މަޖިލިސް އިންތިޚާބުގައި ވޯޓުލުމަށް އެންމެ ގިނައިން ރާއްޖެއިން ބޭރަށް ރީ-ރެޖިސްޓްރީކޮށްފައި ވަނީ މެލޭޝިއާއަށް: އީސީ
16 މާރިޗު 2024 | ހޮނިހިރު 08:11ޓްރިވެންޑްރަމްގައި ވޯޓުލުމަށް 101 މީހުން، މެލޭޝިއާގައި ވޯޓުލުމަށް 583 މީހުން ރީ-ރަޖިސްޓްރީވެފައިވޭ
އިންތިޚާބާބެހޭ މަރުކަޒު
ރައްޔިތުންގެ މަޖިލީހުގެ އިންތިޚާބުގައި ރީ-ރެޖިސްޓްރީ ކުރުމަށް ހުޅުވާލި ފުރުސަތުގައި މިހާތަނަށް އެންމެ ގިނައިން ރާއްޖެއިން ބޭރަށް ރީ-ރެޖިސްޓްރީކޮށްފައި ވަނީ މެލޭޝިއާގައި ކަމަށް އިލެކްޝަން ކޮމިޝަން (އީސީ)ން ބުނެފިއެވެ.
ރާއްޖެއިން ބޭރުގައި ބެހެއްޓުމަށް އިއުލާންކޮށްފައިވާ ވޯޓު ފޮށިތަކަށް 15 މާރިޗް 2024ގެ ނިޔަލަށް ރީ-ރަޖިސްޓްރީ ކޮށްފައިވާ އަދަދުތަކާ ބެހޭގޮތުން އީސީން ބުނީ، އިންޑިއާގެ ޓްރިވެންޑްރަމުގައި ވޯޓުލުމަށް 101 މީހުން، މެލޭޝިއާގެ ކުއަލަލަމްޕޫރުގައި ވޯޓުލުމަށް 583، ސްރީލަންކާގެ ކޮލަމްބޯގައި ވޯޓުލުމަށް 276 މީހުން، ތައިލެންޑުގެ ބެންކޮކްގައި ވޯޓުލުމަށް 13 މީހުން، އިނގިރޭސިވިލާތުގެ ލަންޑަންގައި ވޯޓުލުމަށް 76 މީހުން އަދި އެކުވެރި އަރަބި އިމާރާތުގެ އަބޫ ދާބީގައި ވޯޓުލުމަށް 24 މީހުން ރީ-ރަޖިސްޓްރީކޮށްފައި ވާކަމަށެވެ.
ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުސަތު، މާރިޗު 16ވާ ހޮނިހިރު ދުވަހުގެ މެންދުރު 3:00ގެ ނިޔަލަށް ހަމަވާނެއެވެ.
މަޖިލިސް އިންތިޚާބު އެންމެ ފުރަތަމަ ބާއްވަން ހަމަޖެއްސީ 17 މާރޗް 2024 ވަނަ ދުވަހުއެވެ. އެއީ ރޯދަ މަހުގެ 7 ވަނަ ދުވަހެވެ. އެހެންނަމަވެސް ރޯދަމަހު އިންތިޚާބުތައް ނުބާއްވާ ގޮތަށް މަޖިލީހުން އިންތިޚާބުތަކާބެހޭ ގާނޫނަށް ބަދަލު ގެނައުމާ ގުޅިގެން އިންތިޚާބު ވަނީ ފަސްކޮށްފައެވެ. މިހާރު އީސީން ނިންމާފައި ވަނީ އެޕްރީލް މަހުގެ 21 ވަނަ ދުވަހު އިންތިޚާބު ބޭއްވުމަށެވެ.
