ސްޕެއިންގެ ރެއާލް މެޑްރިޑަށް ކުޅެމުން އަންނަ ތުރުކީގެ ޒުވާން ކުޅުންތެރިޔާ އާޑާ ގުލެއާ އަށް، އެ ޓީމުގެ ކޯޗު ކާލޯ އަންޗެލޮޓީ ވަރަށް ބޮޑަށް ތައުރީފު ކޮށްފި އެވެ.

ގުލެއާ އަށް އަންޗެލޮޓީ ތައުރީފު ކުރީ، ސްޕެނިޝް ލީގުގައި ރެއާލުން ސެލްޓަ ވީގޯއާ ދެކޮޅަށް ކުޅުނު މެޗަށްފަހު އެވެ. ހަތަރު ލަނޑުގެ މޮޅެއް ހޯދައި ރެއާލުން އެއް ވަނައިގައި ލީޑު ފުޅާ ކުރި މެޗުގައި، ރެއާލްގެ ހަތަރު ވަނަ ލަނޑު ޖެހީ ގުލެއާ އެވެ. އެއީ މިދިޔަ އަހަރު ރެއާލަށް ބަދަލުވި ގުލެއާ އެ ޓީމަށް ޖަަހައިިދިން ފުރަތަމަ ލަނޑެވެ.

އެ މެޗަށްފަހު ވާހަކަ ދައްކަމުން އަންޗެލޮޓީ ބުނީ، ގުލެއާ އަކީ މަތީ ފަންތީގައި ފުޓުބޯޅަ ކުޅެވޭނެ ފެންވަރުގެ ކުޅުންތެރިޔެއް ކަމަށެވެ. އަންޗެލޮޓީ ދެކޭ ގޮތުގައި ރެއާލް މެޑްރިޑުގައި ގުލެއާގެ މުސްތަޤުބަލު ވަރަށް އުޖާލާ ވާނެ އެވެ. އަދި އޭނާގެ މުސްތަޤުބަލަށް، ރެއާލް އަކީ ވަރަށް މުހިންމު ކުލަބެއް ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން އަންޗެލޮޓީ ބުނީ ސެލްޓަ ވީގޯއާ ދެކޮޅަށް ގުލެއާ ޖެހީ ވަރަށް ހިތްގައިމު ލަނޑެއް ކަމަށެވެ. އެއީ ރެއާލްގައި ގުލެއާ ޖެހި ފުރަތަމަ ލަނޑަށްވީ ނަމަވެސް، ކުރިއަށް އޮތް ތަނުގައި އޭނާ އިތުރު ލަނޑުތަކެއް ޖަހާނެ ކަމުގެ ފުރިހަމަ ޔަގީންކަން އޮތް ކަމަށް ވެސް އަންޗެލޮޓީ ވަނީ ބުނެފަ އެވެ.

އަމިއްލަ ޤައުމު، ތުރުކީގެ ކުލަބެއްގައި ހުރުމަށްފަހު ގުލެއާ ރެއާލަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާއެކު އޭނާ ސޮއި ކުރި ދިގު މުއްދަތުގެ އެއްބަސްވުން ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ.