ބަލީގެ އަލާމާތެއް ފެންނަނަމަ ތަންތަނަށް ނުގޮސް ގޭގައި މަޑުކުރުން މުހިންމު
އައިޖީއެމްއެޗް
މިދުވަސްވަރު މާލެ އާއި އަތޮޅުތެރޭގައި ރޯގާ އާއި ވައިރަލް ހުންފަދަ ބަލިތައް އިތުރުވަމުންދާކަން ފާހަގަކުރެވޭތީ އެކަމަށް ސަމާލުކަން ދިނުމަށް އެޗްޕީއޭއިން އިލްތިމާސްކޮށްފިއެވެ.
މިކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އެޗްޕީއޭގެ ޕަބްލިކް ހެލްތު ކޯޑިނޭޓަރ ފާތުމަތު އަނާ ވިދާޅުވީ އޭގެކުރީ ހަފްތާ އާ އަޅާބަލާއިރު މިދިޔަ ހަފްތާގައި މިފަދަ ބަލިތައް ފެނިފައިވާ މިންވަރު އިތުރުވެފައިވާކަމަށެވެ. އެހެންކަމުން ރޯގާ އާއި ހުން ފެތުރުނަ ނުދިނުމަށް ކޮންމެ މީހަކަށްވެސް ކުރެވެން ހުރި މަސައްކަތެއް ކުރުމަކީ މުހިންމު ކަމެއްކަމަށް އަނާ ވިދާޅުވިއެވެ.
މިދުވަސްވަރަކީ ރަމަޟާން މަސް ކަމަށްވުމާއެކު ގިނަ ބަޔަކު އެއްތަނަށް އެއްވެ ގިނަ ކަންތައްތަކެއް ކުރާނެކަން ފާހަގަކުރައްވާ އަނާ ވިދާޅުވީ ބަލީގެ އަލާމާތެއް ފެންނަނަމަ ތަންތަނަށް ނުގޮސް ގޭގައި މަޑުކުރުން މުހިންމު ކަމަށެވެ. އަދި ގިނަގިނަ އިން އަތްދޮވުމާއެކު މާސްކު އަޅައިގެން އުޅުމާއި ސެނެޓައިޒްކުރުމަކީ މުހިންމު ކަމެއްކަމަށް އަނާ ވިދާޅުވިއެވެ.
މީގެއިތުރުން މިސްކިތަށް ދާ ފަރާތްތަކުންވެސް ރަނގަޅަށް އަތް ދޮވުން މުހިންމުކަމަށާއި މާބޮޑަށް ކެއްސާއި ކިނބިހި އަޅާނަމަ މާސްކު އަޅައިގެން މިސްކިތަށް ދިޔުމަށް އަނާ އެދިލެއްވިއެވެ.
