ޑްރޯން ގަތުމަށްޓަކައި 30 މިލިޔަން ޑޮލަރު ހޭދަވި، އެއީ މަޖިލިސް އިންތިޚާބަށް ފައިސާ ހޯދަން ކުރި ކަމެއް - އީސަ
13 މާރިޗު 2024 | ބުދަ 06:46އީސަ ވިދާޅުވީ މިއީ ރައްޔިތުންގެ މަޖިލީހުގެ އިންތިހާބަށް ފައިސާ ހޯދުމަށްޓަކައި ނުުއަގުގައި ގަނެފައިވާ ޑްރޯންތަކެއް ކަމަށް ބެލެވޭ ކަމަށް
ކެނދިކުޅުދޫ ދާއިރާގެ މެންބަރު އަހުމަދު އީސަ
މި ސަރުކާރުން ޑްރޯންގަތުމަށް ޓަކައި 30 މިލިޔަން ޑޮލަރު ހޭދަކުރި ކަމަށާއި އެއީ މަޖިލިސް އިންތިޚާބަށް ފައިސާ ހޯދަން ކުރި ކަމެއް ކަމަށް އެމްޑީޕީގެ މަޖިލިސް ކެމްޕެއިން 'މިސްރާބު ހަމަމަގަށް" ގެ ތަރުޖަމާން އަދި ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
އީސަ މިހެން ވިދާޅުވީ އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. އީސަ ވިދާޅުވީ މިއީ ރައްޔިތުންގެ މަޖިލީހުގެ އިންތިހާބަށް ފައިސާ ހޯދުމަށް ޓަކައި ނުުއަގުގައި ގަނެފައިވާ ޑްރޯންތަކެއް ކަމަށް ބެލެވޭ ކަމަށެވެ. އަދި ދުނިޔޭގެ ބާޒާރުގައި ޑްރޯން ވިއްކަން ހުރި އަގަށް ވުރެ ބޮޑުކޮށް އެ ޑްރޯންތައް ގަތީ ނުއަގުގައި، ނުރަނގަޅު މަގްސަދެއްގައި ކަމަށް އީސަ ތުހުމަތުކުރެއްވިއެވެ.
އެގޮތުން ސާވެއިލަންސް ޑްރޯންގެ ޓެކްނޮލޮޖީ ރާއްޖެއަށް ފޯރުކޮށްދޭން އެކުވެރި ގައުމަކާއެކު ނިމިދިޔަ ސަރުކާރުން މަޝްވަރާކޮށްފައިވާ ކަމަށާއި، މި ސަރުކާރު ވެރިކަމަށް އައުމަށް ފަހު ތުރުކީން ޑްރޯން ގަންނަން ނިންމި ނިންމުމަކީ ކުއްލި ނިންމުމެއް ކަމަށް ވެސް އީސަ ވިދާޅުވިއެވެ. ސުވާލު އުފެދޭ ގޮތަށް މި ފަދަ މުއާމަލާތެއް ހިންގާފައިވާތީ އީސަ ވަނީ އެކަމަށް ފާޑު ވިދާޅުވެފައެވެ.
މީގެއިތުރުން އީސަ ވިދާޅުވީ މިފަދަ ބޮޑު އަގެއްގައި ޑްރޯން ގަތުމަށް ވުރެ، ރާއްޖޭގެ ރައްޔިތުންގެ ދުޅަހެޔޮ ދިރިއުޅުމަކަށް ޓަކައި ފައިސާ ޚަރަދުކުރަން އިސްކަން ދިނުން މުހިންމު ކަމަށް ދެކެވަޑައިގަންނަވާކަމަށެވެ.
