ހައްގުވާ ފަރާތްތަކަށް އެކަން ކަށަވަރުކުރަން މަޖިލީހުން ކުރަންޖެހޭ ހުރިހާކަމެއް ކުރާނަން
މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ކެނދިކުޅުދޫ ދާއިރާގެ މެންބަރު އަހުމަދު އީސަ
ގާނޫނަށް ބަދަލު ގެނެސްގެން ނަމަވެސް ފުލެޓް ކޮމިޓީން ކުރަން އުޅޭ ކަންކަން ހުއްޓުވާނެ ކަމަށް އެމްޑީޕީން ކުރިއަށް ގެންދާ މިސްރާބު ހަމަ މަގަށް ކެމްޕެއިންގެ ތަރުޖަމާން އަދި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
އީސަ ވިދާޅުވީ ސަރުކާރުން އަންނަނީ ރައްޔިތުންނަށް ބޮޑެތި ބުހުތާނު ދޮގުތައް ހަދާ އޮޅުވާލުމުގެ މަސައްކަތް ރާވައިގެން އެންމެ މަތިން ފެށިގެން ކުރަމުން ކަމަށެވެ. އަދި އެއީ ކަންބޮޑުވާ ކަމެއް ކަމަށާއި، ސަރުކާރެއް ހިންގަން ޖެހޭނީ ރައްޔިތުންނަށް ދެފުށްފެންނަހެން ކަމަށާއި، ވީހާވެސް ބޮޑަށް ސަރުކާރުން ކުރާ ކަންކަން ސާފުވާންޖެހޭ ކަމަށެވެ.
އީސަ ވިދާޅުވީ ހައުސިންގ ކޮމިޓީއަކީ އޮޅުވާލުމެއް ކަމަށާއި، އެއީ ސިޔާސީ ރޭވުމެއް ކަމަށެވެ. އަދި އެކަމަކީ އެތަކެއް ނިކަމެތި ރައްޔިތުންތަކެއްގެ ހައްގުތައް ނިގުޅައިގަތުމަށް ހިންގަމުންދާ ބޮޑު ޖަރީމާއެއް ކަމަށެވެ. އީސަ ވިދާޅުވީ ހައުސިން ކޮމިޓީއެއް ހެދުމުގައި މާލެ ސިޓީ ކައުންސިލްގެ އެއްވެސް މަޝްވަރާއެއް ކުރުމެއް ނެތި އަދި މޭޔަރަށްވެސް އެނގުމެއް ނެތި ކޮމިޓީ ހައްދަވައިގެން ކުރާ މަސައްކަތުގެ މަގުސަދަކީ ކުރިއަށް އޮތް މަޖިލިސް އިންތިހާބަށް ސަރުކާރަށް މަސައްކަތްކޮށް، ތާއިދުކުރާ ފަރާތްތަކަށް ފުލެޓް ބަހާލުން ކަމަށެވެ.
ފުލެޓް ކޮމިޓީ އުފެއްދީ، ރައީސް ޑރ. މުހައްމަދު މުއިއްޒުގެ ލަފާފުޅުގެ މަތިން މިދިޔަ ފެބްރުއަރީމަހުގެ 26 ވަނަ ދުވަހުއެވެ. މި ކޮމެޓީގައި ތިއްބަވަނީ ޖުމްލަ ފަސް މެމްބަރުންނެވެ. ކޮމިޓީގެ ފުރަތަމަ ބައްދަލުވުން ބުރާސްފަތި ދުވަހު ވަނީ ބާއްވާފައެވެ. ނަމަވެސް ކޮމިޓީގެ މަސައްކަތާއި ގުޅޭ އިތުރު ތަފްސީލެއް ހާމަކޮށްފައެއް ނުވެއެވެ.
