ޣައްޒާގެ ވަގުތީ ބަނދަރު އެޅުމުގެ މިޝަންއަށް އެމެރިކާގެ އަސްކަރިއްޔާގެ 4 އުޅަނދެއް ފުރައިފި

ޣައްޒާއަށް އިންސާނީ އެހީވެއްދުމަށް އެމެރިކާއިން ގާއިމްކުރާ ވަގުތީ ބަނދަރުގެ މަސައްކަތަށް އެމެރިކާގެ އަސްކަރިއްޔާގެ 4 އުޅަނދެއް ފުރައިފިއެވެ.

ޕެންޓަގަންގެ ތަރުޖަމާނު ވިދާޅުވީ އެމެރިކާގެ އަސްކަރިއްޔާގެ ހަތަރު އުޅަނދެއް ވާޖީނިއާ ސްޓޭޓްގެ އަސްކަރީ މަރުކަޒަކުން އަންގާރަ ދުވަހު ފުރާފައިވަނީ އިންސާނީ އެހީ ފޯރުކޮށްދިނުމަށް ޣައްޒާގެ އައްސޭރިފަށުގައި ވަގުތީ ބަނދަރެއް ހެދުމަށް ބޭނުންވާ ސިފައިންނާއި އާލާތްތަކާއެކު ކަމަށެވެ.

ރައިޑަރ އިތުރަށް ވިދާޅުވީ ޔޫއެސްއޭވީގެ އެސްޕީ4 ލޭމްސް އޭ ލޫކްސް، ޔޫއެސްއޭވީ މޮންޓެރީ، ޔޫއެސްއޭވީ މަޓަމޮރޯސް އަދި ޔޫއެސްއޭވީ ވިލްސަން ވާރފް، 7 ވަނަ ޓްރާންސްޕޯޓް ބްރިގޭޑް (އެކްސްޕެޑިޝަނަރީ)ގެ ޔޫއެސްއޭވީ ވިލްސަން ވާރފް ވަނީ މިޝަނަށް އެހީތެރިވުމަށް ބޭނުންވާ ސާމާނު ހިފައިގެން އަންގާރަ ދުވަހު ފުރާފައި ކަމަށެވެ.

އޭނާ ވިދާޅުވީ ގާތްގަނޑަކަށް 60 ދުވަހުގެ ތެރޭގައި ވަގުތީ ބަނދަރު ނިންމާ މުޅިން އޮޕަރޭޓް ކުރެވޭނެ ކަމަށް ލަފާކުރެވޭ ކަމަށާއި އޭގެ ސަބަބުން ދުވާލަކު ދެ މިލިއަނަށް ވުރެ ގިނަ މީލްސް ޑެލިވަރ ކުރެވޭނެ ކަމަށެވެ.

ޣައްޒާގެ އައްސޭރިފަށުގައި ވަގުތީ ފްލޯޓިން ޑޮކެއް އެޅުމުގެ ތައްޔާރީތައް އަންގާރަ ދުވަހު ފަށާފައިވާ ކަމަށް ބައެއް މީޑިއާތަކުންވެސް ވަނީ ރިޕޯޓްކޮށްފައެވެ. އަދި އިސްރާއީލު ސިފައިންގެ ބާރުގެ ދަށުގައި އޮންނަ އަލް ބައިދާރު ސަރަހައްދު ކައިރީގައި ހެވީ މެޝިނަރީތައް ހަރަކާތްތެރިވަމުންދާ ކަން ވެސް އެފަދަ ރިޕޯޓްތަކުން ވަނީ ކަށަވަރުކޮށްދީފައެވެ.

އެމެރިކާގެ ރައީސް ޖޯ ބައިޑަން މިދިޔަ ހަފުތާގައި ދެއްވި ސްޓޭޓް އޮފް ދަ ޔޫނިއަން ތަގުރީރުގައި މިކަން އިއުލާނު ކުރެއްވީ އިސްރާއީލުން ޣައްޒާއަށް އެއްގަމު މަގުތައް މަނާކޮށް، އެހީ ގެނައުން މަޑުޖެހިފައި ވަނިކޮށެވެ.