެވެ.

މެޗުގައި ލެވަކޫސަނުން އެ ޓީމުގެ ތިން ވަނަ ލަނޑު ޖެހީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ކުރީ ކޮޅު އެ ލަނޑު ޖެހީ ޕެޓްރިކް ޝިކް އެވެ. އޭނާ އެ ލަނޑު ޖެހީ ޖެރެމީ ފްރިމްޕޮންގް ތަނަވަސްކޮށްދިން ފުރުސަތެއްގަ އެވެ. މެޗުގައި ފްރެއިބާގްގެ ދެ ވަނަ ލަނޑު ޖެހީ ޔަނިކް ކެއިޓެލް އެވެ.

މޮޅާއެކު ލެވަކޫސަނުން ވަނީ އެއް ވަނައިގައި ދިހަ ޕޮއިންޓުގެ ލީޑެއް އަލުން ނަގައިފަ އެވެ. މިހާތަނަށް ލީގުގައި ކުޅުނު 27 މެޗުން އެ ޓީމަށް ލިބެނީ 70 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ބަޔާން މިއުނިކަށް ލިބެނީ 60 ޕޮއިންޓެވެ.