ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ޕީއެސްވީ އައިންދޮވަން ބަލިކޮށް، ޖަރުމަނުގެ ބޮރޫޝިއާ ޑޯޓްމަންޑުން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.

މި ދެ ޓީމު ޕީއެސްވީގެ ދަނޑުގައި ކުޅުނު ފުރަތަމަ ލެގު ނިމުނީ 1-1 އިން އެއްވަރުވެގެންނެވެ. ޑޯޓްމަންޑުގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު ދެ ވަނަ ލެގުގެ މެޗު އެ ޓީމުން ކާމިޔާބު ކުރީ 2-0 އިންނެވެ. މުބާރާތުގެ ކުއާޓާ ފައިނަލްގެ ޖާގަ ޑޯޓްމަންޑުން ކަށަވަރު ކުރީ އެގްރިގޭޓް 3-1 ގެ ނަތީޖާ އަކުންނެވެ.

މެޗުގެ ފުރަތަމަ ހާފުގައި ޑޯޓްމަންޑުން އެއް ލަނޑު ޖެހިއިރު،އ އަނެއް ލަނޑު ޖެހީ ދެ ވަނަ ހާފުގަ އެވެ. މެޗު ފަށައިގެން ތިން ވަނަ މިނެޓުގައި ޑޯޓްމަންޑަށް ލީޑު ނަގައިދިނީ ޖޯޑަން ސަންޗޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ހޫލިއާން ބްރަންޑްޓް އެވެ. މެޗުގައި ޑޯޓްމަންޑުގެ ދެ ވަނަ ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ މާކޯ ރެއުސް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގައި ބެންޗުންނެވެ.

މިދިޔަ ސީޒަންގެ ޗެމްޕިއަންސް ލީގުގައި ވެސް ޑޯޓްމަންޑުން ވަނީ ގަދަ 16 ގައި ވާދަކޮށްފަ އެވެ. ނަމަވެސް އެ ފަހަރު އެ ޓީމަށް ގަދަ 16 ފަހަނައަޅާ ދެވޭ ގޮތް ނުވީ އެވެ.